ചെലക്കാണ്ട് പോടാ

ഇന്ത്യന്‍ റുപ്പി

2011-10-16T03:20:00.000-07:00

തിയേറ്ററില്‍ നീണ്ട ക്യൂ കാണുന്നത് ഏത് സിനിമാപ്രേമിക്കും സുഖകരമായ കാഴ്ചയാണ്.(ടിക്കറ്റ് ആദ്യമേ എടുത്തിട്ടുണ്ടെങ്കില്‍, ഇല്ലെങ്കില്‍ അത് അത്രരസകരമല്ല). താന്‍ കാണുവാന്‍ പോകുന്ന ചിത്രത്തെക്കുറിച്ച് നല്ല അഭിപ്രായമാണ് നാട്ടില്‍ പരന്നിരിക്കുന്നതെന്ന് അത് തെളിയിക്കുന്നു. കൊടുക്കുന്ന പൈസ മുതലാവുമെന്ന വിശ്വാസത്തില്‍ അവന് സിനിമ കാണാനായി ഇരിക്കാം.

എല്ലാ ആഴ്ചയ്യും തിരുവനന്തപുരത്തെത്തി ഒന്ന് സെറ്റാവുമ്പോളേക്കും തിരിച്ച് പോകാനുള്ള സമയമായിട്ടുണ്ടാവും. ട്വീറ്ററും ഫേസ്ബുക്കും മറ്റ് സോഷ്യല്‍ മീഡിയ ആക്ടിവിറ്റികളുമല്ലാതെ പുറത്തിറങ്ങി സര്‍ക്കീട്ടിനൊന്നും പോകാന്‍ സാധിക്കാറില്ല. @remeshneelamana ഇവിടുണ്ടായിരുന്നപ്പോള്‍ സിനിമ പ്ലാനിംഗെല്ലാം അവന്റെ വകയായിരുന്നു. ഏത് തിയേറ്ററില്‍ ഏത് പടമെന്ന് കണ്ടെത്തി വിളിക്കും. വണ്ടിയുമായി ഇറങ്ങിയാല്‍ മാത്രം മതി. ആ പതിവൊക്കെ എന്നേ മാറിയിരിക്കുന്നു.

രാവിലെ പത്ത് മണി കഴിഞ്ഞിരിക്കുന്നു. ഫോണില്‍ അരുണ്‍ സത്യന്റെ കോള്‍
'ഇന്ത്യന്‍ റുപ്പി കാണാന്‍ വരുന്നോ? നിങ്ങള്‍ക്ക് ടിക്കറ്റ് എടുക്കണോന്നറിയാന്‍ വിളിച്ചതാ' ഹലോ പറയുന്നതിന് മുമ്പ് അരുണിന്റെ ചോദ്യം

'ഏടെയാ പടം' കോയമ്പത്തൂരിലേക്ക് പറിച്ച് നടപ്പെട്ട ശേഷം ഇത്തരം കാര്യങ്ങളൊന്നും ഒരു തിട്ടവുമില്ലാതായിരിക്കുന്നു

'ശ്രീപദ്മനാഭ, വരുന്നുണ്ടെങ്കില്‍ പതിനൊന്നിന് മുമ്പ് എത്തണം' അരുണ്‍ പറഞ്ഞു

'ടിക്കറ്റ് കിട്ടാന്‍ സാധ്യതയുണ്ടോ?'

'അത് നമ്മളെടുത്തേക്കാം നിങ്ങള്‍ സമയത്തിന് എത്തിയാല്‍ മതി' ഫോണ്‍ വയ്ക്കുന്നതിന് മുമ്പായി അരുണ്‍ പറഞ്ഞു

ഒട്ടും പ്രതീക്ഷിക്കാതെ വന്നൊരു സിനിമാ ക്ഷണം, അതും റിവ്യൂ സൈറ്റുകളിലും സുഹൃത്തുക്കളുടെ ഇടയിലും മികച്ച അഭിപ്രായം നേടിയ ചിത്രം. പതിനൊന്ന് മണിയോടെ ശ്രീപദ്മനാഭയിലെത്തി. ഒരു വിധത്തില്‍ പാര്‍ക്കിംഗ് സ്പേസ് കണ്ടെത്തി, എന്നെയും കാത്തിരുന്ന @arun_sathyan @raj1591 എന്നിവരുടെ അടുത്തെത്തി. നേരത്തെ സൂചിപ്പിച്ച പോലെ സാമന്യം നല്ല തിരക്ക്, ഞായറാഴ്ചയ്യുടേതാകും.

പദ്മനാഭസ്വാമി ക്ഷേത്രത്തിന്റെ നല്ല ടൈം ആയതോണ്ടാവും, പേരില്‍ സ്വാമിയോട് സാമ്യമുള്ള ശ്രീപദ്മനാഭയും ആകെ മാറിയിരിക്കുന്നു. പുതിയ സീറ്റുകളൊക്കെയായി ഒരു പുതുമോടി.

ചിത്രം തുടങ്ങി രഞ്ജിത്തിന്റെ പേരെഴുതിക്കാണിച്ചപ്പോളുള്ള കൈയ്യടി ശുഷ്കമായിരുന്നെങ്കിലും ഉറങ്ങിക്കിടന്നിരുന്ന നായകന്‍ മുഖത്തേ പുതപ്പ് മാറ്റി സ്ക്രീനില്‍ തെളിഞ്ഞപ്പോള്‍ കൂവലിന് ഒരു കുറവുമുണ്ടായിരുന്നില്ല. കാരണം മലയാളികളുടെ എന്തിനോ വേണ്ടിയുള്ള പകപ്പോക്കലിന് കളിപ്പന്തായി മാറേണ്ടി വന്ന ആ നായകന്‍ പൃഥ്വിരാജാണല്ലോ.

ചിത്രം തുടങ്ങി ആദ്യ കുറേ സീനുകള്‍ കണ്ടപ്പോള്‍ നാട്ടില്‍ ചെന്നൊരു പ്രതീതി. മാനാഞ്ചിറ മൈതാനവും, മിഠായിത്തെരുവും പാളയവും കോഴിക്കോട് ബീച്ചുമെല്ലാം ആ ഓര്‍മ്മകളിലേക്ക് കൊണ്ടെത്തിക്കുകയായിരുന്നു. ചിത്രത്തിന്റെ കഥയും കഥാപാത്രങ്ങളുമെല്ലാം നിങ്ങള്‍ ബ്ലോഗുകളിലൂടെയെല്ലാം വായിച്ച് കഴിഞ്ഞിരിക്കുമെന്നറിയാം എന്നാലും ഞാനും അത് ചെറുതായി പറയാം.

എന്നെയും നിങ്ങളെയും പോലെ പണക്കാരനാകണമെന്ന ആഗ്രഹവുമായി നടക്കുന്ന സാധാരണക്കാരനായ ഒരു 9ത്ത് പാസ്സ് മാത്രമായ ജെ.പി എന്ന ജയപ്രകാശായി പൃഥ്വി. ജെപിയുടെ പാര്‍ട്ടണറായ സിഎച്ച് ആയി പ്രാഞ്ചിയേട്ടനിലെ തമാശക്കാരന്‍ ഡ്രൈവറായി നമ്മളെ ചിരിപ്പിച്ച ടിനി ടോം , കാമുകി ഡോക്ടര്‍ ബീനയായി റിമ കല്ലിങ്കലും 'എവിടെയായിരുന്നു ഇതുവരെ' എന്ന് മലയാള സിനിമ പ്രേക്ഷകരെക്കൊണ്ട് (കാരണം അറിയാമായിട്ടു പോലും) ചോദിപ്പിക്കാന്‍ തോന്നിപ്പിക്കുന്ന അഭിനയ പ്രകടനവുമായി തിലകന്‍, ഗോള്‍ഡന്‍ പാപ്പനായി ജഗതിയും, രേവതി മാമുക്കോയ ലാലു അലക്സ്, സീനത്ത് അങ്ങനെ നമ്മുടെ ഇഷ്ടതാരങ്ങളും അടങ്ങിയ ഒരു രഞ്ജിത്ത് ചിത്രം അതാണ് ഇന്ത്യന്‍ റുപ്പി

തിലകന്റെ മടങ്ങി വരവ്, പൃഥ്വിയുടെ മികച്ച കഥാപാത്രം , ടിനിടോം അവതരിപ്പിക്കുന്ന മുഴുനീള കഥാപാത്രം, ജഗതിയുടെ ഗോള്‍ഡന്‍ പാപ്പന്‍ എന്നിവര്‍ ഈ ചിത്രത്തിലെ പ്ലസ്സുകളാണ്. രേവതിയില്‍ നിന്ന് കമ്മീഷന്‍ നേടാനുള്ള മാര്‍ഗ്ഗം തിലകന്‍ പറഞ്ഞു കൊടുക്കുന്ന രംഗം, മാമുക്കോയയും മറ്റും ടിപ്പ് കൊടുത്ത് ജെപിയെയും മറ്റും ഗോള്‍ഡന്‍ പാപ്പിയുടെ ഡീലില്‍ നിന്ന് പിന്മാറ്റാന്‍ ശ്രമിക്കുന്ന സീന്‍ , ജെപിയുടെ സഹോദരിയുടെ വിവാഹ നിശ്ചയ ചടങ്ങ് , ജെപി അച്യുതമേനോനോട്(തിലകന്‍) 'ഇത്രയും നാള്‍ എവിടെയായിരുന്നു താങ്കള്‍' എന്ന് ചോദിക്കുന്നതും അതിന് മറുപടിയായി തിലകന്റെ പൊട്ടിച്ചിരിയും അതുപോലെ ചില രസകരമായ ഡയലോഗുകള്‍ വരുന്ന ഓര്‍മ്മയില്‍ നില്‍ക്കുന്ന ഓര്‍ത്ത് ചിരിക്കാവുന്ന ചിന്തിപ്പിക്കുന്ന കുറേയധികം നല്ല രംഗങ്ങള്‍ നമുക്കായി സംവിധായകനും അഭിനേതാക്കളും ഒരുക്കിയിട്ടുണ്ട്.

ചിത്രം റിലീസ് ചെയ്യുന്നതിന് മുമ്പ് ഇതൊരു രഞ്ജിത്ത് ചിത്രമാണെന്ന് സംവിധായകന്‍ പറയുകയുണ്ടായി എന്നാല്‍ ഞാനതിനെ ഇങ്ങനെ തിരുത്തുവാന്‍ ആഗ്രഹിക്കുന്നു

ഇതൊരു പൃഥ്വി ചിത്രമാണ്, ടിനിടോമിന്റെ ചിത്രമാണ്, തിലകന്റെ ചിത്രമാണ്, ജഗതിയുടെ ചിത്രമാണ്. എവിടെയോ വായിച്ചത് പോലെ ഒരു ത്രില്ലറെന്ന തോന്നലുണ്ടായില്ലെങ്കിലും (കഥയും കാര്യങ്ങളുമെല്ലാം നേരത്തെ അറിഞ്ഞത് കൊണ്ടാകാം) കൊടുക്കുന്ന കാശ് മൊതലായി എന്ന തോന്നല്‍ നമുക്കുണ്ടാക്കുന്ന ഒരു രഞ്ജിത്ത് & ക്രൂ ചിത്രം.

എന്തിനീ രണ്ടാം യുപിഎ സര്‍ക്കാര്‍

2011-08-18T00:59:00.001-07:00

യുപിഎ സര്‍ക്കാരിന്റെ കടുത്ത ആരാധകര്‍ പോലും ചോദിച്ചു പോകാവുന്നൊരു ചോദ്യമാണ് - "എന്തിനീ രണ്ടാം യുപിഎ സര്‍ക്കാര്‍". ഒന്നാം യുപിഎ സര്‍ക്കാരിന്റെ തമ്മില്‍ ഭേദമായ ഭരണത്താല്‍ ജനങ്ങള്‍ അധികാരത്തിലേക്ക് വീണ്ടും വോട്ട് ചെയ്തു കയറ്റിയപ്പോള്‍ ഏറെ പ്രതീക്ഷയായിരുന്നു ഈ സര്‍ക്കാരിനെക്കുറിച്ച്. തങ്ങള്‍ ചെയ്ത പദ്ധതികളാലല്ല മറിച്ച് ചെയ്തു കൂട്ടിയ അഴിമതിയുടെയും പുറത്തുപോയ മന്ത്രിമാരുടെയും പേരിലാണ് ഇന്നീ സര്‍ക്കാര്‍ കൂടുതല്‍ ശ്രദ്ധേയം എന്നതാണ് സത്യം.

ഞാന്‍ അണ്ണാഹസാരെയുടെ ആരാധകനല്ല. അദ്ദേഹം തയ്യാറാക്കിയ ലോക്പാല്‍ ബില്ല് എന്താണെന്ന് വായിച്ചു നോക്കിയിട്ടുമില്ല. അദ്ദേഹം ചെയ്യുന്നത് ശരിയോ തെറ്റോ എന്ന് അഭിപ്രായം പറയുവാനും എനിക്കിപ്പോള്‍ കഴിയുമെന്ന് തോന്നുന്നില്ല. പക്ഷേ ഒരു കാര്യം എനിക്കും ഇടക്ക് തോന്നിപ്പോകാറുണ്ട് ഈ സര്‍ക്കാര്‍ എന്തേ ഇങ്ങനെയായിപ്പോയി എന്ന്.

തീവ്രവാദികള്‍ക്കെതിരെയും നക്സലുകള്‍ക്കെതിരെയും നടപടിയെടുക്കുന്നതിന് മുമ്പ് ഒന്നു മടിച്ചു നില്‍ക്കുകയും ചിലപ്പോള്‍ നടപടിത്തന്നെ വേണ്ടെന്ന് വയ്ക്കുകയും ചെയ്യുന്ന സര്‍ക്കാരിന് അണ്ണയുടെ ഈ ജനകീയ സമരത്തിനെതിരെ ആഞ്ഞടിക്കുവാന്‍ ഒരു മടിയും തോന്നിയില്ലല്ലോ. പാക്കിസ്ഥാന്‍ വിദേശകാര്യ മന്ത്രി വന്ന് വിഘടനവാദികളോട് ചര്‍ച്ച നടത്തി കൈക്കൊടുത്തു മടങ്ങിയപ്പോള്‍ മന്ത്രിയുടെ സൌന്ദര്യത്തില്‍ മതിമറന്നിരുന്ന സര്‍ക്കാര്‍ അവരുടെ ഈ നടപടിയെ ഒന്നു വിമര്‍ശിക്കുക പോലുമുണ്ടായില്ല. രാജ്യത്തിനെതിരെ ശബ്ദിക്കുന്നവനെ വെറുതേ വിട്ടാലും ശരി ഭരണകൂടത്തിനെതിരെ ശബ്ദിച്ചാല്‍ നടപടി എന്നതാണോ ഈ സര്‍ക്കാര്‍ ഇതിലൂടെ വ്യക്തമാക്കുന്നത്. ജനകീയ സമരങ്ങളെ അടിച്ചമര്‍ത്താന്‍ ചൈന കാണിച്ചിരുന്ന ഉത്സാഹമാണ് ഇന്ന് ഇന്ത്യയും കാണിക്കുന്നത്.

സിറിയയിലെയും ബഹറിനിലെയും ലിബിയയിലെയും പോലെ സായുധ വിപ്ലവമല്ല അണ്ണയുടെ സമരം. ഇതൊരിക്കലും ആ ഒരു തലത്തിലേക്ക് പോകുമെന്ന് കരുതുന്നുമില്ല. ഈ സമരത്തിന് അങ്ങനെയൊരു മുഖം വരുകയാണെങ്കില്‍ തന്നെ ഇന്ന് അണ്ണയെയും ടീമിനെയും പിന്തുണയ്ക്കുന്ന ജനങ്ങളില്‍ പലരും ഈ പിന്തുണ പിന്‍വലിക്കുമെന്നതും തീര്‍ച്ച.

ലോക്പാല്‍ ബില്ല് പാസ്സാവണമെന്ന് പാര്‍ട്ടിഭേതമന്യേ ഒരു രാഷ്ട്രീയക്കാരനും ആഗ്രഹമില്ലെന്നുള്ളതാണ് സത്യം. മടിച്ച് മടിച്ച് പിന്തുണ നല്‍കുന്ന പല പാര്‍ട്ടികളും അണ്ണ ഹസാരെ കൊണ്ടുവന്ന ലോക്പാല്‍ ബില്ല് പാര്‍ലമെന്റില്‍ വന്നാല്‍ എതിര്‍ത്തു വോട്ട് ചെയ്യുമെന്നുള്ളതാണ് സത്യം. ആ സത്യാവസ്ഥ വ്യക്തമായി അറിയാവുന്നത് കൊണ്ടാണ് കോണ്‍ഗ്രസ്സും ഇങ്ങനെയൊരു നാടകത്തിന് മുതിരുന്നതെന്ന് കരുതേണ്ടിയിരിക്കുന്നു. ശക്തമായൊരു പ്രതിപക്ഷമില്ലാത്തത് ഈ സര്‍ക്കാരിന് അപാരമായ ധൈര്യം തന്നെയാണ് നല്‍കുന്നത്.

പ്രധാന പ്രതിപക്ഷമായ ബിജെപി ആര് നയിക്കണം , എന്ത് ചെയ്യണമെന്നറിയാതെ വലയുകയാണ്. ഒരു മികച്ച നേതാവിനെ കണ്ടെത്താനാവാതെ കഷ്ടപ്പെടുന്ന പാര്‍ട്ടിക്ക് അവരുടെ ഉള്ളിലെ പ്രശ്നങ്ങള്‍ തന്നെ പരിഹരിക്കാന്‍ സമയമില്ലാതിരിക്കുമ്പോള്‍ എങ്ങനെ ഭരണപക്ഷത്തെ അടിക്കാന്‍ സമയം കിട്ടും.

പിന്നെയുള്ളത് കൊല്ലങ്ങളോളം അവര്‍ ഭരിച്ചിരുന്ന സംസ്ഥാനത്ത് തോറ്റ്. തോറ്റതിന്റെ പിറ്റേന്ന് മുതല്‍ ബംഗാള്‍ നശിക്കുകയാണെന്നും ബംഗാളികളെ രക്ഷിക്കാനായി കേരളത്തില്‍ ബക്കറ്റ് പിരിവു നടത്തുന്ന സഖാക്കന്മാരുടെ പാര്‍ട്ടിയാണ്. ദേശീയ തലത്തില്‍ ഇനിയും ഒരു ശക്തിയായി ഉയരാന്‍ പ്രാപ്തരാണെന്ന് മുഴുവനായി തെളിയിക്കുവാന്‍ സാധിച്ചിട്ടില്ലാത്ത ഇവരിലും ജനത്തിന് പ്രതീക്ഷയില്ല.

ഫലം വേറെയൊന്നുമല്ല, അടുത്ത പൊതു തിരഞ്ഞെടുപ്പില്‍ രാഹുല്‍ ഗാന്ധിയെ പ്രധാനമന്ത്രി സ്ഥാനത്തേക്ക് ഉയര്‍ത്തിക്കാട്ടുകയും നവീന്‍ ജിന്‍ഡാല്‍, സച്ചിന്‍ പൈലറ്റ് ജ്യോതിരാദിത്യ സിന്ധ്യ തുടങ്ങിയ ചെറുപ്പക്കാരുടെ നിരത്തുകയും ചെയ്യുന്ന കോണ്‍ഗ്രസ്സിനെ കണ്ട് വീണ്ടും പ്രതീക്ഷയോടെ ജനങ്ങള്‍ കൈപ്പത്തി ചിഹ്നത്തില്‍ വോട്ട് രേഖപ്പെടുത്തുന്നത് നാം കാണേണ്ടി വരും.

മന്ത്രിസഭയില്‍ അംഗമായി ചുമതലകള്‍ ഏറ്റെടുത്ത് മികച്ചൊരു ഭരണകര്‍ത്താവെന്ന് തെളിയിക്കുവാന്‍ മന്‍മോഹന്‍ സിംഗ് രാഹുല്‍ഗാന്ധിക്ക് നല്‍കിയ അവസരം വേണ്ടെന്ന് വെച്ച രാഹുലിനെ പ്രധാനമന്ത്രിയായി ഉയര്‍ത്തരുതെന്നാണ് എന്റെ വ്യക്തിപരമായ അഭിപ്രായം. മികച്ചൊരു ധനമന്ത്രി എന്നതായിരുന്നു പ്രധാനമന്ത്രിയാവുന്നതിന് മന്‍മോഹന്‍ സിംഗിന്റെ ചവിട്ടുപടി. അതുപോലെ മന്ത്രിസഭയില്‍ അംഗമായി കഴിവു തെളിയിച്ചതിന് ശേഷം പ്രധാനമന്ത്രിക്കുപ്പായം ഇടുന്നതല്ലേ രാഹുലിന് രാജ്യത്തിനും ഗുണകരം?

കോണ്‍ഗ്രസ്സ് ഒരു കാര്യം മനസ്സിലാക്കണം നിങ്ങളുടെ രണ്ടാം യുപിഎ സര്‍ക്കാരിന്റെ ഇത്രയും മോശമായ പ്രകടനത്തിന് ശേഷവും നിങ്ങള്‍ ജയിക്കുന്നുവെങ്കില്‍ അത് രാഹുല്‍ ഗാന്ധിയിലെ യുവ രാഷ്ട്രീയക്കാരനില്‍ പ്രതീക്ഷ(വ്യര്‍ത്ഥമായ) അര്‍പ്പിച്ച് ജനങ്ങള്‍ വോട്ട് ചെയ്യുന്നത് കൊണ്ട് മാത്രമല്ല മികച്ചൊരു പ്രതിപക്ഷമില്ലാത്തത് കൊണ്ടും കൂടിയാണ്.

കൊതിയൂറും സാള്‍ട്ട് & പെപ്പര്‍

2011-08-04T03:30:00.000-07:00

സാള്‍ട്ട് & പെപ്പര്‍ എന്ന ചിത്രത്തെക്കുറിച്ച് ഇതില്‍ വളരെ കുറച്ചേ പറയുന്നുള്ളു എന്ന് ആദ്യമേ സൂചിപ്പിക്കുന്നു.........

വര്‍ഷമൊന്നാകുന്നു(ഒരു മാസം കുറവ്) കോയമ്പത്തൂരിലേക്ക് പറിച്ച് നടപ്പെട്ടിട്ടു. ഇത്രയേറെ തിയേറ്ററുകളുള്ള ഒരു നാട്ടില്‍ വന്നിട്ട് ഒറ്റ സിനിമപോലും തിയേറ്ററില്‍ പോയി കാണാന്‍ സാധിച്ചിട്ടില്ല എന്നതാണ് സത്യം. വിരലിലെണ്ണാവുന്ന വീക്കെന്‍ഡുകള്‍ മാത്രമേ ഞാനീ കോയമ്പത്തൂരില്‍ ചിലവഴിച്ചിട്ടുള്ളു. അതിലും പലത് ഉറങ്ങിയും വായിച്ചും തീര്‍ത്തവ. ബാക്കിയുള്ളവയെല്ലാം ഞാന്‍ നാട്ടിലായിരിക്കും. ഹോം സിക്കനസ് ആണെന്ന് പറയാന്‍ പറ്റില്ല കാരണം നാട്ടിലെത്തിയാലും വീട്ടിലിരിക്കുന്നത് അപൂര്‍വ്വമാണ്. ഇതിന് മുമ്പ് ഇവിടെനിന്നൊരു സിനിമ കാണാനുള്ള ശ്രമം (കോ) എന്റെയൊരു സുഹൃത്തിന്റെ സഹായസഹകരണം കൊണ്ട് ഞാന്‍ ഒന്നര മണിക്കൂര്‍ ഗാന്ധിപുരത്ത് പോസ്റ്റ് ആയി എന്നതല്ലാതെ തിയേറ്ററിന്റെ പടിക്കല്‍ പോലും എത്തിയില്ല.

പോസ്റ്ററുകളുടെ അട്രാക്ഷന്‍ കാരണം കാണണം കാണണം എന്ന് കരുതിയിരുന്ന ചിത്രമായിരുന്നു സാള്‍ട്ട് & പെപ്പര്‍ പക്ഷേ പടം കോയമ്പത്തൂര്‍ റിലീസ് വൈകിയാണെന്നറിഞ്ഞു. പിന്നെ ഓഫീസ് തിരക്കിലും മറ്റുമായി സംഭവം മറന്നും പോയി. തിങ്കളാഴ്ച പതിവുപോലെ ട്വിറ്ററില്‍ വിരാജിച്ചു കൊണ്ടിരുന്നപ്പോളാണ് കോയമ്പത്തുരിലുള്ള ഒരു ട്വിറ്റര്‍ സുഹൃത്തില്‍ നിന്നറിഞ്ഞത് (@EndsPick) പടം ഇവിടെയെത്തീട്ടുണ്ടെന്ന്.

ഷമ്മയോട് (കോ കാണാമെന്ന് പറഞ്ഞ് പറ്റിച്ച കോ(പ്പന്‍)ളീഗ്) കാര്യം അവതരിപ്പിച്ചപ്പോള്‍ പോകാമെന്ന തീരുമാനമായി. എല്ലാവര്‍ക്കും സൌകര്യമുള്ള തീയ്യതിയായത് കൊണ്ട് പടം കാണാന്‍ ബുധനാഴ്ച പോകാമെന്ന് ഉറപ്പാക്കി.

'അല്ല ഈ കര്‍ണ്ണാടിക് തിയേറ്റര്‍ എവിടെയാണ്' സംശയം ഞാന്‍ ഷമ്മയോട് ചോദിച്ചു

'ഡോ, ഒരു വര്‍ഷമായില്ലേടാ താന്‍ ഇവിടെയെത്തീട്ട്, എന്നിട്ടും ഇതുവരെ ഇതൊന്നും മനസ്സിലാക്കിയില്ലേ കഷ്ടം'

'അത് പിന്നെ' മറുപടി പറയാനായി ഞാനൊരുങ്ങി

'ആ അതിന് വല്ലപ്പോഴും ഇവിടെ നിന്നിട്ട് വേണ്ടേ ഇവിടെയൊക്കെ ഒന്നു കറങ്ങാന്‍ തന്നെയൊന്നും പറഞ്ഞിട്ട് കാര്യമില്ല' ഷമ്മ തന്നെ മറുപടി പൂരിപ്പിച്ചു

'നിങ്ങള്‍ വരാമെന്ന് പറഞ്ഞു പറ്റിച്ചാലും സ്ഥലം അറിയാതെ പാടുപെടേണ്ടല്ലോ എന്ന് വിചാരിച്ചാണ് ഞാന്‍ സ്ഥലമെവിടാന്ന് ആദ്യമേ മനസ്സിലാക്കാന്‍ ശ്രമിച്ചേ' ഷമ്മയെ ഞാന്‍ പഴയ കാര്യങ്ങള്‍ ഓര്‍മ്മപെടുത്തി

'ഡോ ഒരു അബദ്ധം ഏത് പോലീസുകാരനും സംഭവിക്കുമെന്നല്ലേ, നിങ്ങളെ ഈ പടം ഞാന്‍ കൊണ്ടു പോയി കാണിക്കും'

ടിക്കറ്റ് ബുക്ക് ചെയ്യാമെന്ന് ഷമ്മ ഏറ്റെങ്കിലും, ഓഫീസില്‍ നിന്നിറങ്ങുമ്പോള്‍ വൈകുമെന്ന കാരണം പറഞ്ഞ് ബുക്കിംഗ് പിറ്റേന്ന് ഓണ്‍ലൈന്‍ വഴി നടത്താമെന്ന തീരുമാനത്തില്‍ നമ്മള്‍ അന്ന് പിരിഞ്ഞു.പിറ്റേന്ന് കാര്യം സൂചിപ്പിച്ചപ്പോള്‍ അവന്‍ കൈമലര്‍ത്തി

'ഡോ അവരുടെ പേയ്മെന്റ് ലിസ്റ്റില്‍ എന്റെ ബാങ്ക് ഇല്ല നിങ്ങള്‍ ബുക്ക് ചെയ്യൂ'

'അതിന് ഇയാളടെ ബാങ്ക് തന്നെയല്ലേ എന്റേതും'

'എന്നാല്‍ നമുക്ക് ശ്രീജിത്തിനോട് പറയാം, ആള്‍ എന്തായാലും റിലീവ് ആവുകയല്ലേ ടിക്കറ്റ് അവന്റെ വക ആയിക്കോട്ടെ'

'ആയിക്കോട്ടെ' എന്ന് പറഞ്ഞ് ഞാന്‍ ശ്രീജിത്തിനെക്കൊണ്ട് അഞ്ചു പേര്‍ക്കുള്ള ടിക്കറ്റ് ബുക്ക് ചെയ്തു. ടിക്കറ്റ് ചാര്‍ജ്ജായ 50 രൂപയും എക്സ്ട്രാ 20 രൂപയും ചേര്‍ത്ത് 70 രൂപ(ആളൊന്നുക്ക്) കൊടുത്തത് നമ്മള്‍ പിരിച്ചു കൊടുക്കുമെന്ന വിശ്വാസത്തിലാണ് ശ്രീ ഇപ്പോഴും ഇരിക്കുന്നത് (പാവം).

അങ്ങനെ പടം കാണുന്ന ദിവസം എത്തി. ടിക്കറ്റ് പ്രിന്റെടുത്തിട്ട് വരുക എന്ന ദൌത്യത്തില്‍ നിന്നും ഷമ്മ ബുദ്ധിപൂര്‍വ്വം ഒഴിവായെങ്കിലും, ട്രാന്‍സ്പോര്‍ട്ടേഷന്‍ വകുപ്പ് പുള്ളിയെത്തന്നെ അടിച്ചേല്‍പ്പിച്ചു നമ്മള്‍. പടത്തിന് പോകാന്‍ കൃത്യം ആറ് മണിക്ക് തന്നെ ഓഫീസിനു മുന്നിലെത്താന്‍ പാകത്തിന് അവന്‍ ഒരു കോള്‍ ടാക്സി അറേഞ്ച് ചെയ്തിട്ടുണ്ടെന്ന് നമ്മളെ അറിയിച്ചു. ഇവിടെ ഓട്ടോ വിളിച്ചു പോകുന്നതിലും ലാഭം ടാക്സി വിളിക്കുന്നതാണ്. പടത്തിന് ഒരു ബില്‍ഡപ്പ് വരുന്നതിനായി ഞാന്‍ പല റിവ്യൂകളിലും, ചിലര്‍ നേരിട്ടും പറഞ്ഞ കാര്യങ്ങള്‍ അവരോടെല്ലാം പറഞ്ഞു കൊണ്ടിരുന്നു 'അതേ ഈ സിനിമ കണ്ടാല്‍ വിശക്കും എന്നാണ് എല്ലാരും പറയുന്നേ...'. പഴയ ഓഫീസില്‍ നിന്ന് പണ്ട് അലിഭായി കാണാനായി ഇരുപതോളം പേരെ കൊണ്ടുപോയതൊക്കെ ഓര്‍മ്മയിലേക്ക് വന്നു ;)

വൈകുന്നേരമായി പറഞ്ഞ സമയത്തിനും പത്തു മിനുട്ട് മുന്നേ ഞാന്‍ ഓഫീസില്‍ നിന്നിറങ്ങി. ആരെയും അവിടെങ്ങും കാണുന്നില്ല. ടാക്സി അറേഞ്ച് ചെയ്തിരിക്കുന്ന ഷമ്മയെ വിളിച്ചു

'ഷമ്മാ നീ എവിടെയാണ്?'

'ഡോ ഞാന്‍ ക്യാന്റീനിലുണ്ടല്ലോ, ചായക്കുടിക്കുകയാണ്'

'വണ്ടി വരാറായി അപ്പോഴാണോ നിങ്ങടെ 'ചായ'കുടി'

'ഇയാളല്ലേ പറഞ്ഞേ ഫിലിം കണ്ടാല്‍ വിശക്കുമെന്ന് അപ്പോള്‍ മുന്‍കരുതലെന്ന നിലക്ക്'

'മതി മതി അത്രേം കരുതിയാല്‍ മതി, ഇയാള്‍ ഇങ്ങോട്ട് വാ, ബാക്കിയുള്ളവരും എത്തീട്ടുണ്ട്' ഞാന്‍ ഷമ്മയോട് പറഞ്ഞു

'ആരെത്തീട്ടെന്താ വണ്ടി മാത്രം എത്തിയില്ലല്ലോ' തിരിഞ്ഞു നോക്കിയപ്പോള്‍ ടീമിലെ പുതുമുഖം പട്ടാമ്പിക്കാരന്‍ ശരത്തിന്റെ മറുപടി

'ഇതും കോ പോലെത്തന്നെയാവുമോ?' ഞാന്‍ ഷമ്മയോട് ചോദിച്ചു

'താനൊന്ന് മിണ്ടാതിരിക്കാമോ?' ഷമ്മ ഫോണില്‍ കോള്‍ടാക്സി സര്‍വ്വീസുകാരെ ഡയല്‍ ചെയ്തു

സമയം ആറ് കഴിഞ്ഞു, മിനുട്ട് സൂചികള്‍ പിന്നെയും മുന്നോട്ട് നീങ്ങുകയാണ്. വിളിക്കുമ്പോള്‍ 'വന്തിട്ടിരുക്കേന്‍' എന്ന മറുപടിയല്ലാതെ ടാക്സി ചേട്ടന്‍ എത്തുന്നില്ല. പറഞ്ഞ സമയം കഴിഞ്ഞു പത്തുമിനുട്ടോളം കഴിഞ്ഞിരിക്കുന്നു. ഇനിയും കാത്തിരുന്നാല്‍ പടം കാണല്ല നടക്കില്ലെന്ന ഉറപ്പായപ്പോള്‍ അവിടെ ഓഫീസ് പരിസരത്തെങ്ങാനും വല്ല കോള്‍ ടാക്സിയും കിടപ്പുണ്ടോന്ന് നോക്കി നമ്മളിറങ്ങി. ഭാഗ്യത്തിന് വണ്ടിക്കിട്ടി കൃത്യസമയത്ത് തന്നെ തിയേറ്ററിലെത്തി. പടം തുടങ്ങി പത്തുമിനുട്ടോളം കഴിഞ്ഞപ്പോള്‍ 'ഞാന്‍ എത്തി' എന്ന് പറഞ്ഞ് ടാക്സി ചേട്ടന്‍ വിളിച്ചു. ചേട്ടനോട് 'സ്മാര്‍ട്ട് ബോയി' എന്ന് പറഞ്ഞു ഷമ്മ ഫോണ്‍ കട്ട് ചെയ്ത് നമ്മള്‍ ശ്രദ്ധ പടത്തിലേക്കാക്കി.

ഇതിത്രയും ആയിട്ട് എന്തേ പടത്തിനെക്കുറിച്ചൊന്നും പറയാത്തെ എന്നാണ് നിങ്ങളുടെ സംശയമെങ്കില്‍ അത് ഞാനായിട്ട് പറയേണ്ടതില്ല. സകല സിനിമാ റിവ്യൂ എഴുതുന്നവരും കൊള്ളാമെന്ന്(മലയാളത്തിലെ അബൂബക്കര്‍ ഒഴികെ) പറഞ്ഞൊരു പടത്തിനെക്കുറിച്ച് ഞാനിനി എന്തോന്ന് പറയാന്‍.

പോസ്റ്ററുകളില്‍ തുടങ്ങി ടൈറ്റില്‍ സോംഗ് മുതല്‍ അവതരണത്തിലും ചിത്രീകരണത്തിലും കഥാപാത്രങ്ങളിലും(ബാബുരാജിന്റെ കാര്യം തന്നെ ഉദാഹരണം) പുതുമ കൊണ്ടുവന്ന ഒരു ചിത്രം ഒരുക്കി നമുക്കായി കാഴ്ച വച്ചിരിക്കുകയാണ് ആഷിക് അബുവും ടീമും. കുറേയേറെ സീനുകള്‍ സിനിമ കണ്ടിറങ്ങിയിട്ടും മനസ്സില്‍തന്നെയുണ്ട്. പ്രധാന നടീ നടന്മാരെല്ലാം അവരുടെ റോളുകളോട് നീതി പുലര്‍ത്തി എന്ന് തന്നെ വേണം പറയാന്‍ . എടുത്തു പറയേണ്ടത് ബാബുരാജ് അവതരിപ്പിക്കുന്ന ബാബു എന്ന വേലക്കാരനെയാണ്. ചില(രണ്ട്) സീനുകളില്‍ മാത്രമേ ഉള്ളുവെങ്കിലും അര്‍ച്ചനാ കവിയും തന്റേ സാന്നിധ്യം ഈ ചിത്രത്തില്‍ അറിയിച്ചിട്ടുണ്ട്.

പക്ഷേ ഇവരിലെല്ലാരെക്കാളും നമ്മളെ ചിത്രത്തോട് അടുപ്പിക്കുന്നത്, അതിലെ ഭക്ഷണങ്ങളാണ് എന്നാണെന്റെ അഭിപ്രായം. ഭക്ഷണവും ഇതിലൊരു കഥാപാത്രമാണ്. ഇതിന് മുമ്പും പല സിനിമകളിലും തീന്‍മേശ സീനുകള്‍ അനവധിയുണ്ടായിട്ടുണ്ട്, പക്ഷേ ഈ സിനിമയിലെ കഥാപാത്രങ്ങള്‍ കഴിക്കുന്ന ആഹാരത്തിന്റെ ഒരു പങ്ക് നമുക്കും കിട്ടിയിരുന്നെങ്കില്‍ എന്ന് തോന്നിപ്പിക്കുന്ന രീതിയില്‍ എടുത്ത ആദ്യ സിനിമയാണ് സാള്‍ട്ട് & പെപ്പര്‍ എന്ന് പറഞ്ഞാല്‍ അതില്‍ ഒട്ടും അതിശയോക്തിയില്ലെന്ന് തന്നെ പറയാം. ഒരു ദോശയുണ്ടാക്കിയ കഥയില്‍ ദോശ മാത്രമല്ല വേറെ പലതും അവര്‍ ഉണ്ടാക്കുന്നുണ്ട്. തുടക്കം മുതല്‍ ഒടുക്കം വരെയില്ലെങ്കിലും മിക്കപ്പോഴും ഏതെങ്കിലും ഒരു ഭക്ഷണവിഭവം സ്ക്രീനിലെത്തുന്ന കഥാപാത്രത്തിനൊപ്പമുണ്ടാകും. അത് കള്ളപ്പത്തിന്റെയോ ഓംലെറ്റിന്റെയോ 'തട്ടില്‍ കുട്ടി ദോശ'യുടെയോ റെയിന്‍ബോ കേക്കിന്റെയോ ചെമ്പല്ലിക്കറി, ഉണ്ണിയപ്പം, പഴംപൊരി അങ്ങനെ പല ഭക്ഷണങ്ങളുടെയും രൂപത്തില്‍ നമ്മെ കൊതിപ്പിച്ചുകൊണ്ടിരിക്കും.

ജീവിക്കുവാനായി ഭക്ഷണം കഴിക്കുന്നവരായാലും, ഭക്ഷണം കഴിക്കാനായി ജീവിക്കുന്നവരായാലും, രണ്ടു മണിക്കൂറില്‍ പറഞ്ഞവസാനിപ്പിക്കുന്ന ഈ ചിത്രത്തെ ഇഷ്ടപ്പെടുമെന്ന കാര്യത്തില്‍ തീര്‍ച്ച.

വാല്‍ക്കഷ്ണം: തട്ടില്‍ കുട്ടി ദോശ കിട്ടുവാന്‍ ഇവിടെ സാധ്യതയില്ലാത്തതിനാല്‍ കൊതി ഒരു മസാലദോശയില്‍ ഒതുക്കേണ്ടി വന്നു നമുക്കെല്ലാവര്‍ക്കും. രണ്ടു മണിക്കൂര്‍ ഇരുന്ന കണ്ട സിനിമക്ക് ആയതിലും ഏറെ പൈസയായി ഇരുപത് മിനുട്ടിരുന്ന കഴിച്ച ഫുഡിന്. വിശന്നത് കൊണ്ടാണോയെന്നറിയില്ല അതൊന്നും ആരും കാര്യമാക്കിയതുമില്ല.

പൊന്നില്‍ തീര്‍ത്ത ഉറുമി

2011-04-10T05:05:00.000-07:00

ചരിത്ര മുഹൂര്‍ത്തങ്ങള്‍ക്ക് സാക്ഷ്യം വഹിക്കാനാവുക എന്നത് ഭാഗ്യമുള്ളൊരു കാര്യമാണ്.
രണ്ടാഴ്ച്ചകള്‍ക്ക് മുന്പ് ഇന്ത്യ ലോക ചാംപ്യന്മാരായത് സാക്ഷ്യം വഹിക്കാനായി. ഇന്നലെ കേരളത്തിന്‍റെ ക്രിക്കറ്റ് ചരിത്രത്തില്‍ മാറ്റം വരുത്താവുന്നൊരു സംഭലത്തിനും സാക്ഷ്യം വഹിക്കുകയുണ്ടായി. മലയാളി താരങ്ങള്‍ വെറും മൂന്ന് പേരാണെങ്കിലും, കേരളത്തിന്‍റെ ടീമെന്ന് പറയാവുന്ന ഒരു ടീം ഐപിഎല്‍ അരങ്ങേറ്റം കുറിച്ചിരിക്കുന്നു, തോല്‍വിയൊടെയാണെങ്കിലും. ഇന്ന് മറ്റൊരു ചരിത്ര സത്യം(?) വീക്ഷിക്കുവാനുമിടയായി. ഉറുമി.........

പിഎസ്സി പരീക്ഷ കഴിഞ്ഞ് തിരിച്ച് വീട്ടിലേക്ക് മടങ്ങുന്നതിനിടയിലാണിന്നലെ പഴയ ഓഫീസിലെ ഒരു
സുഹൃത്തിനെ വഴിയില്‍ വെച്ച് കണ്ടത്. അവന്‍റെയൊപ്പം ഞായറാഴ്ച പടം കാണാനിറങ്ങാമെന്ന്
തീരുമാനിച്ചെങ്കിലും. ഉറക്കത്തെ വെല്ലി രാവിലെ സിനിമക്ക് പോകാനാവുമെന്ന ഉറപ്പ്
തീരെയുണ്ടായിരുന്നില്ല.കൊച്ചിയുടെ തോല്‍വിയും കണ്ട് കിടന്നപ്പോള്‍ പ്രതീക്ഷിച്ച പോലെ രാവിലെ ഏണീറ്റത് വൈകി. 9.30ക്ക് ഉണര്‍ന്ന് മൊബൈല്‍ നോക്കിയപ്പോള്‍ ജുനിലിന്‍റെ മിസ്സ് കോള്‍ . അവര്‍
വെള്ളയന്പലത്തെത്തിയിരിക്കുന്നു. ടിക്കറ്റ് അവരെടുത്തോളാം ഞാന്‍ തിയേറ്ററിലെത്തിയാല്‍ മതിയെന്ന്.

കുളിയും ബ്രേക്ക്ഫാസ്റ്റുമെല്ലാം കഴിഞ്ഞ് വീണ്ടും ജുനിലിനെ ട്രൈ ചെയ്തു. ഉറുമി ഓടുന്ന തിയേറ്ററില്‍
(ഏതാണെന്ന് അറിയില്ല) രണ്ടു ടിക്കറ്റ് മാത്രമേയുള്ളുവെന്നും. അതിനാല്‍ ശ്രീയിലേക്ക് (അവിടെയും ഷോ ഉണ്ടത്രേ) നടക്കുകയാണെന്നവന്‍ പറഞ്ഞു. പടം കാണാന്‍ നമ്മള്‍ രണ്ടുപേരെ കൂടാതെ ലിബിനും ഓസ്റ്റിനും ഉണ്ടെന്ന കാര്യം ജുനില്‍ സൂചിപ്പിച്ചു.

തിയേറ്ററിലെത്തി. സിനിമ തുടങ്ങാന്‍ അരമണിക്കൂറിലധികം ഇനിയുമുണ്ട്. സുഹൃത്തുക്കളെല്ലാം അകത്ത് കയറിയിരിക്കുന്നെന്ന് തോന്നുന്നു. ടിക്കറ്റ് കൊണ്ടറിലൊന്നും വേണ്ടത്ര തിരക്കില്ല. ഈ ഉരുകുന്ന ചൂടത്തും എസി ഓണാക്കാന്‍ മടിക്കുന്ന തിയേറ്ററുകാരെ വെല്ലുവിളിച്ചുകൊണ്ടെന്ന പോലെ കുറച്ചാളുകള്‍ തിയേറ്ററില്‍ ഇരിപ്പുറപ്പിച്ചിട്ടുണ്ട്. പതുക്കെ പതുക്കെ ശ്രീ തിയേറ്റര്‍ നിറയുന്നു. ഏറെ സ്ത്രീപ്രേക്ഷകര്‍ ചിത്രം കാണാന്‍ എത്തിയിട്ടുണ്ട്.

ഒരു പിരീഡ് ചിത്രത്തിനെ പ്രേക്ഷകര്‍ക്കായി അവതരിപ്പിക്കുന്നത് ഏറെ ശ്രമപ്പെട്ട പണിയാണ്.ലഗാനില്‍ അമിതാഭ് ബച്ചന്‍റെ ശബ്ദത്തിലുടെ തുടങ്ങുന്നത് പോലെ, ഇവിടെ കെപിഎസി ലളിതയുടെ ശബ്ദമാണ് നമ്മളെ വരവേല്‍ക്കുന്നത്. അതൊരു പുരുഷ ശബ്ദമായിരുന്നെങ്കില്‍ കുറച്ചു കൂടി മികച്ച് നിന്നേനെയെന്ന് തോന്നി. ഉറുമി എന്നൊരു ചിത്രം സന്തോഷ് ശിവന്‍റെ വിഷ്വല്‍ ട്രീറ്റ്മെന്‍റിന്‍റെ പേരില്‍ നമുക്കെന്നും ഓര്‍മ്മയില്‍ സൂക്ഷിക്കാവുന്ന ചിത്രമാണ്.

ജെനീലിയ, ജഗതി എന്നിവര്‍ അവതരിപ്പിച്ച കഥാപാത്രങ്ങളും ചിറയ്ക്കല്‍ തന്പുരാനെ അവതരിപ്പിച്ച
നടനും ഏറെ മികച്ച് നിന്നു. ബബിളി കാരക്ടറായി മാത്രം നാമെല്ലാം കണ്ടിട്ടുള്ള ജെനീലിയയുടെ
കരിയറിലെ മികച്ചൊരു കഥാപാത്രമാണിതെന്ന് പറയേണ്ടതില്ലല്ലോ. ജഗതിയുടെ സ്ത്രൈണ സ്വഭാവമുള്ള കഥാപാത്രത്തിന്‍റെ അവസാന രംഗങ്ങളിലെ ഭാവമാറ്റം ശരിക്കും ഈ അതുല്യ നടന് മാത്രം കഴിയുന്നതാണ്.

ആര്യ, നിത്യമേനോന്‍ , വാസകോഡ ഗാമയും, അദ്ദേഹത്തിന്‍റെ പുത്രനായി എത്തുന്ന വിദേശികളും.
ചിറക്കല്‍ തന്പുരാന്‍റെ പുത്രനായി എത്തുന്ന അഭിനേതാവ് എല്ലാവരും വളരെ ഭംഗിയായി തന്നെ
അഭിനയിച്ചു എന്ന് പറയണം. ഏറെയൊന്നും ചെയ്യാനില്ലെങ്കിലും വിദ്യാബാലനും,തബുവും(ഒരു പാട്ടില്‍ മാത്രം) ഈ ചിത്രത്തില്‍ തലകാണിക്കുന്നുണ്ട്. ചിത്രത്തിലെ പാട്ടുകളൊക്കെ ഇപ്പോള്‍ത്തന്നെ നമുക്കെല്ലാം സുപരിചിതമായി കഴിഞ്ഞിരിക്കുന്നു.

പൃഥ്വിരാജും പ്രഭുദേവയും അവതരിപ്പിക്കുന്ന കേളു നയനാരും, വവ്വാലിയും ഇനിയും കുറേനാള്‍ നമ്മുടെ
മനസ്സുകളില്‍ തങ്ങുമെന്നത് തീര്‍ച്ച. ഒരു മോഹന്‍ലാല്‍ ആരാധകനായ എനിക്ക്, പൃഥ്വിയുടെ
ഇഷ്ടചിത്രങ്ങള്‍ വര്‍ഗം, വാസ്തവം, ക്ലാസ്മേറ്റ്സ് എന്നിവയാണ്. ആ പട്ടികയിലേക്ക് ഞാന്‍ ഉറുമിയെയും
ചേര്‍ക്കുന്നു.

ഇതുപോലൊരു ചിത്രം നമുക്കിനി കാണുവാന്‍ വര്‍ഷങ്ങള്‍ കാത്തിരിക്കേണ്ടി വന്നേക്കാം, ചിലപ്പോള്‍
കണ്ടെന്ന് തന്നെ വരില്ല. സന്തോഷ് ശിവന്‍ ഒരു മികച്ച ഡയറക്ടറാണെന്ന് പറയനാവില്ലെങ്കിലും ഈ
ചിത്രത്തിലെ ഓരോ ഫ്രെയിമും അദ്ദേഹത്തിന്‍റ പ്രതിഭയെ വിളിച്ചറിയിക്കുന്നതാണ്.

പറങ്കിയായാലും ബ്രിട്ടീഷായാലും ഫ്രഞ്ചായാലും കച്ചവടക്കണ്ണുകളോടെ ഭാരതിലെത്തിയ ഈ
വിദേശീയര്‍ക്കെതിരെ നാട്ടുകാരില്‍ നിന്ന് ചെറുത്ത് നില്പുണ്ടായിട്ടുണ്ടെന്നുള്ളത് സത്യം.
ഈ ചിത്രത്തില്‍ പറഞ്ഞിരിക്കുന്ന ചരിത്രം ശരിയോ തെറ്റോ എന്നെനിക്കറിയില്ല. പക്ഷേ
ഐലന്‍റ്എക്സ്പ്രസ് എന്ന ചിത്രത്തിലൂടെ ശങ്കര്‍ രാമകൃഷ്ണന്‍റെ തിരക്കഥയില്‍ പൂര്‍ത്തിയായ ഈ ചിത്രം മലയാള സിനിമയുടെ ചരിത്രത്തില്‍ ഓര്‍മ്മിക്കപ്പെടും എന്നത് തീര്‍ച്ച.

വാല്‍ : കാര്യമിതൊക്കെയാണെങ്കിലും, രാത്രി ജീവന്‍വയ്ക്കുന്ന നാഗത്തെ കാട്ടിത്തരാമെന്ന് പറഞ്ഞ്
പറ്റിച്ചത് വല്ലാത്തൊരു കഷ്ടമായിപ്പോയി.

കഷ്ണം : ഷോ കഴിഞ്ഞിറങ്ങിയപ്പോള്‍ അടുത്ത ഷോയ്ക്കായി സാമാന്യം നല്ല തിരക്കുണ്ടെന്നുള്ളത്
സന്തോഷം തരുന്നൊരു കാഴ്ച്ചയായിരുന്നു.

തടസ്സങ്ങളില്ലാതെ ട്രാഫിക്

2011-02-26T11:54:00.001-08:00

വെള്ളിയാഴ്ച്ചയുണ്ടായിരുന്ന പരീക്ഷയ്ക്ക് ലീവെടുത്തെത്തിയ ഞാന്‍ പരീക്ഷ കഴിഞ്ഞ് ബാക്കി സമയം, പതിവ് പരിപാടികളായ ചാറ്റ്, ട്വീറ്റ്, ബ്ലോഗ് വായന, കമന്‍റ് എന്നിവയില്‍ ബിസി ആയിരിക്കുന്പോളാണ് ഒരു ചാറ്റ് പോപ് ചെയ്ത വന്നത്....

'നിങ്ങളീ ആഴ്ച്ച വരുന്നുണ്ടെങ്കില്‍ ട്രാഫിക്കിന് പോയാലോ? നിങ്ങളും ഉണ്ടെങ്കില്‍ നമുക്ക് രാവിലത്തെ ഷോക്ക് പോകാം' ചാറ്റിലൂടെ മജോണിന്‍റെ ക്ഷണം.

'പിന്നെന്താ, പോണെന്നുറപ്പാണെങ്കില്‍ നേരത്തെ പറയണം, കുളിക്കണോ വേണ്ടയോന്ന് തീരുമാനിക്കാനുള്ളതാ' തിരിച്ച് ഞാനും പിംഗ് ചെയ്തു.

'കോയന്പത്തൂര്‍ പോയതിന് ശേഷം കുളിയൊന്നുമില്ലേ മനുഷ്യാ'

'അതല്ലടേയ്, നാളെ മുടിവെട്ടിക്കണമെന്ന് വിചാരിച്ചിരുന്നതാ, സിനിമക്ക് പോകുവാണേല്‍ അത് പിന്നെപ്പോളെങ്കിലും ആക്കാം'

'ഉം ഉം, ഞാനിത് നാലാളോട് പറയട്ടേ'

'നീ ആരോട് വേണമെങ്കിലും പറഞ്ഞോ, വേറെ ആരൊക്കെ വരുന്നുണ്ട്' വിഷയം മാറ്റി ഞാന്‍ രക്ഷപ്പെടാനൊരു ചെറിയ ശ്രമം നടത്തി.

'വേറെ എല്ലാവന്മാരും കണ്ടു, ഞാനും സുള്ളനും പിന്നെ ഹൃദയവും കാണും...'

'ആര് നിധീഷോ, അവന്‍ സിനിമയ്ക്കൊക്കെ വരുമോ?' മജോണിന് മറുപടി കേട്ട് ഞാനൊന്ന് ഞെട്ടി.....

'കല്യാണം കഴിഞ്ഞ് സിനിമക്കൊക്കെ പോകാനുള്ളതല്ലേ, അതിന്‍റെ പ്രാക്ടീസാവും' മജോണ്‍ സംഭാഷ്ണത്തിന് മേന്പൊടി ചേര്‍ത്തു

'നീ പ്രോഗ്രാമെന്താണെന്ന് കറക്ടായി വിളിച്ച് പറ, ഞാന്‍ സൈന്‍ഔട്ട് ചെയ്യുകയാ, സിസ്റ്റം തൂങ്ങുന്നു പണ്ടാരം വൈറസുകളെല്ലാം കൂടി ഇത് കുളമാക്കുമെന്നാ തോന്നണേ' ചാറ്റ് വിന്‍ഡോകളിലെ ക്ലോസ് ബട്ടണുകളില്‍ ക്ലിക്കമര്‍ന്നു....

മലയാള സിനിമ പ്രേക്ഷകരില്‍ ഭൂരിഭാഗവും നല്ലതെന്ന് പറഞ്ഞ ട്രാഫിക് എന്ന ചിത്രം എനിക്കിതുവരെ കാണാനായിട്ടില്ല. ഈ വരവിന് ആ കുറവ് നികത്തണമെന്ന് വിചാരിച്ചിരുന്നതാണ്. പഴയ സിനിമാ മേറ്റ് രമേഷന്‍ ചെന്നൈക്ക് കടന്നതിന് ശേഷം സിനിമ കാണല്‍ കുറഞ്ഞിട്ടുണ്ട്.

പിറ്റേന്ന് രാവിലെ(9.30 എന്ന് വായിക്കുക) എണീറ്റ് കുളിയും കാര്യങ്ങളുമെല്ലാം കഴിഞ്ഞ് ആന്‍റിവൈറസും അപ്ഡേറ്റ് ചെയ്തിരിക്കുന്പോള്‍ മജോണിന്‍റെ കോള്‍

'നിന്നെ വിളിക്കണമെന്ന് വിചാരിച്ചതേ ഉള്ളു, ഏതാ തിയേറ്റര്‍ ' മജോണിനോട് ഞാന്‍ ചോദിച്ചു

'ചേട്ടാ ഒരു പ്രശ്നമുണ്ട്, സുള്ളന് രാവിലെ എത്താന്‍ പറ്റുമെന്ന് തോന്നുന്നില്ല, ഇന്ന് ഓഫീസുള്ളതല്ലേ, ഹൃദയവും ഉണ്ടാവില്ലെന്ന് പറഞ്ഞു'

'ഹൃദയത്തിനെന്താ പ്രശ്നം'

'അവനിപ്പോ കിടന്നിട്ടേ ഉണ്ടാവുള്ള രാത്രി മുഴുവന്‍ നീണ്ടു നില്‍ക്കുന്ന ഫോണിന്‍ പരിപാടിയല്ലേ'

'ശരി ശരി, വൈകുന്നേരമായാല്‍ രണ്ടുപേര്‍ക്കും ഓക്കെ ആയിരിക്കുമല്ലോ'

'സുള്ളന്‍ ഓക്കെയായിരിക്കും, പക്ഷേ ഹൃദയം....'

'അവനെന്താ പ്രശ്നം?'

'വൈകുന്നേരം വീണ്ടും, ഫോണിന്‍ പ്രോഗ്രാം തുടങ്ങുമല്ലോ...'

'എന്തുവാടേയ് കല്യാണം ഉറപ്പിച്ചാല്‍ എല്ലാവനും ഇങ്ങനെയാവുമോ?'

'ആരും ഒന്നും പറയേണ്ട, അധികം വൈകാതെ നമ്മളും നിങ്ങളോട് ഈ ചോദ്യം ചോദിക്കുന്നത് കാണാം....' മജോണ്‍ നമുക്കിട്ടൊന്ന് ചാന്പി

'ശരി ശരി, വൈകുന്നേരം കാണാം ' കോള്‍ കട്ട് ചെയ്ത്, ഞാന്‍ വൈറസ് പിടുത്തത്തിലേക്ക് നീങ്ങി.....

ട്രാഫിക്കിനെക്കുറിച്ച് ഞാന്‍ പറയാതെ തന്നെ നിങ്ങള്‍ക്കെല്ലാര്‍ക്കും അറിയാം, നല്ലതും ചീത്തയും(http://malayal.am എന്ന സൈറ്റില്‍ വന്ന റിവ്യൂ) നിങ്ങള്‍ വായിച്ചതാണ്. ബിജെപിയുടെ രക്ഷായാത്ര(ഇപ്പോള്‍ യാത്രകളുടെ സീസണാണല്ലോ) സൃഷ്ടിച്ച ട്രാഫിക്ക് ബ്ലോക്കില്‍ നിന്ന് രക്ഷപ്പെട്ട് തിയേറ്ററിലെ ടിക്കറ്റ് കൌണ്ടറിലെത്തിയ നമ്മള്‍ വ്യത്യസ്തമായ ഒരു സംഭവത്തിന് സാക്ഷ്യം വഹിച്ചു. 'ട്രാഫിക്ക് ഫ്രണ്ടസ്' എന്ന പേരില്‍ രാജേഷ്പിള്ളയുടെ(സംവിധായകന്‍ ) സുഹൃത്തുക്കളുടെ വക രൂപികരിച്ച ഒരു സൌഹൃദ കൂട്ടായമയുടെ വക ട്രാഫിക്കിന്‍റെ 51ാമത് ദിവസത്തിന്‍റെ ആഘോഷ പരിപാടികള്‍ നടക്കുകയായിരുന്നു അവിടെ(രമ്യ-ധന്യ തിയേറ്റര്‍ ).

മലയാള സിനിമയുടെ കാര്‍ണവര്‍ മധു, ഡയറക്ടര്‍ രാജേഷ്പിള്ള, തിരക്കഥാകൃത്ത് സഞ്ജയ്, സംഗീതസംവിധായകന്‍ മെജോ ജോസഫ്-സാംസണ്‍കോട്ടൂര്‍‍ , സിനിമയില്‍ അഭിനയിച്ച ചില സഹനടി-നടന്മാര്‍ക്കും, മറ്റു അണിയറ പ്രവര്‍ത്തകര്‍ക്കുമായി ഒരു സ്വീകരണം(മുന്‍ നിര നടന്മാരാരും ചടങ്ങില്‍ എത്തിയിട്ടില്ലായിരുന്നു). കൂട്ടത്തില്‍ എടുത്ത്ശ്രദ്ധിക്കപ്പെട്ടത് ലിസ്റ്റിന്‍ സ്റ്റീഫന്‍ എന്ന ചെറുപ്പക്കാരനായ ഈ ചിത്രത്തിന്‍റെ പ്രൊഡ്യൂസറെയാണ്. മുപ്പതിന് താഴെ മാത്രം പ്രായം വരുന്ന ഈ ചെറുപ്പക്കാരനാണ് ഈ ചിത്രത്തിന്‍റെ നിര്‍മ്മാതാവെന്ന് വിശ്വസിക്കാന്‍ കഴിഞ്ഞില്ല. ചിത്രത്തില്‍ റഹ്മാനെ കാണിക്കുന്ന ആദ്യ സീനുകളില്‍ അഭിനയിക്കുകയും ചെയ്തിട്ടുണ്ട് ലിസ്റ്റിന്‍ . ലിസ്റ്റിന്‍ പറഞ്ഞത് പോലെ സാധാരണ ഒരു ചിത്രത്തിന്‍റെ പ്രോഡ്യൂസറാണ് ആ ചിത്രത്തിന്‍റെ വിജയം ആഘോഷിക്കാനായി ഇത്തരം ചടങ്ങുകള്‍ സംഘടിപ്പിക്കാറ്. പക്ഷേ ഇവിടെ അവരുടെ സുഹൃത്തുക്കള്‍ അവര്‍ക്കായി ഒരു സ്വീകരണം ഒരുക്കിയിരിക്കുന്നു. അപ്രതീക്ഷിതമായെങ്കിലും എനിക്കും അതില്‍ പങ്കുചേരാനായി എന്നുള്ളതില്‍ സന്തോഷമുണ്ട്.

ഒരു സിനിമ വിജയിക്കുന്നത്, പ്രേക്ഷകരെയും ആ കഥ പറച്ചിലിനൊപ്പം കൊണ്ടു പോകാന്‍ കഴിയുന്പോളാണ്. സ്ക്രീനില്‍ തെളിയുന്ന ചിത്രങ്ങളില്‍ അത്രമാത്രം ലയിച്ചിരുന്ന് കണ്ട ചിത്രങ്ങളാണ് ലഗാനും, ചക്ദേ ഇന്ത്യയുമെല്ലാം. അവയ്ക്കൊപ്പം വയ്ക്കാനാവുമോ എന്നൊരു ചോദ്യം ബാക്കി നില്‍ക്കുന്പോഴും, ഒന്ന് തീര്‍ച്ചയാണ് ദൈനംദിന ജീവിതത്തിലെ ട്രാഫിക്ക് മലയാളികള്‍ക്ക് സുപരിചിതമാണ്. പക്ഷേ മലയാളസിനിമയിലെ ഈ ട്രാഫിക്ക് അവര്‍ക്കെന്നും വ്യത്യസ്തമായിരിക്കും. ഈ ചിത്രത്തിലെ ആക്സിഡന്‍റ് സീനുകള്‍ മാത്രം മതി അത് തെളിയിക്കാന്‍

വാല്‍ : ചിത്രം തുടങ്ങുന്നതിന് മുന്പ് ചാക്കോച്ചന്‍ ഫാന്‍സ് അസോസിയേഷന്‍കാരുടെ ലഡ്ഡുവിതരണം ഉണ്ടായിരുന്നു. അവധി ദിവസമായതോണ്ടായിരിക്കാം ബാല്‍ക്കണി ഹൌസ്ഫുള്ളുമായിരുന്നു......

ഇതൊക്കെയാണെങ്കിലും പറയാതെ വയ്യ, തിരക്കുള്ള കോളനിയിലെ ആളുകളെ ഒഴിപ്പിക്കാനായി കാറിനെക്കാളും വേഗത്തിലോടി വഴി ക്ലിയറാക്കുന്ന ആസിഫ് അലിയുടെ കഥാപാത്രം വിചാരിച്ചിരുന്നേല്‍ ഈ ബുദ്ധിമുട്ടൊന്നുമില്ലാതെ കൊച്ചി ടു പാലക്കാട് ഓടിയെത്താമായിരുന്നില്ലേ എന്നൊരു സംശയം തോന്നും പ്രേക്ഷകര്‍ക്ക് ചില സീനുകള്‍ കാണുന്പോള്‍

ക്കഷ്ണം : സിനിമയില്‍ ഏറ്റവും ഫീല്‍ ചെയ്തത് റെയ്ഹാന്‍റെ അച്ഛനെയും അമ്മയേയും ഓര്‍ത്താണ്. ഒരു മാതാപിതാക്കള്‍ക്കും അങ്ങനൊരു അവസ്ഥയിലൂടെ സഞ്ചരിക്കേണ്ടി വരരുതേയെന്ന പ്രാര്‍ത്ഥനയോടെ നിര്‍ത്തുന്നു.....

ഒരു No പ്രത്യേകിച്ചൊരു മാറ്റവും കൊണ്ടുവരില്ല, എന്നാലൊരു Yes പുതിയൊരു തുടക്കം കുറിച്ചേക്കാം. നാളെ അത് ചരിത്രത്തില്‍ പരാമര്‍ശിക്കപ്പെടേണ്ട ഒന്നായി മാറാം.

നമ്മളെല്ലാരും നല്‍കിയ ഈ യെസ് ഇനിയും ഇത് പോലുള്ള ചിത്രങ്ങളെടുക്കാന്‍ പലരെയും പ്രേരിപ്പിക്കട്ടെ.......

പുതുവര്‍ഷ ചിന്തകള്‍

2011-01-05T21:38:00.001-08:00

ലക്ഷങ്ങള്‍ ചിലവാക്കി ചാന്ദ്രയാനും മറ്റു പരീക്ഷണങ്ങളും നടത്തിയപ്പോള്‍, പലരും പറഞ്ഞു എന്തിനിത്രയും പണം ഇതിനായി ചിലവാക്കുന്നു, അത് പാവങ്ങള്‍ക്ക് ഉപകാരപ്രദമാകുന്ന പദ്ധതികള്‍ക്ക് ഉപയോഗിച്ചൂടെ....
അന്നെനിക്കറിയാമായിരുന്നു ശാസ്ത്രസാങ്കേതിക രംഗത്ത് ഇന്ത്യയുടെ വളര്‍ച്ചയ്ക്ക് ഇത് അത്യാവശ്യമായിരുന്നു(പാവങ്ങള്‍ക്ക് അനുവദിച്ച പദ്ധതികള്‍ കൈയ്യിട്ടു വാരി തീര്‍ക്കുന്നു, ഇനി ഇതിലും കൂടി കൈയ്യിടണമോ?)

കോമണ്‍വെല്‍ത്ത് ഗെയിംസിനായി ഇത്രയധികം പണം ചിലവാക്കുന്നതിനെ മുന്‍ സ്പോര്‍ട്സ് മന്ത്രി തന്നെ എതിര്‍ത്തപ്പോളും, എന്റെ തോന്നല്‍ ഇന്ത്യയുടെ കായിക വളര്‍ച്ചയ്ക്ക് ഈ കായിക മാമാങ്കം സഹായകരമാകുമെന്ന്(പലരുടെയും വളര്‍ച്ചയ്ക്കൊപ്പം ഇന്ത്യന്‍ കായിക രംഗവും, കോമണ്‍വെല്‍ത്ത് ഗെയിംസോട് കൂടി ചെറുതായി വളര്‍ന്നുവെന്ന് വിശ്വസിക്കുന്നു ഞാന്‍)

പക്ഷേ ഒന്നു മാത്രം എനിക്ക് മനസ്സിലാകുന്നില്ല

അജ്മല്‍ കസബിനായി എന്തിന് ലക്ഷങ്ങളും കോടികളും ചിലവാക്കുന്നു.

മുംബൈ ആക്രമണത്തില്‍, എത്ര തെളിവുകള്‍ കൊടുത്താലും, തെളിവ് പോരാ തെളിവ് പോരാ എന്ന് പറയുന്ന പാക്കിസ്ഥാന്റെ പങ്കു വെളിപ്പെടുത്തുവാനുള്ള ഏക തെളിവാണെന്ന് മാത്രം പറയരുത്....

സംശയം പിന്നെയും ബാക്കി

ഒരു വിമാനറാഞ്ചലിന് കൂടി അവസരം ഉണ്ടാക്കാനോ? അതുവഴി മേജര്‍ രവിക്ക് വീണ്ടും ഒരു 'ക'മാന്‍ഡോ ചിത്രം ഒരുക്കുവാനുള്ള അവസരത്തിനായോ?

തൃശ്ശൂരില്‍ നിന്ന് സ്വന്തം പ്രാഞ്ചിയും പുണ്യാളനും

2010-10-30T11:32:00.000-07:00

കണ്ടും കേട്ടും പറഞ്ഞും നിങ്ങളിത് കുറേ കേട്ടതാണെങ്കിലും, എന്താണെന്നറിയില്ല, പടം കണ്ട ശേഷം എന്റെ വകയും ഒന്നാവാന്ന് ഭയങ്കര പൂതി. എന്നാല്‍ പിന്നെ എങ്ങനാ തൊടങ്ങല്ലേ പ്രാഞ്ചിയുടെ വിശേഷം.

പൊതുവേ മമ്മൂട്ടി പടങ്ങള്‍ തിയേറ്ററില്‍ പോയി കാണുന്ന പതിവ് എനിക്ക് കുറവാണ് . ഇത് പിന്നെകാണാനുള്ള കാരണം എന്താച്ചാല്‍ , ഒന്ന് പൂനെയില്‍ നിന്ന് നാട്ടിലെത്തിയ ഷംനാറുമൊത്ത് ഫിലിം കാണുക(അതും തമാശ പടം) എന്നതിന്റെ ഒരു രസം. പിന്നെ മ്മടെ തൃശ്ശൂര് ഭാഷയില്‍ മമ്മൂട്ടിയങ്ങ് കാച്ചുകയാണെന്ന് പരക്കെയുള്ള റിപ്പോര്‍ട്ട്. തൃശ്ശൂരിനോട് എന്താണെന്നറിയില്ല, ഭയങ്കര ഒരു ഇതാണ്. അതിപ്പോ തൃശ്ശൂര്‍ റൌണ്ടായാലും, വടക്കുന്നാഥന്‍ ക്ഷേത്രമായാലും
ഒറ്റ തവണ കണ്ട പൂരമാണോ, അതോ അവിടത്തെ ക്ടാങ്ങളയാലും ശരി, ആ ഒരിതുണ്ടല്ലോ, അത് വല്ലാത്തൊന്നാണ്. അതോ തൂവാനത്തുമ്പികളിലൂടെ "നമുക്കൊരു നാരങ്ങാ വെള്ളമായാലോ, ഐസിട്ട് " എന്ന് ലാലേട്ടന്‍ പറയണ കേട്ടത് മുതലുള്ള ഇഷ്ടാണോന്നറിയില്ല. പൂരത്തിനായി തൃശ്ശൂര്‍ക്കാരന്‍ ഷോബിയുടെ വീട്ടില്‍ തങ്ങിയ ആ മൂന്ന് നാളും ദാ ഇന്നും മനസ്സില്‍ മായാതെ കിടക്കുന്നു.

ഒരു പേരിലെന്തിരിക്കുന്നു എന്ന് ഷേക്ക്സ്പിയറിന് പറയാം ചോദിക്കാം, പക്ഷേ അരിപ്രാഞ്ചിക്ക് അതങ്ങട് സമ്മതിച്ച് കൊടുക്കാനാവില്ല. കാരണം ഗുമ്മുള്ള ഒരു പേരിനായുള്ള നെട്ടോട്ടതിനിടയില്‍ സംഭവിച്ച അക്കിടികളല്ലേ മൂപ്പര് ഫ്രാന്‍സിസ് പുണ്യാളനോട് പറയണേ. പള്ളിയില്‍ വെച്ച് അവര്‍

തമ്മില്‍ കാണണ മുതല്‍ മമ്മൂട്ടി തൃശ്ശൂര്‍ സ്ലാംഗില്‍ അങ്ങ് കസറാണ്. സംഭവത്തിന്റെ കളി മുഴുവനും ഡയലോഗിലാണ് അതിന്റെ ക്രഡിറ്റ് ഫുള്ള് രഞ്ജിത്തിനാണ് പക്ഷേ മറന്നുകൂടാത്ത പ്രകടനം മമ്മൂട്ടിയുടെ കൈയ്യില്‍ നിന്നുണ്ട്. ഒന്നിന്ന് പുറകെ ഒന്നന്നായി വരുന്ന ഡയലോഗുകള്‍ കേട്ട്

മാലപ്പടക്കത്തിന് തിരികൊളുത്തിയ പോലെ ചിരിക്കുന്ന ഷംനാറിനെ (അവനെ നമ്മള്‍ ചിരിക്കുടുക്കയെന്നാണ് വിളിക്കാറ്) മുന്നിലിരുന്ന ഫാമിലി ഇടയ്ക്കിടയ്ക്ക് തിരിഞ്ഞ് നോക്കുന്നുണ്ടായിരുന്നു.

രാജമാണിക്യമെന്ന ചിത്രത്തില്‍ മമ്മൂട്ടി ഇതിന് മുമ്പ് ഈ കളി കളിച്ചിട്ടുണ്ട്, പക്ഷേ അന്ന് പുള്ളി ഒറ്റയ്ക്കായിരുന്നു, പക്ഷേ രഞ്ജിത്തിന്റെ പടത്തില്‍ സ്ക്രീനില്‍ വരുന്ന ഓരോരുത്തരും പറയണത് നല്ല കിണ്ണംകാച്ചിയ തൃശ്ശൂര്‍ ഭാഷയാണ്. അത് തന്നെയാണ് ചിത്രത്തിന്റെ വിജയമെന്നും പറയാം.

ഇന്നസെന്റും പ്രിയാമണിയും സിദ്ദിക്കും ഖുശ്ബുവും ടിനിടോമും,ഗണപതിയും പിന്നെ അങ്ങനെയങ്ങനെ കുറെയധികം ആര്‍ടിസ്റ്റുകളഭിനയിക്കുന്ന ഈ ചിത്രം രണ്ടാം പകുതിയില്‍ എന്തോ ഒന്ന് മിസ്സ് ചെയ്യണ ഫീലിംഗ്സ് ഉണ്ടാക്കുന്നുണ്ടെങ്കിലും, മോശം പറയാനാവാത്ത ഒരു ചിത്രം.

പല ഡയലോഗും ഇവിടെ പറയണമെന്നുണ്ടെങ്കിലും, അതിന്റെ ആ സുഖം അനുഭവിക്കണമെങ്കില്‍ നിങ്ങള്‍ അത് രഞ്ജിത്ത് രചിച്ച്, മമ്മൂട്ടിയുടെ തൃശ്ശൂര്‍ സ്ലാംഗില്‍ തന്നെ കേള്‍ക്കണം.

ജോലിത്തിരിക്കില്‍ നിന്നും മറ്റും ഒന്ന് റിലാക്സ് ചെയ്യാന്‍ പ്ലാനുള്ളവര്‍ക്ക് നല്ല ഡീസന്റായി ചിരിച്ച് മറിഞ്ഞ് രണ്ട് രണ്ടര മണിക്കൂറ് ടിമ്മീന്ന് പറഞ്ഞ് കളയാനുള്ള ബെസ്റ്റ് വഴിയാണ് രഞ്ജിത്തിന്റെ പ്രാഞ്ചിയേട്ടന്‍ & ദി സെയിന്റ്.

മമ്മൂട്ടിയെന്ന നടന്റെ മികച്ച വേഷങ്ങളെന്ന്(മുഖ്യധാരാ ചിത്രങ്ങളില്‍) എനിയ്ക്ക് തോന്നിയ ചുരുക്കം ചില ചിത്രങ്ങളെയുള്ളു(ഹിറ്റ്ലര്‍ , അമരം,മൃഗയ) (മനസ്സില്‍ തോന്നിയ ഒന്നുരണ്ടെണ്ണം പറഞ്ഞുവെന്നേയുള്ളു) അതിന്റെയൊപ്പം കണ്ണുമടച്ച് ഞാന്‍ പ്രാഞ്ചിയേട്ടനെയും ഉള്‍പ്പെടുത്തും.

മമ്മൂട്ടി ചിത്രമല്ലേ, റിവ്യൂവിന്റെ ആവശ്യമൊന്നുമില്ല എന്ന് കട്ട(കടുത്ത) ലാല്‍ ഫാനായ മനസ്സ് പറഞ്ഞെങ്കിലും, ഓരോ ദിവസവും, അന്നാ തിയ്യേറ്ററിലിരുന്ന ചിരിച്ച നിമിഷങ്ങള്‍ ഓര്‍മ്മ വരുമ്പോള്‍, ഇത്രയെങ്കിലും ഇവിടെ വന്ന് പറഞ്ഞില്ലെങ്കില്‍, അത് ഞാന്‍ എന്നോട് തന്നെ ചെയ്യുന്ന ചതിയായിരിക്കും. അതോണ്ട് മാത്രം പറയുന്നു.

'ഗഡി കിണ്ണംകാച്ചീട്ടാ..... '

വാല്‍ക്കഷ്ണം:ഷംനാറുമായി(അവനെ പരിചയമുള്ളവര്‍) സിനിമ കാണാന്‍ ഒരു ചാന്‍സ് കിട്ടിയാല്‍ മിസ്സാക്കരുത്(ചിരിക്കാന്‍ വകയുള്ള സിനിമികള്‍). ഞാനീ പറയുന്നത് ടിക്കറ്റിന്റെ പൈസ അവന്‍ കൊടുക്കുമെന്നുള്ളത് കൊണ്ട് മാത്രമല്ല..............................

എല്‍സമ്മ : ബാലന്‍പിള്ള സിറ്റിയിലെ ആണ്‍കുട്ടി

2010-09-25T22:02:00.000-07:00

വീക്കെന്‍ഡാവുമ്പോള്‍ നാട്ടിലേക്കോടാനുള്ള വെമ്പലാണ് മനസ്സില്‍. കോയമ്പത്തൂരുള്ള കൂട്ടുകാര്‍ ചോദിച്ചാല്‍ വീട്ടില്‍ പോണമെന്ന് പറയുമെങ്കിലും, നാട്ടിലെത്തിയാല്‍ വീട്ടിലിരിക്കുന്നത് ചുരുക്കം ചില അവസരങ്ങളില്‍ മാത്രമാണ്.

നാട്ടിലേക്കുള്ള ഈ വരവ് എല്‍സമ്മയോടൊപ്പം ചെലവഴിക്കുവാനുള്ള തീരുമാനത്തിന് പ്രധാനകാരണം ലാല്‍ജോസ് എന്ന സംവിധായകന്‍ തന്നെയാണ്. പിന്നെ ടിവിയിലും മറ്റും കണ്ട പടത്തിന്റെ ട്രെയിലറുകളും.

ഒരു ലാല്‍ജോസ് ചിത്രം റിലീസ് ആവുന്നു എന്ന് കേള്‍ക്കുമ്പോള്‍ ഞാനാദ്യം ശ്രദ്ധിക്കുന്നത് അതിന്റെ ടൈറ്റില്‍ എഴുതുന്ന രീതിയെയാണ്. ഇത് വരെയുള്ള എല്ലാ ചിത്രങ്ങളുടെ ടൈറ്റിലിലും ആ ലാല്‍ജോസ് ടച്ച് നമ്മള്‍ കണ്ടിട്ടുണ്ട്.

എല്‍സമ്മയുടെ ജീവിതരീതി ഒരു ഗാനത്തിലൂടെ പരിചയപ്പെടുത്തിക്കൊണ്ട് തുടങ്ങുന്ന ചിത്രം, ഈയടുത്തിറങ്ങിയ ശിക്കാറിനെപ്പോലെത്തന്നെ

ഇടുക്കിയുടെ പ്രകൃതിഭംഗി നമുക്കായി വീണ്ടും കാട്ടിത്തരുന്നുണ്ട്. ബാലന്‍പിള്ള സിറ്റിയെന്ന മലയോര ഗ്രാമം, ശിക്കാറിലെ ചിറ്റാഴ പോലെത്തന്നെ ഒരിക്കലെങ്കിലും സന്ദര്‍ശിക്കേണ്ട സ്ഥലമെന്ന തോന്നല്‍ നമ്മിലുളവാക്കുന്നതാണ്. മലയാള സിനിമയ്ക്ക് ഇപ്പോള്‍ കഥയും തിരക്കഥയും തിരഞ്ഞെടുക്കുന്നതില്‍ തെറ്റിയാലും ലൊക്കേഷന്‍ സെലക്ഷനില്‍ നൂറില്‍ നൂറാണ് മാര്‍ക്ക്.

ആന്‍ അഗസ്റ്റിന്‍ എന്ന പുതുമ താരം അവതരിച്ച, ഇത്തിരി പത്രംവിതരണം,ഇത്തിരി ലോക്കല്‍ റിപ്പോര്‍ട്ടിംഗ്, ഇത്തിരി സാമൂഹ്യപ്രവര്‍ത്തനം ഇതെല്ലാം കൈവശമുള്ള എല്‍സമ്മയെന്ന കേന്ദ്രകഥാപാത്രമുള്‍പ്പടെ മനസ്സില്‍ തങ്ങി നില്‍ക്കുന്ന ഒരു പിടി കഥാപാത്രങ്ങളെ നമുക്ക് ബാലന്‍പിള്ള സിറ്റിയില്‍ കാണാം.

എല്‍സമ്മയെ ആശ്രയിച്ച് ഒരു കുടുംബം മാത്രമല്ല, ഒരു ഗ്രാമം തന്നെയുണ്ടെന്ന് ചിത്രം നീങ്ങിത്തുടങ്ങുമ്പോള്‍ നമുക്ക് മനസ്സിലാവും. എല്‍സമ്മയായി ആന്‍ നല്ല പ്രകടനമാണ് കാഴ്ച്ച വച്ചിരിക്കുന്നത്. ചിലയിടങ്ങളില്‍ ഡബ്ബിംഗില്‍ ചേര്‍ച്ചക്കുറവനുഭവപ്പെടുന്നുണ്ടായിരുന്നു.

എടുത്ത് പറയേണ്ട മറ്റ് രണ്ട് അഭിനേതാക്കള്‍ ഇന്ദ്രജിത്തും കുഞ്ചാക്കോ ബോബ്ബനുമാണ്.

ഇന്ദ്രജിത്ത് എന്ന നടനിലെ കഴിവ് ഇത്തിരിയെങ്കിലും ഉപയോഗിച്ചിട്ടുണ്ടെങ്കില്‍ അത് ലാല്‍ജോസാണെന്ന കാര്യം പറയാതെ വയ്യ. ലാല്‍ജോസ് ചിത്രങ്ങളിലെ അദ്ദേഹത്തിന്റെ കഥാപാത്രങ്ങളെല്ലാം അതിനുദാഹരണമാണ്. കുഞ്ചാക്കോ ബോബനും പാലുണ്ണി എന്ന തന്റെ കഥാപാത്രത്തെ ഭംഗിയാക്കി അവതരിപ്പിച്ചു.

കുറെ നല്ല രംഗങ്ങളും ഓര്‍ത്തിരിക്കാന്‍ ചില നല്ല ഡയലോഗുകളുള്ള(നര്‍മ്മം) ഈ ചിത്രത്തില്‍ ജഗതിയും സുരാജും ബോറാക്കിയില്ല. അത് പോലത്തന്നെ വിജയരാഘവനും, മണിയന്‍പിള്ള രാജുവും, ജനാര്‍ദ്ദനനും, നെടുമുടിവേണുവുമെല്ലാം എല്‍സമ്മയോടൊപ്പം സ്ക്രീനിലെത്തുന്നുണ്ട്.

ഡബ്ബിംഗ് പ്രശ്നവും, സ്ക്രീനിലാകൊയൊരു മങ്ങലും(തിരുവനന്തപുരം ശ്രീപദ്മനാഭയില്‍) അനുഭവപ്പെട്ടെങ്കിലും, മുന്‍പിറങ്ങിയ ലാല്‍ജോസ് ചിത്രങ്ങളുടെ അത്രയുമില്ലെങ്കിലും, സൂപ്പര്‍ താരങ്ങളുടെ റംസാന്‍ റിലീസില്‍ എല്‍സമ്മയും ഒരു പിടി പിടിക്കും. ഇന്നത്തെ മാറ്റിനിക്ക് ലേഡീസും
ഫാമിലിയുമായിരുന്നു കൂടുതലെന്നത് അതിനുള്ളൊരു തെളിവാ.....

ഗ്രാമീണത്തനിമയുള്ള ചിത്രങ്ങളെടുക്കുന്നതില്‍ സത്യന്‍ അന്തിക്കാടിന് പഴയ ടച്ചിപ്പോളില്ലാത്തതിനാല്‍ നമുക്ക് ഇടയ്ക്കെങ്കിലും ഒരു പ്രതീക്ഷ നല്‍കാനായി ലാല്‍ജോസില്‍ നിന്ന് ഇനിയും ഇത് പോലത്തെ ചിത്രങ്ങളുണ്ടാകട്ടെ.....

വാല്‍ക്കഷ്ണം:മലയാള സിനിമാ പ്രേക്ഷകര്‍ക്ക് ഇപ്പോള്‍ ഒരു സിനിമയെക്കുറിച്ചും ഒരു സിംഗിള്‍ ഒപ്പീനിയനില്ലെന്നാണ് തോന്നുന്നത്. മലര്‍വാടി, അപൂര്‍വ്വരാഗം, പ്രാഞ്ചി, ശിക്കാര്‍ എന്നിവ പോലെ എല്‍സമ്മയും മികസഡ് റെസ്പോണ്‍സുമായി മുന്നോട്ട് നീങ്ങുന്നു.......

സിനിമാ ഹണ്ട് : ശിക്കാര്‍

2010-09-10T23:31:00.000-07:00

ജോലി തേടി തിരുവനന്തപുരം നഗരം വിട്ടതിന് ശേഷം, അവധിക്ക് നാട്ടിലേക്കുള്ള മടക്കത്തിന് ശേഷമുള്ള സിനിമാ ഹണ്ടിന്റെ തുടക്കം‍ എല്‍സമ്മ കണ്ടാവണമെന്നായിരുന്നു ആഗ്രഹം, പക്ഷേ ലാലേട്ടന്റെ ശിക്കാര്‍ ആയത് യാദൃശ്ചികം മാത്രം. കൂട്ടുകാരന്റെ കല്യാണസദ്യയിലെ പായസം കുടിക്കുമ്പോഴാണ് സുഹൃത്തിന്റെ കോള്‍. ശിക്കാര്‍ കാണാനുള്ള ക്ഷണവുമായി. ലാലേട്ടന്‍ ഫാന്‍ ആയോണ്ടുള്ളൊരു ഔദാര്യം.

ശ്രീകുമാര്‍/ശ്രീവിശാഖില്‍ നല്ല തിരക്ക്, ഇതിനിടയില്‍ അവര്‍ എങ്ങനെ ടിക്കറ്റെടുക്കുന്ന് സംശയിച്ച് നില്‍ക്കുമ്പോഴാണ് വീണ്ടും കോള്‍, പടം ന്യൂവിലുമുണ്ട്, അങ്ങോട്ടെത്താന്‍. അവിടെ മറ്റ് രണ്ടിടത്തും അപേക്ഷിച്ചുള്ള തിരക്കൊന്നുമില്ല. നഗരത്തിലെ പോസ്റ്ററുകളില്‍ മുഴുവന്‍ വന്ദേമാതരം - ന്യൂ എന്ന് പതിച്ചിരിക്കുന്നതോണ്ടാവുമോ ഈ തിരക്കില്ലായ്മ(ഞാനൊരു ലാല്‍ ഫാനാണേ... :) ).

ചിത്രം കണ്ടിറങ്ങുമ്പോള്‍ മോഹന്‍ലാലിന്റെ ബലരാമനെക്കാള്‍ മനസ്സില്‍ തങ്ങി നിന്നത് സമുതിരകനിയുടെ അബ്ദുള്ളയെന്ന നക്സല്‍ നേതാവാണ്. ചിത്രത്തിലെ മറ്റ് കഥാപാത്രങ്ങളെയപേക്ഷിച്ച് ചുരുക്കം സീനുകളില്‍ മാത്രമേ എത്തുന്നുള്ളുവെങ്കിലും
അബ്ദുള്ളയായി സമുതിരകനിയുടെ പ്രകടനം അവിസ്മരണീയം എന്ന് തന്നെ വിശേഷിപ്പിക്കണം.

ഇത്രയും നല്ല സ്ഥലങ്ങള്‍ നമ്മുടെ നാട്ടിലുണ്ടല്ലേ എന്ന് തോന്നിപ്പിക്കുന്നതാണ് ചിറ്റാഴയുടെ പ്രകൃതിഭംഗി. അത് അതിന്റെതായ ഭംഗിയില്‍ നമ്മളിലെത്തിക്കാന്‍ ക്യാമറ ചലിപ്പിച്ച മനോജ് പിള്ള പ്രത്യേക പരാമര്‍ശം അര്‍ഹിക്കുന്നു. ഇത് ശരിക്കും എവിടെയാ സ്ഥലമെന്നറിയുന്നവര്‍ ഒന്ന് കമന്റ് ചെയ്യണമെന്ന് അഭ്യര്‍ത്ഥിക്കുന്നു....

ലാലേട്ടനെക്കുറിച്ച് പറയേണ്ട കാര്യമില്ല, ഇതിനു മുമ്പും പലപ്പോഴായി പറഞ്ഞിട്ടുള്ളതാണിതൊക്കെ. സ്റ്റണ്ട് രംഗങ്ങളിലെ തന്റെ മെയ്‍വഴക്കം ഇനിയും കൈമോശം വന്നിട്ടില്ലെന്നദ്ദേഹം കാണിച്ചു. സൂപ്പര്‍ താരങ്ങളില്‍ സംഘടന രംഗങ്ങള്‍ കൈകാര്യം ചെയ്യാന്‍ തന്നെ കഴിഞ്ഞേ വേറാരുമുള്ളു എന്ന് അദ്ദേഹം വീണ്ടും കാണിച്ചു. ഭ്രമരത്തിന് ശേഷം ലാലേട്ടന്‍ വീണ്ടും തിളങ്ങി(അത്രേം വരുമോ?)എന്ന പൊതു അഭിപ്രായം നല്‍കുന്ന ചിത്രം. ഇതിനിടയില്‍ ഞാന്‍ ഇവിടം സ്വര്‍ഗ്ഗമാണ് മാത്രമേ

കണ്ടുള്ളു എന്നത് വേറൊരു കാര്യം. ലാലേട്ടനെ ഇണ്ട്രോഡ്യൂസ് ചെയ്യുന്ന സീനിലെ മൂപ്പരുടെ ആ നില്പ് എനിക്ക് വളരെയധികം ഇഷ്ടമായി. അത് പോലെ തന്നെ പാറയിടുക്കുകള്‍ക്കിടയിലൂടെയുള്ള ക്ലൈമാക്സ് രംഗത്തിലെ സ്റ്റണ്ടും എടുത്ത് പറയേണ്ടവയാണ്.

കലാഭവന്‍ മണി, ലാലു അലക്സ്, തലൈവാസല്‍ വിജയ്, അനന്യ, സ്നേഹ, ലക്ഷമി ഗോപാലസ്വാമി, മൈഥിലി, സുരാജ്, ജഗതി, കൈലാഷ്, ബാബുനമ്പൂതിരി, കൊച്ചുപ്രേമന്‍, കണ്ണൂര്‍ ശ്രീലത, രശ്മിബോബന്‍ തുടങ്ങി ഒരു പിടി അഭിനേതാക്കള്‍ ചിത്രത്തില്‍ വന്നു പോകുന്നുണ്ട്.

ഈറ്റ വെട്ടുകാരുടെ കഥയാണെങ്കിലും, ഈറ്റ വെട്ടിന് വല്യ പ്രാമുഖ്യം നല്‍കുന്നതിന് ആരും ശ്രദ്ധ ചെലുത്തിയതായി കണ്ടില്ല. നല്ലൊരു പുഴയയുടെ തീരമായിരുന്നു ലൊക്കേഷനെങ്കിലും, നരന്‍ എന്ന ചിത്രത്തിലെ പോലെ പുഴയെ നല്ലരീതിയിലുപയോഗിക്കാനും സംവിധായകന്‍ ശ്രമിച്ചില്ലെന്ന് വേണം പറയാന്‍(ഈറ്റക്കെട്ടുകള്‍ വെള്ളത്തില്‍ ഒലിച്ച് പോകുന്നതും, ലാലേട്ടന്‍ അത് നീന്തിപിടിച്ച് കരയ്ക്കടുപ്പിക്കുന്നതും etc എടക് ;) )

മൈഥിലി എന്ന നടിയും, സ്വാഭാവികതയില്ലാതെ എങ്ങനേലും പ്രേക്ഷകരെ ചിരിപ്പിക്കുക എന്ന ലക്ഷ്യത്തോടെ തയ്യാറാക്കിയ ഹാസ്യരംഗങ്ങളും, അഞ്ചുമിനുട്ടില്‍ ഒരു ഗാനം എന്ന റേഷിയോയും ഒഴിവാക്കിയിരുന്നെങ്കില്‍ എത്രയോ ഭേദമാകുമായിരുന്ന, ക്യാമറ(മനോജ് പിള്ള),അബ്ദുള്ള(സമുതിരകനി),ബലരാമന്‍(ലാലേട്ടന്‍) എന്നിവരുടെ പ്രകടനം കൊണ്ട് മികച്ചു നില്‍ക്കുന്ന ഒരു തരക്കേടില്ലാത്ത ചിത്രം.(ആകെ കണ്‍ഫ്യൂനായോ? :p)

വാല്‍ക്കഷ്ണം: കേരളത്തിലെ അണ്‍എക്സപ്ലോറ്ഡ് ടൂറിസ്റ്റ് ഡെസ്റ്റിനേഷനായി ചിറ്റാഴ(ഒറിജിനല്‍) മാറട്ടേയെന്ന് പ്രത്യാശിക്കുന്നു. അവിടെ ചെല്ലുമ്പോള്‍ ഇതെല്ലാം ക്യാമറ ടെക്നിക്ക് മാത്രമായിരുന്നു എന്ന് തോന്നിക്കരുതേ.

പറയാന്‍ വിട്ട് പോയ ഒരു കാര്യം, ഇതില്‍ എല്‍ദോ മാഷിന്റെ ഒരു ഡാന്‍സ്/സോംഗ് നമ്പറുമുണ്ട്.......

മനം കവര്‍ന്ന് മലര്‍വാടി

2010-07-18T10:16:00.000-07:00

ലോകകപ്പ് അവസാനിച്ചിന്ന് ഒരാഴ്ചയാകുന്നു. കഴിഞ്ഞൊരു മാസമായി പലകാര്യങ്ങളും മാറ്റി
വച്ച് ടിവി സ്ക്രീനിലേക്ക് കണ്ണും നട്ട്, വുവുസല ശബ്ദവും കേട്ടിരുന്ന എനിക്ക് ജെറ്റ്ലാഗ്
പോലെ വേള്‍ഡ്കപ്പ് ലാഗ് പിടിപെട്ടെന്ന് കൂട്ടുകാരും വീട്ടുകാരും പറഞ്ഞു തുടങ്ങിയിരിക്കുന്നു.
ഒരിടവേളക്ക് ശേഷമുള്ള പുതുതുടക്കത്തിന് ഒരുകൂട്ടം പുതുമുഖങ്ങളുടെ പടമാകാമെന്ന്
കരുതിക്കൂട്ടിയെടുത്ത തീരുമാനമൊന്നുമല്ല.

പതിവ് സിനിമാസഹചാരിയായ രമേഷ് സിനിമയ്ക്ക് പോകാം എന്ന് പറഞ്ഞ് വിളിക്കുമ്പോള്‍
അവന്റെ നാവില്‍ നിന്ന് 'ഒരു നാള്‍ വരും' എന്നത് വരുമെന്ന് തന്നെയായിരുന്നു പ്രതീക്ഷ.
ഇന്‍സെപ്ഷന്‍, അപൂര്‍വ രാഗം, മലര്‍വാടി എന്നിങ്ങനെ ലിസ്റ്റ് നീണ്ടപ്പോള്‍ വിനീത്
ശ്രീനിവാസന്റെ മലര്‍വാടി ആര്‍ട്സ് ക്ലബ്ബിന് പോകാമെന്ന് തീരുമാനമെടുത്തു.
എന്തായാലും അച്ഛന്റെ(ശ്രീനിവാസന്റെ ) മകനല്ലേ.

മഴയ്ക്ക് നന്ദി പറഞ്ഞ് കൊണ്ട്(അധികം ആളുണ്ടാവില്ലല്ലോ തിയേറ്ററില്‍) ന്യൂവില്‍
എത്തിയപ്പോള്‍ ബൈക്ക് പാര്‍ക്കിംഗ് ഷെഡ്ഡും കഴിഞ്ഞ് പുറത്തേക്ക് വ്യാപിച്ചിരിക്കുന്നു.
ബാലക്കണി കൌണ്ടറില്‍ 'ഫുള്‍ ' എന്ന ബോര്‍ഡ് തൂങ്ങിക്കിടക്കുന്നു. സെക്യൂരിറ്റി
ചേട്ടനോട് ബാലക്കണി ടിക്കറ്റുണ്ടാവുമോയെന്ന് അന്വേഷിച്ചു, ക്യാന്‍സലേഷന്‍ കാണും
മുകളിലൊന്ന് ചോദിച്ചു നോക്കൂ എന്ന് ഉടന്‍ വന്നു മറുപടി.....

മഴ കാത്തു. ടിക്കറ്റുണ്ട്. ഏസി ഇടാത്തതിന് തിയേറ്ററുകാരോടും നന്ദി പറഞ്ഞുകൊണ്ട് പേര്
ഓര്‍ത്തുവയ്ക്കാന്‍ കഴിയാത്ത ഒരു പറ്റം പുതുമുഖ താരങ്ങളുടെ സിനിമ കാണുന്നതിലേക്ക്
മുഴുകി. കുറേ നാളുകള്‍ക്ക് ശേഷം തിയേറ്ററില്‍ പോയി കാണുന്ന ഒരു സിനിമയില്‍ മുക്കാല്‍
ഭാഗവും പുതുമുഖങ്ങള്‍ എന്നത് തന്നെ ഈ സിനിമയുടെ വിജയമെന്ന് പറയാം.

അഞ്ച് കൂട്ടുകാരുടെയും അവരെ ഒന്നിപ്പിച്ച ആര്‍ട്സ് ക്ലബ്ബിന്റെയും അതിന് കാരണമായ
കുമാരേട്ടന്‍ എന്ന ചായക്കടക്കാരന്റെയും അവരോട് ബന്ധപ്പെട്ട് കിടക്കുന്ന കുറേ
കഥാപാത്രങ്ങളുടെയും കഥ. വിനീത് ശ്രീനിവാസന്റെ 'മലര്‍വാടി ആര്‍ട്സ് ക്ലബ്ബ് '.

കൂട്ടത്തിലെ നേതാവും, കുറച്ച് കലിപ്പ് കൂടിയതുമായ പ്രകാശന്‍, പക്വതയോടെ പെരുമാറുന്ന
പ്രവീണ്‍, ലുങ്കിമാത്രമുടുത്ത് കാണുന്ന കുട്ടു, എന്റെ ഏതോ കൂട്ടുകാരനോട് സാമ്യം തോന്നുന്ന
പുരുഷു, മികച്ച പാട്ടുകാരനായ സന്തോഷ് എന്നീ പുതുമുഖങ്ങളായ മലര്‍വാടിക്കാരോടൊപ്പം
നമുക്ക് പരിചിതരായ നെടുമുടി വേണുവും, സുരാജ് വെഞ്ഞാറമൂടും, സലീം കുമാറും,
ജഗതിശ്രീകുമാറും, കോട്ടയം നസീറും ജനാര്‍ദ്ദനനും ചിത്രത്തിലുണ്ട്.

ശ്രീനിവാസനെപ്പോലെ തന്നെ സമകാലിക സംഭവങ്ങളെ വിനീതും സിനിമയില്‍ പരാമര്‍ശിക്കുന്നുണ്ട്, ട്രേഡ് യൂണിയന്‍കാരുടെ നോക്കൂകൂലിയ്ക്കും, റിയാലിറ്റി ഷോയ്ക്കുമെല്ലാം വിനീത് ശ്രീനിവാസന്‍ മെല്ലെ കൊട്ടുന്നുണ്ട്. സ്ത്രീകഥാപാത്രങ്ങള്‍ക്ക് മറ്റ് മലയാള സിനിമ പോലെ കാര്യമായൊന്നും ചെയ്യാനില്ലെന്നുള്ളത് പ്രത്യേകം പറയേണ്ടതില്ലല്ലോ.

കുട്ടുവിന്റെ തമാശകളും, പുരുഷു തന്റെ കാമുകിയായ ഗീതുവിനെ ആദ്യമായി കാണുമ്പോളുള്ള
പ്രകടനവുമൊക്കെ മനസ്സില്‍ നില്‍ക്കുന്നു.പല കഥാപാത്രങ്ങളെയും ഇന്‍ട്രോഡ്യൂസ്
ചെയ്യുമ്പോളുള്ള ബാക്ക് ഗ്രൌണ്ട് മ്യൂസിക്കും നന്നായി തോന്നി. പല നല്ല മുഹൂര്‍ത്തങ്ങളുമുള്ള
ഒരു സിനിമ. പല പല ചെറു നമ്പറുകളുമായി വിനീത് ശ്രീനിവാസന്‍ തന്റെ തുടക്കം
മോശമാക്കിയില്ല. പലരും മോശമെന്ന് പറഞ്ഞെങ്കിലും, സിനിമയോടൊപ്പം കണ്ടപ്പോള്‍ ഗാനങ്ങളെക്കുറിച്ചുള്ള മുന്‍വിധി മാറി.

തുടക്കം മോശമായില്ല വിനീതിന്റെയും എന്റെയും(ഒരിടവേളക്ക് ശേഷമുള്ള സിനിമ കാണല്‍).

അവസാനമായി പറയുകയാണെങ്കില്‍ കണ്ട എനിക്കും, സിനിമാ നടന്‍ ദിലീപിനും(മൂപ്പരാണല്ലോ പടം പിടിച്ചത്) മുടക്കിയ പണം മൊതലായ പടം.

അര്‍ജന്‍റീനയും ബ്രസീലും പിന്നെ മഴയും

2010-07-02T10:52:00.000-07:00

ജൂണ്‍ 30 2005. ജര്‍മ്മനിയോട് പെനാല്‍ട്ടിയില്‍ അര്‍ജന്‍റീന അടിയറവ് പറഞ്ഞ ദിവസം. അന്ന് നിറഞ്ഞ് കവിഞ്ഞ ആംഫി തിയേറ്ററില്‍ നിന്ന് കളിയും കണ്ട് മടങ്ങുന്പോള്‍ പ്രകൃതി കണ്ണുനീര്‍ പൊഴിച്ചതും പിറ്റേ ദിവസം ബ്രസീലും ഇംഗ്ലണ്ടുമെല്ലാം ടൂര്‍ണമെന്‍റില്‍ നിന്ന് പുറത്തായത് ഞാന്‍ 'വാമോസ് അര്‍ജന്‍റീന‍' എന്ന മുന്‍ പോസ്റ്റില്‍ പറഞ്ഞിട്ടുണ്ടായിരുന്നു.

ജൂലായ് 2, 2010, അന്നത്തെ പോലെ ഇന്നും ഒരു വെള്ളിയാഴ്ച, ഓഫീസിലെ അതേ ക്ലബ്ബിലിരുന്ന് ബ്രസീല്‍ തോല്‍ക്കുന്നതും കണ്ട് തിരിച്ച് വീട്ടിലേക്ക് വരുന്പോള്‍ അന്നത്തെ പോലെ ശക്തമല്ലെങ്കിലും ഇന്നും മഴ പെയ്തു.

അന്ന് നനഞ്ഞൊട്ടിയ അര്‍ജന്‍റീനന്‍ ജഴ്സിയുമായി ദുഖത്തോടെ വീട്ടിലേക്ക് കയറിയെങ്കില്‍ , ഇന്ന് മഴ നനഞ്ഞെത്തുന്പോള്‍ ഉള്ളില്‍ ചെറിയൊരു സന്തോഷമുണ്ടായിരുന്നോ?

നാളെ ശനിയാഴ്ച, അന്നത്തെ ശനിയാഴ്ച ബ്രസീലാണിറങ്ങിയതെങ്കില്‍ ഇന്നത്തെ ശനിയാഴ്ച എന്‍റെ പ്രിയ ടീം അര്‍ജന്‍റീനയിറങ്ങുന്നു. അന്നവര്‍ക്ക് പറ്റിയത് നമുക്ക്

പറ്റാതിരിക്കട്ടെയെന്ന പ്രാര്‍ത്ഥനയോടെ ഒരു ചോദ്യം.

അര്‍ജന്‍റീനയും ബ്രസീലും മഴും തമ്മിലെന്തെങ്കിലും ബന്ധമുണ്ടോ? തൂവാനത്തുന്പികളില്‍ ക്ലാരയും ജയകൃഷ്ണനും കാണുന്പോള്‍ കൂട്ടായി മഴയെത്തും പോലെ, ഇവര്‍ തോല്‍ക്കുന്പോളും ഒപ്പം മഴയും എത്തുന്നു......

ഉറുഗ്വായ് - ഘാനാ മത്സരം കാണാനായി തയ്യാറാവുന്പോള്‍ ഒരു ദുഖം മാത്രം, നാളെ അര്‍ജന്‍റീന ജയിച്ചാലും സ്വപ്ന ഫൈനല്‍ നടക്കില്ലല്ലോ.......

കക്കാ - മെസ്സി പോരാട്ടത്തിനായി ഇനിയും നാളുകളേറെ കാത്തിരിക്കണമല്ലോ?

വാമോസ് അര്‍ജന്‍റീന.......

ലോകകപ്പ് ആര്‍ക്ക്

2010-06-06T10:31:00.000-07:00

ഇറ്റലിക്ക്, ഇരുന്പ് ഡിഫന്‍സ്
ബ്രസീലിന്, ബ്രേക്ക്ത്രൂ പാസുകള്‍
പോര്‍ച്ചുഗലിന്, പോര്‍വിളികള്‍
ജര്‍മ്മനിക്ക്, ജയ് ജയ് വിളികള്‍
ഇംഗ്ലണ്ടിന്, ഇടിവെട്ടടികള്‍

അര്‍ജന്‍റീനക്ക്, ലോകകപ്പ്

ഇറ്റലിക്ക്, ഗിലാര്‍ഡിനോ
പോര്‍ച്ചുഗലിന്, റോണാല്‍ഡോ
ജര്‍മ്മനിക്ക്, പോഡോള്‍സ്കി
ഇംഗ്ലണ്ടിന്, റൂണി
ഹോളണ്ടിന്, വാന്‍പെറെസി
സ്പെയിനിന്, ടോറസ്
ബ്രസീലിന്, കാക്ക
ഫ്രാന്‍സിന്, ഹെന്‍‍റി

അര്‍ജന്‍റീനക്ക്, ലോകകപ്പ്.....

ഐപിഎല്‍ ചരിതം നാലാം ഭാഗം

2010-04-14T22:50:00.000-07:00

ഞാനൊരു തരൂര്‍ഫാനായത് കാരണവും, കേരള ഐപിഎല്‍ ടീം വരണമെന്നാഗ്രഹിക്കുക ചെയ്യുന്നതിനാലും, ഇതില്‍ ഒരു സൈഡിനോട് പക്ഷപാതമുണ്ടെന്ന ആരോപണം സമ്മതിക്കുന്നു.
നളചരിതത്തിലെ "നായര്‍ വിശന്നു വലഞ്ഞു" എന്ന ഭാഗത്തെ ഒന്നു മാറ്റിയെഴുതിയതാണ് (വികലമാക്കിയോ എന്ന സംശയവുമുണ്ട്). കുഞ്ചന്‍ നമ്പ്യാര്‍ ക്ഷമിക്കുമെന്ന് വിചാരിക്കുന്നു, അത് പോലെ നിങ്ങളും. ആദ്യമായാണ് ഇതുപോലൊരെണ്ണം ശ്രമിക്കുന്നതെന്ന് സൂചിപ്പിക്കുന്നു. തെറ്റുകുറ്റങ്ങള്‍ ചൂണ്ടിക്കാണിക്കുക.

"മോദി കിണഞ്ഞു ശ്രമിച്ചിട്ടെങ്ങും അദാനിയ്ക്ക് ടീമായില്ല
ആയതു കേട്ടുകലമ്പിച്ചങ്ങാരിശമുടനേ ട്വിറ്ററിലെറിഞ്ഞു
ചുട്ടുതിളയ്ക്കും ട്വീറ്റുകളെല്ലാം വാരിക്കോരി ട്വിറ്ററിലിട്ടു
കിട്ടിയ പെണ്ണിനെ മടികൂടാതെ, തരൂരിനൊപ്പം കെട്ടിവരിഞ്ഞു
തെറിവിളി കൊലവിളിയൊക്കെ നടന്നു, മുറവിളിയായി പാര്‍ട്ടികളെത്തി
കോലമെടുത്തു തീയിലെരിച്ചു, മീഡിയങ്ങു കളത്തിലിറങ്ങി
അതുകൊണ്ടരിശം തീരാഞ്ഞവരിനി ഹര്‍ത്താലിനായി മണ്ടി നടക്കും."

വരുന്നോ, വീണ്ടുമാ വസന്തകാലം

2010-01-31T01:35:00.001-08:00

ജനിച്ചത് കേരളത്തിന്‍റെ വടക്കേ അറ്റത്തുള്ള കോഴിക്കോടാണെങ്കിലും വളര്‍ന്നതും പഠിച്ചതും ജോലി ചെയ്യുന്നതും തലസ്ഥാന നഗരിയായ തിരുവനന്തപുരത്താണ്. സ്കൂള്‍ അവധിക്കാലം ചെലവഴിച്ചിരുന്നത് രണ്ട് ഘട്ടങ്ങളിലായിട്ടായിരുന്നു. അച്ഛന്‍റെ നാടായ എറണാകുളത് ഒരു മാസം, അമ്മയുടെ നാടായ കോഴിക്കോട് ഒരു മാസം. കളിക്കൂട്ടുകാരും ബന്ധുബലവും ഏറെയുള്ള മലബാര്‍ അവധിക്കാലം തന്നെയാണ് എന്നെ ഹരം കൊള്ളിച്ചിരുന്നത്. കണ്ണൂര്‍ എക്സ്പ്രസ്സ് യാത്രയില്‍ പുലര്‍ച്ചെ എണീറ്റ്, ജനലരികില്‍ സ്ഥാനം പിടിച്ച് തണുത്ത കാറ്റേറ്റ പുറംകാഴ്ച്ചകള്‍ കാണുന്നത് ഇന്നും ഓര്‍മ്മയില്‍ നില്‍ക്കുന്നു.

പാടങ്ങളില്‍ നാട്ടിയ ഗോള്‍ പോസ്റ്റുകള്‍ , അവയ്ക്ക് നടുവില്‍ പന്തിനായി പൊരുതുന്ന കളിക്കൂട്ടങ്ങള്‍ . അതൊരു പതിവ് കാഴ്ച്ചയായിരുന്നു. പിന്നീടങ്ങോട്ട് കാലത്തിനൊപ്പം കളിയുടെ കോലവും മാറി. നാട്ടിയ പോസ്റ്റും പാടങ്ങളുമെല്ലാം അവിടെത്തന്നെയുണ്ട്, എന്നാല്‍ മൈതാന മധ്യത്തില്‍ ഒരു നിറവ്യത്യാസം. പച്ചപ്പില്‍ നിന്ന് വ്യത്യസ്തമായി മണ്ണിന്‍റെ നിറമുള്ള ഒരു നീളന്‍ കളം. ക്രിക്കറ്റ് പിച്ച്. എല്ലാ സ്പോര്‍ട്സുകളെയും സ്നേഹിക്കുന്ന കൂട്ടതില്‍ ഞാന്‍ ക്രിക്കറ്റിനെയും സ്നേഹിക്കുന്നു. പക്ഷേ അത് മറ്റ് കളികളുടെ ചിറകുകളരിഞ്ഞാണെന്നോര്‍ക്കുന്പോള്‍ വിഷമവുമുണ്ട്.

ഫുട്ബോളിന് എന്തെന്നില്ലാത്ത ഒരാവേശം നല്‍കുവാനുള്ള കഴിവുണ്ട്. അത് ത്രീസായാലും ഫൈസായാലും സെവന്‍സായാലും പിന്നെ അംഗീകൃത വിഭാഗമായ ഇലവന്‍സായാലും ശരി. പന്തുരുളുന്നത് കണ്ടാല്‍ നിമിഷ നേരം കൊണ്ട് കാണികള്‍ നിറയും കളിസ്ഥലത്തിന് ചുറ്റും.

ഞാന്‍ കളി ശ്രദ്ധിച്ച് തുടങ്ങിയ കാലത്ത് ടൈറ്റാനിയവും, കേരള പോലീസും, കെല്‍ട്രോണുമെല്ലാമായിരുന്നു കേരള ഫുട്ബോള്‍ . പോലീസും, കെല്‍ട്രോണും വീണപ്പോള്‍ എഫ്സികൊച്ചിനും എസ്ബിടിയും വന്നു. പിന്നെ വിവ വന്നു, മലബാര്‍ യുണൈറ്റഡ് വന്നു അങ്ങനെ വന്പന്‍ രീതിയില്‍ തുടങ്ങിയ ടീമുകളും, ചെറുമീനുകളുമെല്ലാമുണ്ടെങ്കിലും, അവര്‍ക്ക് കളിക്കാന്‍ കേരളത്തില്‍ ടൂര്‍ണമെന്‍റുകളില്ലാതായി.

ഇന്ന് പോലീസും, കെല്‍ട്രോണും,എഫ്സി കൊച്ചിനും ഒന്നും ചിത്രത്തില്‍ തന്നെയില്ല. എന്തിനേറെ പറയുന്നു സന്തോഷ് ട്രോഫിയില്‍ പോലും കേരളം ഒരു ശക്തിയല്ലാതെ മാറിയിരിക്കുന്നു.

2010-ല്‍ കേരള ഫുട്ബോളിന് നല്ല കാലമാണെന്ന്തോന്നുന്നു, 25 വര്‍ഷത്തെ ഇടവേളയ്ക്ക് ശേഷം ജി.വി രാജ ടൂര്‍ണമെന്‍റ് പുനര്‍ജ്ജീവിച്ചിരിക്കുന്നു. മനോരമ ഗോള്‍ഡ് കപ്പും, നായനാര്‍ മെമ്മോറിയല്‍ ടൂര്‍ണമെന്‍റുമെല്ലാം നമ്മുടെ ഫുട്ബോള്‍ കലണ്ടറുകളില്‍ പതുക്കെ സ്ഥാനം പിടിച്ചു വരുന്നു.ഇന്നത്തെ പത്രം നോക്കിയപ്പോള്‍ ദാ വേറൊരു ടൂര്‍ണമെന്‍റും കണ്ടു. ഭഗത് സോക്കര്‍ ഓള്‍ ഇന്ത്യ ഫുട്ബോള്‍ ടൂര്‍ണമെന്‍റ.

ഒപ്പം തന്നെ പത്തനാപുരം ആസ്ഥാനമാക്കി പുതിയൊരു ഫുട്ബോള്‍ ക്ലബ്ബിനെക്കുറിച്ചുള്ള വാര്‍ത്തയും(1981ല്‍ തുടങ്ങിയെങ്കിലും, വിനു ജോസ് കോച്ചായി എത്തിയപ്പോളാണ് അവര്‍ക്ക് ഉണര്‍വ്വ് വന്നതെന്ന് തോന്നുന്നു) .ഏറെ കൊട്ടിഘോഷിച്ച എഫ്.സി. കൊച്ചിന്‍റെ ഗതി ഇവര്‍ക്ക് വരരുതേയെന്ന് ആത്മാര്‍ത്ഥമായി പ്രാര്‍ത്ഥിക്കുന്നു.

ജിവി രാജ ഫിക്സച്ചര്‍ തിരയുന്നതിനിടയില്‍ കണ്ടെത്തിയ ഒരു ഫുട്ബോള്‍ സൈറ്റ്, ഫുട്ബോള്‍ കേരള

http://footballkerala.com/

ഇതെല്ലാം കണ്ട് ഞാന്‍ ചോദിച്ചു പോകുന്നു. വരുന്നോ, വീണ്ടുമാ വസന്തകാലം.

വരട്ടെയെന്ന് പ്രാര്‍ത്ഥിക്കുന്നു, ഒപ്പം നിങ്ങളും പ്രാര്‍ത്ഥിക്കുക

ഇവിടം സ്വര്‍ഗ്ഗമാണ് : അമീക്കസ് ക്യൂറി

2010-01-03T06:08:00.000-08:00

'ഡാ, 3 ഇഡിയറ്റ്സ് കാണാന്‍ പോണ്ടേ' രമേഷന്‍റെ ഹലോ ശബ്ദം കേട്ടു ഞാന്‍ ചോദിച്ചു...
'നീ പോയ്ക്കൊ, ഞാന്‍ ഇന്നലെ പോയി കണ്ടു'
'അതെന്ത് പണിയാടാ, എന്നേം വിളിക്കണമെന്ന് പറഞ്ഞിട്ട്'
'നീ ക്രിക്കറ്റെന്നും പറഞ്ഞ് നടക്കുവല്ലായിരുന്നോ ,നമുക്ക് ഇവിടം സ്വര്‍ഗ്ഗമാണിന് പോകാം. '
'ബാല്‍ക്കണിയുണ്ടെങ്കില്‍ മാത്രമേ ഞാനുള്ളു, വേറെ ആരുണ്ട് ഇവിടെ, നാട്ടില്‍ പോകാത്തവര്‍ '
'ബാലനുണ്ടാവും നീയൊന്ന് വിളിച്ചു നോക്ക്, ഞാന്‍ SMS വഴി ബുക്ക് ചെയ്യാന്‍ നോക്കട്ടെ' അവന്‍ ഫോണ്‍ കട്ട് ചെയ്തു.
രമേഷനോടുള്ള സംഭാഷണം നിര്‍ത്തി ഞാന്‍ അഭിലാഷ് ബാലനെ ഡയല്‍ ചെയ്തു.

' നീ വരുന്നോ ഇവിടം സ്വര്‍ഗ്ഗമാണ് കാണാന്‍ ?'
' കുറച്ചൂടെ നേരത്തെ പറഞ്ഞൂടേ, ഇനിയിപ്പോ ചോറൊക്കെയുണ്ട് എപ്പോ ഇറങ്ങാനാ' ബാലന്‍റെ മറുപടി

' പടം തുടങ്ങാന്‍‍ ഇനീം രണ്ടര മണിക്കൂറുണ്ട്, അത്രയും സമയം പോരെ നിനക്ക് ചോറുണ്ണാന്‍ '

' അതല്ലടാ, ഇന്ന് റൂമില്‍ ചോറുണ്ടാക്കണ ഡ്യൂട്ടി എനിക്കാ, അതെനി എപ്പോ ആയി വരും എന്നുള്ളതാ ഒരു പ്രശ്നം'

' നീ ചോറുണ്ടോ ഇല്ലേ എന്നുള്ളത് നിന്‍റെ പ്രശ്നം, വേണേല്‍ വേഗം രമേഷനെ വിളിച്ച് പറ, അവന്‍ SMS വഴി ബുക്ക് ചെയ്യാന്‍ ശ്രമിക്കുകയാണ് '

രമേഷനോടും കളിയല്ല കല്യാണം ഫെയിം അഭിലാഷിനുമൊപ്പം ഇവിടം സ്വര്‍ഗ്ഗമാണ് കാണാനിറങ്ങുന്പോള്‍ ചിത്രം കാണാനാവുമോ എന്നുറപ്പില്ലായിരുന്നു, SMS ബുക്കിങ്ങ് കണ്‍ഫര്‍മേഷന്‍ കിട്ടിയ പ്രകാരം പടം തുടങ്ങുന്നതിന് മുക്കാല്‍ മണിക്കൂര്‍ നേരത്തെ എത്തണമെന്നാണ്. തിരുവനന്തപുരത്താണെങ്കില്‍ രണ്ടു ദിവസമായി ബ്ലോക്കോട് ബ്ലോക്ക്(പ്രധാനമന്ത്രിയുടെ സന്ദര്‍ശനം). തിയേറ്ററിലെത്തിയപ്പോള്‍ മുടിഞ്ഞ തിരക്ക്, അവിടെയുള്ള സെക്യൂരിറ്റിക്കാര്‍ക്കൊന്നും മൊബൈല്‍ ബുക്കിങ്ങിന്‍റെ കാര്യങ്ങളൊന്നും പിടിയുമില്ല.

തിയേറ്ററിലെത്തിയ ദിവസം തന്നെ മണ്ണിന്‍റെ മണമുള്ള ചിത്രമെന്ന് സാക്ഷ്യപ്പെടുത്തിയ അനിലിന്‍റെ പഞ്ചസാരപ്പൊതിയിലാണ് (ബ്ലോഗ്) ആദ്യ റിവ്യു വായിച്ചത്, തുടര്‍ന്നങ്ങോട്ട് ഗുഡ് സര്‍ട്ടിഫിക്കറ്റ് മാത്രമുള്ള അനേകം റിവ്യുകള്‍ . പഴയ കുസൃതിച്ചിരിയും കള്ളനോട്ടവും എല്ലാമുള്ള 'ഭഗവാനും' 'ഏയ്ഞ്ചലും' ഒന്നുമല്ലാത്ത സാധാരണക്കാരനായ ലാലേട്ടനെക്കാണാന്‍ അന്നേ തീരുമാനിച്ചതാണ്.

നിറഞ്ഞു കവിഞ്ഞ ശ്രീകുമാര്‍ തിയേറ്ററും പരിസരങ്ങളിലുമെല്ലാം ഒരു സുഹൃത്ത് മൊബൈല്‍ ക്യാമറയുമായി നടക്കുന്നുണ്ട്, വണ്ടികളുടെ തിരക്കും നീണ്ട ക്യൂവുമെല്ലാം പകര്‍ത്തുന്നു, ഏതെങ്കിലും ഓര്‍ക്കൂട്ട്
കമ്മ്യൂണിറ്റിയിലിടാനാവും.

തിലകനും കവിയൂര്‍ പൊന്നമ്മയും ഒരു ഇടവേളയ്ക്കു ശേഷം മോഹന്‍ലാലിന്‍റെ അച്ഛനും അമ്മയുമായി വേഷമിടുന്ന ചിത്രം, ' ക്ലാസ്മേറ്റ്സ്' , ' സൈക്കിള്‍ ' എന്ന ചിത്രങ്ങളുടെ തിരക്കഥാകൃത്തായ ജെയിംസ് ആല്‍ബര്‍ട്ട്, ' ഉദയനാണു താരം' , ' നോട്ട്ബുക്ക്' എന്ന ചിത്രങ്ങളുടെ സംവിധായകനായ റോഷന്‍ ആന്‍ഡ്രൂസുമായി ഒന്നിക്കുന്ന ചിത്രം. ഈ പ്രത്യേകതളോടെയാണ് ' ഇവിടം സ്വര്‍ഗ്ഗമാണ്' തിയേറ്ററുകളില്‍ എത്തുന്നത്. പ്രേക്ഷകരുടെ പ്രതീക്ഷ കാത്തുസൂക്ഷിക്കുന്ന ഈ ചിത്രത്തില്‍ തിരക്കഥയാണു താരം എന്നു പറയാതിരിക്കാന്‍ വയ്യ.
ആലുവാ ചാണ്ടിയായി എത്തുന്ന ലാലു അലക്സ് തന്‍റെ കരിയറിലെ തന്നെ മികച്ചൊരു കഥാപാത്രം ചെയ്തിരിക്കുന്നു. ഭുവനചന്ദ്രന്‍ എന്ന ആധാരമെഴുത്തുകാരന്‍റെ ചിതല്‍ പ്രയോഗവും, മുതലക്കുഞ്ഞുങ്ങളും പ്രേക്ഷകര്‍ക്ക് ഓര്‍ത്തു ചിരിക്കുവാനുള്ളവയാണ്. അമീക്കസ് ക്യൂറിയായി ശ്രീനിവാസനും, ചിത്രത്തിലെ മൂന്നു നായികമാരും, വന്നു പോകുന്ന എല്ലാ ചെറുകഥാപാത്രങ്ങളും രസകരമായി തന്നെ അവതരിപ്പിക്കപ്പെടുന്നു.
ക്ലൈമാക്സിന്‍റെ പിരിമുറുക്കമില്ലാതെ, പ്രേക്ഷകരെ ചിരിപ്പിക്കുന്ന ഈ ചിത്രത്തിലൂടെ ലാലേട്ടന്‍റെ നമ്മള്‍ കണ്ടുമറന്ന പഴയകാല മാനറിസങ്ങളെല്ലാം കാട്ടിത്തന്ന അണിയറപ്രവര്‍ത്തകര്‍ക്കു നന്ദി പറയുന്നു. ചിത്രത്തില്‍ പാട്ടില്ലെന്ന് പല റിവ്യൂകളിലും വായിച്ചെങ്കിലും, അതിന്‍റെ അഭാവം നമ്മളൊരിക്കലും അറിയില്ല എന്നതാണ് സത്യം.

അമീക്കസ് ക്യൂറി എന്നാല്‍ കോടതിയുടെ സുഹൃത്താണെന്ന് ശ്രീനിവാസന്‍ പറഞ്ഞപ്പോളാണ് മനസ്സിലായത്, അങ്ങനെയെങ്കില്‍ ജെയിംസ് ആല്‍ബര്‍ട്ടും, റോഷന്‍ ആന്‍ഡ്രൂസും മലയാള സിനിമയുടെ അമീക്കസ് ക്യൂറികളാണ്, പൊതുജനത്തിന്‍റെ താല്‍പര്യം മനസ്സിലാക്കി നമ്മുടെ പഴയ ലാലേട്ടനെയും നല്ലൊരു സിനിമയെയും നമുക്ക് സമ്മാനിച്ച മലയാള സിനിമയുടെ
സുഹൃത്തുക്കള്‍‍

വാല്‍ക്കഷ്ണം : ഞാനായിരുന്നു ലാലേട്ടന്‍റെ സ്ഥാനത്തെങ്കില്‍ പച്ചക്കറി കൃഷിയ്ക്ക് പകരം പുഷ്പകൃഷി തുടങ്ങിയേനെ. ഈ പറഞ്ഞതെന്താണെന്നറിയാന്‍ ഒന്നുകില്‍ സിനിമ കണ്ടിട്ടുണ്ടാവണം അല്ലെങ്കില്‍ സിനിമ കാണണം.

നീലത്താമര

2009-12-27T05:54:00.000-08:00

നീലത്താമര ഇറങ്ങിയിട്ട് ഇന്ന് എത്ര ദിവസമായെന്ന് കൃത്യമായി എനിക്കോര്‍മ്മയില്ല. ചിത്രത്തിന്‍റെ അണിയറ പ്രവര്‍ത്തകനായ ഒരു സുഹൃത്ത് പറഞ്ഞത് ശരിയാണെങ്കില്‍ (എന്‍റെ ഓര്‍മ്മ) ഡിസംബര്‍ 30ന് ചിത്രം ഒരു മാസം തികയ്ക്കും. ഇന്നുച്ചയ്ക്ക് കൈരളിയിലേക്ക് നീലത്താമര കാണുവാനായി പോകുന്പോള്‍ സ്ഥിരം കന്പനിക്കാര്‍ ആരും തന്നെ ഇല്ലായിരുന്നു, പലരും ക്രിസ്തുമസ് അവധിയ്ക്ക് നാട്ടിലാണ്, മാത്രമല്ല ഞാന്‍ ശബരിമലയ്ക്ക് പോയ സമയത്ത് അതില്‍ ചിലര്‍ പടം കാണുകയും ചെയ്തു.

പടം ഇറങ്ങി ആദ്യ ദിവസം (ലാല്‍ ചിത്രമാണെങ്കില്‍‍ ) തന്നെ കാണുകയും, ലാലിതര ചിത്രങ്ങള്‍ ആദ്യ ആഴ്ച്ചയിലും കാണുന്ന ഒരു കാലമുണ്ടായിരുന്നു. കാക്കകുയില്‍ ആദ്യ ദിവസം കണ്ടതിന് ശേഷം, ഡയലോഗും സ്ക്രീനും ഒന്നും കേള്‍ക്കാനോ കാണാനോ പറ്റാത്ത ഫസ്റ്റ് ഡേ ഫസ്റ്റ് ഷോ എന്ന പരിപാടി നിര്‍ത്തി. ഇപ്പോള്‍ തിരക്കെല്ലാം കുറഞ്ഞ്, അഭിപ്രായമെല്ലാം കേട്ടാണ് ചിത്രം കാണാനിറങ്ങുന്നത്. അതുകൊണ്ട് ഈ ചിത്രത്തിന്‍റെ ഒരു റിവ്യൂവായി ഇതിനെ കരുതേണ്ട. കാരണം അതിവിടെ നല്ല രീതിയില്‍ തന്നെ പലരും ചെയ്തു കഴിഞ്ഞല്ലോ.

2 മണിക്ക് കൈരളി തിയേറ്ററിന് മുന്നിലെത്തുന്പോള്‍ പ്രതീക്ഷിച്ച പോലെ വല്യ തിരക്കൊന്നും കാണുവാനില്ല. ഉള്ളവരില്‍ സ്ത്രീകളാണ് കൂടുതല്‍ . ശ്രീയില്‍ പ്രദര്‍ശിപ്പിക്കുന്ന 'ആറുമനമേ'യുടെ പോസ്റ്ററും കൂട്ടത്തില്‍ ക്യൂവിലുള്ള ഒന്നു രണ്ട് കുഞ്ഞിമാളുകളെയും(അത്രയും വരില്ലെങ്കിലും) നോക്കി കൌണ്ടര്‍ തുറക്കാനായി കാത്തു നിന്നു. ടിക്കറ്റുമെടുത്തു ഉള്ളിലേക്ക് കയറിയപ്പോള്‍ ആശ്ചര്യം തോന്നി. എസിയൊക്കെ പ്രവര്‍ത്തിപ്പിക്കുന്നുണ്ട്. ബാല്‍ക്കണി ഫുള്ളാകില്ലെങ്കിലും സാമാന്യം നല്ല തിരക്കുണ്ട്. റിസര്‍വ്വേഷനില്‍ ഒറ്റ കുഞ്ഞില്ലെന്ന് തന്നെ പറയണം.

ഞങ്ങള്‍ പരിചയപ്പെടുത്തുന്നു എന്നു പറഞ്ഞ് ഒരു പിടി അഭിനേതാക്കളുടെ പേരുമായി തുടങ്ങിയ ടൈറ്റില്‍ ക്രെഡിറ്റ്സ് കാണിച്ച രീതി എനിക്ക് വളരെ ഇഷ്ടമായി. ചിത്രം തുടങ്ങി ലാല്‍ജോസിന്‍റെ സംവിധാനത്തില്‍ വിജയ് ഉലകനാഥ് ക്യാമറ ചലിപ്പിക്കുന്പോള്‍ ശരിക്കും എനിക്കനുഭവപ്പെട്ടത് ഞാന്‍ അവധിക്കാലത്ത് കളിച്ചു വളര്‍ന്ന എന്‍റെ നാട്ടിലെ തറവാട്ടിലും, ഇടവഴിയിലും, കുളത്തിലുമെല്ലാം(അവിടെ നീലത്താമരയില്ല) ഒരിക്കല്‍ കൂടി ചെന്നെത്തിയതായിട്ടാണ്. ഇന്ന് അതെല്ലാം ഏറെ മാറിയെന്നുള്ളത് വേറെക്കാര്യം. ആ പച്ചപ്പും പുഴയോരവുമെല്ലാം മനസ്സില്‍ വീണ്ടും കുളിരുള്ളൊരനുഭവമായി.

ഒരഭിമുഖത്തിനായി ടിവിയില്‍ അര്‍ച്ചനാ കവിയെ കണ്ടപ്പോള്‍ എനിക്ക് വിശ്വസിക്കാന്‍ കഴിഞ്ഞില്ല നീലത്താമരയിലെ കുഞ്ഞിമാളു ഇതാണെന്ന്. അത്രയും മെച്ചമാക്കിയിട്ടുണ്ട് കുഞ്ഞിമാളുവിനെ. അതുപോലെ തന്നെ മറ്റെല്ലാ കഥാപാത്രങ്ങളും, അത് ഹരിദാസായാലും, ഷാരോത്തെ അമ്മിണിയായാലും, രത്നമായാലും, ആല്‍ത്തറയിലെ ആശാനായാലും, വളരെ നന്നായിട്ടുണ്ട്. ചില ഫ്രെയിമുകളില്‍ അര്‍ച്ചനയെക്കണ്ടപ്പോള്‍ അംബികയുടെ ഒരു ഛായ തോന്നി.

എം.ടിയുടെ ഒരു തിരക്കഥ ചലച്ചിത്രം ആക്കണമെന്ന അടങ്ങാത്ത ആഗ്രഹമാണ് ലാല്‍ജോസിനെ ഈ ചിത്രം ചെയ്യാന്‍ പ്രേരിപ്പിച്ചതെന്ന് നൂറ് ശതമാനം ഉറപ്പ്. ഗൃഹാതുരത്വത്തിന്‍റെ ഓര്‍മ്മകള്‍ സമ്മാനിച്ച ഈ ചിത്രത്തിന്‍റെ അണിയറ പ്രവര്‍ത്തകര്‍ക്ക് ഞാന്‍ നന്ദി പറയുന്നു. ഇനിയും ഇതുപോലുള്ള ശ്രമങ്ങളുണ്ടാകട്ടെയെന്ന് ആത്മാര്‍ത്ഥമായി ആഗ്രഹിക്കുന്നു. ആ ഗ്രാമീണത വീണ്ടും കാണുവാന്‍ ഇനി സിനിമകളെ ആശ്രയിക്കേണ്ട അവസ്ഥയിലേക്ക് നമ്മള്‍ നീങ്ങിക്കഴിഞ്ഞിരിക്കുന്നു എന്നത് ഒരു ദുഖ:സത്യം.

പിന്നെ തോന്നിയത് : വൈകി സിനിമ കാണുന്നത് കൊണ്ട് ലേശം കിടപ്പറ സീനും ബോറന്‍ ഡയലോഗുമൊക്കെ വരുന്പോള്‍ , പ്രേക്ഷകരുടെ വഷളന്‍ കമന്‍റുകളും കൂക്കിവിളികളുമൊന്നും കേള്‍ക്കേണ്ട, എന്തിനേറെ പറയുന്നു രണ്ട് പ്രാവശ്യം കറന്‍റ് പോയിട്ടും ഞാനുള്‍പ്പടെ ഒറ്റ കുഞ്ഞ് പോലും ബഹളമുണ്ടാക്കിയില്ല.

കളിയല്ല കല്യാണം

2009-12-25T22:27:00.000-08:00

കുറച്ച് കാലം മുമ്പ് ഓഫീസിലെ ഒരു സുഹൃത്തിനെ കളിയാക്കാനായി എഴുതിയത്. ഇപ്പോള്‍ ചുമ്മാ ഇവിടെ പോസ്റ്റുന്നു. കഥാപാത്രങ്ങളെ പരിചയമില്ലാത്തത് കൊണ്ട് വായനാ സുഖം കിട്ടുമോയെന്നറിയില്ല. എല്ലാവര്‍ക്കും പുതുവത്സരാശംസകള്‍

കളിയല്ല കല്യാണം

'ഇനിയിത് ഇവിടെ തുടരാനാവില്ല...'

അവ്യക്തമായി ഇങ്ങനെയൊരു ഡയലോഗും വ്യക്തമായി കിട്ടിയ ഒരു ചവിട്ടും ജുനിലിനെ ഉറക്കത്തില്‍ നിന്നുണര്‍ത്തി.

ഉറക്കത്തില്‍ നിന്നുണര്‍ന്ന് കണ്ണും തിരുമ്മി ചുമരിലേക്ക് ചാരിയിരുന്ന ജുനില്‍ കണ്ടത് മൊബൈലും പൊത്തി പിടിച്ച് കലിതുള്ളി നില്‍ക്കുന്ന റൂംമേറ്റ് സുനീഷിനെയാണ്.

'ഞാന്‍ പൈസ കൊടുത്ത എന്റെ മൊബൈലില്‍ എനിക്കിഷ്ടമുള്ളവരെ വിളിക്കും. ഇതിനി തുടരാനാവില്ലെന്ന് പറയാന്‍ നീയാരെടാ...'

'ഉറങ്ങി കിടന്ന എന്റെ പുറത്ത് ചവിട്ട് നാടകം നടത്തിയിട്ട് നീയിപ്പോള്‍ കീചകവധത്തിന്റെ റിഹേഴ്സല്‍ നടത്തുകയാണോ' ജുനില്‍ ചീറി....

'എത്രയെന്നും പറഞ്ഞാ...ഇതിലൊരു തീരുമാനമെടുത്തേ പറ്റു' വീണ്ടും ശബ്ദം...

ആ ശബ്ദം കേട്ട് രണ്ട് പേരും ഒന്ന് ഞെട്ടി. റൂമിന്റെ ഒരു കോണില്‍, ചെമ്മീന്‍ ചുരുണ്ടത് പോലെ കിടക്കുകയാണ് അഭിലാഷ് ബാലന്‍.

'ഇവന്‍ ഉറക്കത്തില്‍ പുലമ്പുന്നതിന് എനിക്കിട്ടാണല്ലെ ചവിട്ട്..ഇതിപ്പോള്‍ പതിവാ...ഇന്നലെ if ലൂപ്പും സ്വിച്ച് കേസുമൊക്കെ പറയുന്നത് കേട്ടു....നീ ഫോണ്‍ വിളി തുടര്‍ന്നോളു..'

അശരീരിയുടെ ഉറവിടം മനസ്സിലാക്കിയ ജുനിലും സുനീഷും അവര്‍ ചെയ്തു വന്നിരുന്ന പണിയിലേക്ക് തിരികെ പോയി.......

പതിവ് പോലെ എട്ട് മണിക്കെഴുന്നേറ്റ് എടി പിടിന്നുള്ള റെഡിയാവലിനിടയിലാണ് ജുനിലത് ശ്രദ്ധിച്ചത്.

അഭിലാഷിനെ കാണാനില്ലല്ലോ...ഇന്നലെ ബാഗെല്ലാം പാക്ക് ചെയ്യുന്നുണ്ടായിരുന്നു....ഇനി ഒളിച്ചോടാന്‍ വല്ലതുമായിരുന്നോ പ്ലാന്‍. പോയി നോക്കി...ബാഗുകളെല്ലാം ഭദ്രം അവിടെ
മൂലയ്ക്കിരിക്കുന്നുണ്ട്...

തന്റെ കൈകള്‍ 'അലക്ക്' എന്ന വാക്ക് കേട്ടിട്ടില്ലാത്തൊരു ഷര്‍ട്ടിലേക്ക് കൂത്തി കയറ്റുന്നതിനിടയില്‍ അഭിലാഷിനെ ജുനില്‍ വിളിച്ചു(ഫോണ്‍ വിളിച്ചു)

മറുസൈഡില്‍ ഹലോ ശബ്ദം...

'അഭിലാഷേ...നീയിപ്പോ എവിടാടാ...'
'ഞാന്‍ നമ്മുടെ ക്യാന്റീനിലുണ്ട്....'
'ഇത്ര നേരത്തെ ക്യാന്റീനിലേക്കാണോ നീ പോയെ..? '
'അമ്പലത്തിലൊക്കെ ഒന്ന് പോയി...ഒരു നല്ല കാര്യത്തിനല്ലേ....'
'എന്തീറ്റ് നല്ലകാര്യം...ക്യാന്റീനില്‍ കഴിക്കാന്‍ പോണതോ?
അതിനാണോ നീ അമ്പലത്തില്‍ പോയത്....നീ എന്തൊക്കെയാടാ പറയുന്നേ...ഇതായിരുന്നോ നീ ഇന്നൊരു തീരുമാനമെടുത്തേ പറ്റൂ എന്ന് ഇന്നലെ ഉറക്കത്തില്‍ പറഞ്ഞത്' ജുനില്‍ ആകെ കണ്‍ഫ്യൂസ്ഡായി.....

'ആര് പറഞ്ഞു...ഞാന്‍ നിന്നെ പിന്നെ വിളിക്കാം...എനിക്ക് കഴിക്കുന്നതില്‍ കോണ്‍സെന്റട്രേറ്റ് ചെയ്യാന്‍ പറ്റുന്നില്ല...' അഭിലാഷ് ഫോണ്‍ കട്ട് ചെയ്തു...

സെക്ഷനില്‍ അന്ന് അഭിലാഷ് പതിവിലും ശാന്തനായിരുന്നു. ഉറ്റ സുഹൃത്തായി സജു സൌദിയിലേക്ക് പറക്കാന്‍ പോകുന്നതിന്റെ വിഷമമായിരിക്കുമെന്ന് കരുതി സഹജോലിക്കാരാരും തന്നെ അവനെ ശല്യം ചെയ്യാനായി പോയില്ല. തന്റെ 15" മോണിറ്റിലെ
ടാസ്ക് ബാറില്‍ മിനിമൈസായി കിടന്നിരുന്ന സൈറ്റുകളിലൂടെ സഞ്ചരിച്ചവന്‍ ആ ദിവസം തള്ളിനീക്കി...(ഏതാ സൈറ്റെന്ന് വാല്‍ക്കഷ്ണത്തില്‍ പറയാം...)

ഇടയ്ക്കിടയ്ക്ക് 'ദൈവം എന്നാലും എന്നോടിങ്ങനെ ചെയ്തല്ലോ' എന്ന് പറയുന്നത് കേട്ട് അപ്പുറത്തും ഇപ്പുറത്തുമുള്ളവര്‍ എഴുന്നേറ്റ് നോക്കിയെങ്കിലും, അവരെയാരെയും അഭിലാഷ് മൈന്‍ഡ്
പോലും ചെയ്തില്ല.....

വെള്ളിയാഴ്ച വൈകുന്നേരം സജുവിന്റെ സെന്‍ഡോഫിന് കണ്ട അഭിലാഷിനെ പിന്നെയാരും സിഡാക്കില്‍ കണ്ടില്ല.വെള്ളിയാഴ്ച്ചയായതിനാല്‍ സ്വാഭാവികമായി നാട്ടില്‍
പോയിട്ടുണ്ടാവുമെന്നും, ആത്മമിത്രത്തിന്റെ യാത്രയയപ്പിന്റെ വേദനയില്‍ സ്വരം ഹാളില്‍ വരാത്തതാണെന്ന് നമ്മളും കരുതി...

ഗുരുവായൂര്‍ എക്സ്പ്രസ്സിലെ സിറ്റിംഗ് സീറ്റിലിരുന്ന പോയ അഭിലാഷിന്റെ മനസ്സ് ഇരിങ്ങാലക്കുട സ്റ്റേഷനിലിറങ്ങുമ്പോഴും വെന്തുരുകുകയായിരുന്നു. വീട്ടിലെത്തിയുടന്‍ ചോദിച്ചാലോ?
അല്ലെങ്കില്‍ വേണ്ട രണ്ട് പകലുകള്‍ തന്റെ മുന്നില്‍ കിടക്കുകയല്ലേ..ചോദ്യവും ഉത്തരവും സ്വയം പറയുവാന്‍ തുടങ്ങിയിരിക്കുന്നു അഭിലാഷ്...

ശനിയാഴ്ച യാതൊരു ചലനവുമുണ്ടാക്കാതെ കടന്നു പോയി. ഞായറാഴ്ച എന്തായാലും കാര്യം പറയുമെന്ന അഭിലാഷിന്റെ ഉഗ്രശപഥമായിരുന്നു ആ ദിവസത്തിന്റെ ഹൈലൈറ്റ്.....

രാവിലെ എണീറ്റ് പ്രാതലും കഴിഞ്ഞ് തന്റെ പുതിയ വീട്ടിലെ വരാന്തയിലിരുന്ന് പത്രം വായിക്കുകയായിരുന്ന അഭിലാഷ് കാര്യം പറയാന്‍ തന്നെ തീരുമാനിച്ചു....

അടുക്കളയില്‍ ചെന്ന് ഉച്ചയൂണ് ഒരുക്കുകയായിരുന്ന അമ്മയോട്...

'അമ്മേ...ദേ പണികഴിഞ്ഞ് മാസം ഒന്ന് കഴിഞ്ഞിട്ടില്ല ആകെ പൊടി പിടിച്ച് കിടക്കുകയാണല്ലോ. ഇതൊന്നും ശ്രദ്ധിക്കാന്‍ ഇവിടാരുമില്ലേ...'

'നീ എന്നോട് പറയുന്നത് പോലെ അനീഷിനോട് പറഞ്ഞൂടെ ഇതൊക്കെ ചെയ്യാന്‍.'

'ഇതൊക്കെ പറയാന്‍ ഞാനിനി ജോലി കളഞ്ഞ് ഇവിടെ വരണോ? ആ ടീപോയില്‍ പഴയ പത്രങ്ങളെല്ലാം കിടക്കുന്നു. അതൊന്ന് എടുത്ത് വയ്ക്കാന്‍ പോലും ആര്‍ക്കും പറ്റില്ലെന്ന് പറഞ്ഞാല്‍'

'അതൊക്കെ ഞാന്‍ ചെയ്തോളാം..നീ ഇവിടെ നിന്ന് ഇങ്ങനെ സംസാരിച്ചാല്‍ എന്റെ പണികളൊന്നും തീരില്ലാട്ടോ....'

'എനിക്കിനി വയ്യ...നീ എന്താച്ചാല്‍ ആയിക്കൊള്ളു...ഒരു വിരോധവുമില്ല...' ഇങ്ങനൊരു മറുപടിയും പ്രതീക്ഷിച്ച് നിന്ന അഭിലാഷ് സ്വന്തം മുറിയിലേക്ക് തിരികെ പോയി.....

ഉച്ചയൂണിനായി അമ്മയും മകനും ഇരുന്നു.പ്ലേറ്റില്‍ നിന്നൊരുരുള വായിലേക്കിട്ട അഭിലാഷ് വീണ്ടും സംസാരം തുടങ്ങി...

'അനീഷ് കഴിക്കണില്ലേ...'
'വിശക്കണുന്ന് പറഞ്ഞ് അവന്‍ ആദ്യമേ കഴിച്ചു....'
'അമ്മയ്ക്ക് കാറോട്ടിക്കാനറിയാമോ?'
'അനീഷേ...അമ്മയ്ക്കും ചേട്ടനും പപ്പടം കൊണ്ടുത്തരാമോ? ഞാനെടുക്കാന്‍ മറന്നു...'
'കാറോട്ടിക്കാനറിയാമോ എന്നോ..അതെന്താ ഇപ്പോ ഇങ്ങനൊരു ചോദ്യം?' അഭിലാഷിനെ നോക്കി അമ്മ ചോദിച്ചു...

സെറ്റിയിലിരുന്ന് ടീവി കാണുകയായിരുന്ന അനീഷ് മടിച്ച് മടിച്ച് അടുക്കളയിലേക്ക് എണീറ്റ് പോയി.....

'പറഞ്ഞ പോലെ ഞാന്‍ പഠിച്ചിട്ടുണ്ടല്ലോ ഡ്രൈവിംഗ്... ഞാന്‍ അത് മറന്നേ പോയി...ദാ ഞാന്‍ പറഞ്ഞത് ഇനി ഇങ്ങനെ വിട്ടാല്‍ പറ്റില്ല....ഈ മുറ്റത്തൊരു കാറ് കിടക്കുന്നത് കണ്ടാല്‍
ഡ്രൈവിംഗ് പഠിച്ച കാര്യം ഞാന്‍ മറക്കില്ലല്ലോ....' (ഇതായിരുന്നോ ഇവന്‍ രണ്ട് മൂന്ന് ദിവസമായി മനസ്സിലിട്ട് വലുതാക്കിക്കൊണ്ടിരുന്ന വിഷയം...)

'അതിനിപ്പോള്‍ ഇവിടെ ആരാ കാറ് വാങ്ങാന്‍ പോകുന്നത്...'

'ഞാനൊരു..ക'

'കാറ് വാങ്ങാനിപ്പോള്‍ വളരെ എളുപ്പമാണമ്മേ...ഫൈനാന്‍സൊക്കെ അവര് തന്നെ അറേഞ്ച്
ചെയ്യും...' പ്ലേറ്റിലേക്ക് പപ്പടമിട്ട് അനീഷ് മറുപടി നല്‍കി.....(അഭിലാഷ് മുഴുവനാക്കുന്നതിന് മുമ്പ്.)

'ചെലക്കാണ്ട് പോടാ....അവന്റെ ഫൈനാന്‍സ്....വല്യവര്‍ സംസാരിക്കുന്നതിനിടയിലാണ്...വേണ്ടാ വേണ്ടാന്ന് വയ്ക്കുമ്പോള്‍....' പതിവില്ലാതെ ചൂടാവുന്ന ചേട്ടനെക്കണ്ട് അനീഷ് പപ്പടപാത്രവുമായി അടുക്കളയിലേക്ക് സ്കൂട്ടായി....

പ്ലേറ്റിലെ ചോറ് തീരാറായി..അനീഷിനോട് കയര്‍ത്തതിന് ശേഷം അവിടെ കൂറെ നേരം നിശബ്ദത തളം കെട്ടി നിന്നു...

'അമ്മേ....ഈ തിരുവനന്തപുരം സ്റ്റൈല്‍ പരിപ്പ് കറി വയ്ക്കാനറിയാമോ? ഇവിടെ അമ്മ സാമ്പാറും
രസവുമൊക്കെയുണ്ടാക്കുന്നത് മാത്രമെ കണ്ടിട്ടുള്ളു...' അഭിലാഷ് പ്ലേറ്റ് വടിച്ചെടുത്തു....

'ഈ പ്രായത്തിലുള്ള ആങ്കുട്ട്യോള് അമ്മമാരോട് പതിവില്‍ കവിഞ്ഞ് സ്നേഹം കാണിക്കുന്നത് എന്തിനാണെന്ന് എല്ലാ അമ്മമാര്‍ക്കുമറിയാം...എന്തായാലും തല്‍ക്കാലം ആ പരിപ്പ്
ഇവിടെ വേവില്ല എന്ന് മാത്രം എന്റെ മോന്‍ മനസ്സിലാക്കിയാല്‍ മതി...' പ്ലേറ്റുകള്‍ കഴുകാനായി അമ്മ അടുക്കളയിലേക്ക് പോയി...

'എനിക്കൊന്നും മനസ്സിലായില്ല...അമ്മ ഉദ്ദേശിച്ചതെന്താ...' അഭിലാഷ് വീണ്ടും ഇന്നസെന്റായി
അഭിനയിച്ചു(ഇരിങ്ങാലക്കുടക്കാരനല്ലേ...അഭിനയിക്കും അഭിനയിക്കും...)

'അതേ..ചേട്ടായി...എന്തൊക്കെയായിരുന്നു പേപ്പര്‍, ടീപ്പോയ് അലങ്കോലം, മുറ്റത്ത് കാറ്... കാള വാല് പൊക്കണ കണ്ടാലറിഞ്ഞൂടേന്നാ അമ്മ പറഞ്ഞത്....ഒരു കാര്യം മനസ്സിലാക്കിയ്ക്കോ...കളിയല്ല കല്യാണം...' അടുക്കള വാതിലില്‍ നിന്ന് തലമാത്രം പുറത്തിട്ട് അനീഷ് അഭിലാഷിനെയൊന്ന് വാരി...

കൈ പോലും കഴുകാതെ അനിയന്റെ പുറകെ ഓടുന്ന അഭിലാഷ് ബാലനെക്കണ്ട് ചിരിയടക്കാനാവാതെ നിന്ന അമ്മയോടൊപ്പം ആ സന്തോഷത്തില്‍ പങ്കു ചേരാനായി അച്ഛനും എത്തി.

വാല്‍ക്കഷ്ണം : തിരിച്ച് ഓഫീസിലെത്തി അഭിലാഷിന്റെ 15" മോണിറ്ററില്‍ മിനിമൈസായി കിടക്കുന്ന ശാദി.കോം, ജീവന്‍സാത്തി.കോം,കേരളാ മാട്രിമോണി സൈറ്റുകളിലെ തരുണീമണികളോട് അഭിലാഷ് പറയുന്നതെന്താണെന്ന് എനിക്ക് ഊഹിക്കാം.

“സ്വന്തമായി ബാത്ത് അറ്റാച്ചഡ് റൂമൊക്കെയുണ്ടാക്കീട്ടെന്താ...ഹൈക്കമാന്റില്‍ നിന്ന് അനുമതിയില്ലാതെ കാര്യമൊന്നും നടക്കില്ലെങ്കില്‍ ഞാന്‍ എന്താ ചെയ്യുക....”

അവനെ കളിയാക്കാന്‍ വരട്ടെ.....ഒട്ടുമിക്ക ആളുകളും അതിലേക്ക് തലപൂഴ്ത്തിയാണിരിപ്പെന്നറിയാം.......

വാമോസ് അര്‍ജന്‍റീന

2009-09-10T06:59:00.000-07:00

In Spanish:
Vamos, vamos Argentina,
vamos, vamos a ganar,
que esta barra quilombera,

no te deja, no te deja de alentar.

English translation:
Let's go, let's go Argentina,
let's go, let's go to win,

for these raucous supporters,

won't stop, won't stop cheering for you.

ബോബ് ഹൌട്ടണന്‍റെ കീഴില്‍ നെഹറു കപ്പ് വിജയവും ഏഷ്യകപ്പ് യോഗ്യതയും ഒക്കെയായി ഫുടബോളില്‍ ഇന്ത്യ പിച്ച വച്ച് തുടങ്ങുന്നതേയുള്ളു എന്ന് വേണമെങ്കില്‍ പറയാം. ചെറു ടൂര്‍ണമെന്‍റുകളില്‍ വിജയിച്ച്, ആരാധകരെ സൃഷ്ടിച്ച് ഇന്ത്യ മുന്നേറുകയാണ്.
ലോകകപ്പില്‍ ദേശീയ ടീമിനെ പ്രോത്സാഹിപ്പിക്കുക എന്ന നമ്മുടെ സ്വപ്നം വിദൂരമാണ്. ലോകകപ്പ് വേദിയില്‍ പന്തുരുളുന്പോള്‍ വിജയത്തില്‍ ആര്‍പ്പുവിളിക്കാനും തോല്‍വിയുടെ ദുഃഖം പങ്കുവയ്ക്കുവാനും എന്നും യൂറോപ്യന്‍ -ലാറ്റിന്‍ അമേരിക്കന്‍ ശക്തികളായ ഇംഗ്ലണ്ട്, ജര്‍മ്മനി, ഫ്രാന്‍സ്, ഇറ്റലി , ബ്രസീല്‍ , അര്‍ജന്‍റീന എന്നിവര്‍ തന്നെയായിരുന്നു നമ്മുടെ കൂട്ട്.

ബ്രസീലും അര്‍ജന്‍റീനയും, ലോക ഫുട്ബോളിന്‍റെ വന്‍ ശക്തികള്‍ , ചടുലതാളത്തിനും പന്തടക്കത്തിനും പേരുകേട്ട ഫുട്ബോള്‍ ടീമുകള്‍ .. വെള്ളയില്‍ ആകാശനീലിമയോട് സാമ്യമുള്ള നീളന്‍ വരകളുള്ള കുപ്പായവുമണിഞ്ഞിറങ്ങുന്ന അര്‍ജന്‍റീനയോടായിരുന്നു എനിക്ക് ഇഷ്ടം. മഞ്ഞപ്പട തോല്‍ക്കുന്പോള്‍ ഞാനും സന്തോഷിക്കുമായിരുന്നു ,പല അര്‍ജന്‍റീന ഫാനുകളെ പോലെ. ഇവരുടെ ഈ പകയ്ക്ക് വര്‍ഷങ്ങളുടെ പഴക്കമുണ്ട്. ഒരു ടീം തോല്‍ക്കുന്നത് മറു ടീമിന്‍റെ ആരാധകര്‍ ആഘോഷിക്കുന്ന തരത്തിലേക്ക് ആ മാത്സര്യം വളര്‍ന്നിരുന്നു, ഒരു കണക്കിന് പറഞ്ഞാല്‍ ക്രിക്കറ്റില്‍ നമ്മുടെ ഇന്ത്യാ-പാക്കിസ്ഥാന്‍ മത്സരം പോലെ അല്ലെങ്കില്‍ മമ്മൂട്ടി - മോഹന്‍ലാല്‍ ഫാന്‍സുകാരുടെ മത്സരം പോലെ.

ഫുട്ബോളിലെ ഈ വൈരം വിശദമായി വിക്കിപീഡിയയില്‍ വായിക്കാം.

ഇന്നിതാ ഒരു വേള്‍ഡ് കപ്പ് എത്താറായിരിക്കുന്നു, ലോകത്താകമാനമുള്ള ഫുട്ബോള്‍ പ്രേമികള്‍ക്ക് (പ്രത്യേകിച്ച് അര്‍ജന്‍റീനാ ആരാധകര്‍ക്ക് ) നെഞ്ചിടിപ്പ് സമ്മാനിച്ച് കൊണ്ട്. ഇന്ന് പുലര്‍ച്ചെ പരാഗ്വേയോടും തോറ്റ് പ്ലേ ഓഫ് മത്സരങ്ങളിലേക്ക് ഉറ്റുനോക്കുകയാണ് മെസ്സിയും ടെവസ്സും അടങ്ങുന്ന മറഡോണ പരിശീലിപ്പിക്കുന്ന ഈ മുന്‍ ലോക ചാന്പ്യന്മാര്‍ ..

ഇന്‍ബോക്സിലേക്ക് 'നിന്‍റെ അര്‍ജന്‍റീനാ വേള്‍ഡ് കപ്പിനു കാണുമോടാ?' 'ഹായ് അര്‍ജന്‍റീനാ തോറ്റലോ' എന്നിങ്ങനെയുള്ള മെയിലുകള്‍ വന്ന് നിറയുന്പോള്‍ മനസ്സിന്‍റെ ഇന്‍ബോക്സിലേക്ക് പഴയ ഓര്‍മ്മകള്‍ വന്നു നിറയുകയാണ്.

2006 ജൂണ്‍ മാസം, ജര്‍മ്മനിയില്‍ 18ാമത് ഫുട്ബോള്‍ വേള്‍ഡ് കപ്പ് മത്സരം അരങ്ങേറുന്നു. ഓഫീസിലെ ഫുട്ബോള്‍ പ്രേമികളുടെ സമ്മര്‍ദ്ദം കാരണം ക്വാര്‍ട്ടര്‍ ഫൈനല്‍ മുതലുള്ള മത്സരങ്ങള്‍ ക്ലബില്‍ പ്രദര്‍ശനം നടത്തുമെന്ന ഉറപ്പില്‍ അര്‍ജന്‍റീനയുടെ ജഴ്സിയ്ക്ക്
ഓര്‍ഡര്‍ നല്‍കി ഞാന്‍ ഓസ്റ്റിനുമൊത്ത് ജയന്‍ ചേട്ടന്‍റെ പെങ്ങളുടെ കല്യാണത്തിന് പങ്കെടുക്കാനായി കാസര്‍ഗോഡേയ്ക്ക് യാത്രയായ ദിവസം. ജൂണ്‍ 16 2006 ആദ്യ മത്സരത്തില്‍ ഐവറികോസ്റ്റിനെ തകര്‍ത്ത അര്‍ജന്‍റീനാ സെര്‍ബിയയുമായി മത്സരത്തിനിറങ്ങുന്ന
ദിവസം. 24 പാസ്സുകള്‍ക്ക് ശേഷം കാന്പിയോസ്സെ അടിച്ച ഗോള്‍ പിറന്ന മത്സരം.

മലബാറില്‍ മുഴുവന്‍ ഫ്ലെക്സുകള്‍ , കൂടുതലും ബ്രസീലിന്‍റേയും അര്‍ജന്‍റീനയുടെയും . അനന്തപുരിയിലേക്കാളും വീറും വാശിയും ഉശിരും ആവേശവും മലബാറുകാര്‍ക്ക് തന്നെ സംശയം വേണ്ട.

കാസര്‍ഗോഡ് നിന്ന് തിരികെയെത്തി ഷംനാര്‍ , രാകേഷ് , സന്പത്ത്, നിശാന്ത്, ശ്രീറാം, മനോജ് എന്നീ സുഹൃത്തുക്കളോടൊത്ത് ഒരു തീരുമാനത്തിലെത്തി, ജര്‍മ്മനിയുമായുള്ള മത്സരത്തിന്‍റെ അന്ന് ആംഫി തിയേറ്ററില്‍ ജഴ്സി അണിഞ്ഞ് നമ്മുടെ ടീമിനെ പ്രോത്സാഹിപ്പിക്കാന്‍ എത്തും എല്ലാവരും.

ജൂണ്‍ 30 2006 വെള്ളിയാഴ്ച്ച, ജര്‍മ്മനിയുമായുള്ള മത്സരത്തിന് അര്‍ജന്‍റീന തയ്യാര്‍ , മെയില്‍ യുദ്ധത്തിന് ശേഷം വീട്ടിലെത്തി ജഴ്സിയും അണിഞ്ഞ് ഞാനും തിരികെയെത്തി. ആംഫിയുടെ വാതില്‍ത്തുറന്ന് അകത്തേക്ക് കടന്നതും എവിടെനിന്നോ കൂവലുയര്‍ന്നു....

ഇരുണ്ട വെളിച്ചത്തില്‍ ആരാണ് കൂവിയതെന്ന് തിരിച്ചറിഞ്ഞില്ല. സ്ക്രീനിലെ ചിത്രത്തില്‍ നാഷ്ണല്‍ ആന്തത്തിനായി ടീമുകള്‍ അണിനിരന്നു. എന്‍റെ ജഴ്സി സുഹൃത്തുക്കളിലൊന്നിനെയും കാണ്മാനായില്ല. ആരും ജഴ്സി അണിഞ്ഞു
വന്നില്ലെന്ന് മാത്രമല്ല അവിടെ വന്നിട്ടേ ഇല്ല. ദുഷ്ടന്മാര്‍ ....

'രജിത്തേട്ടാ ജഴ്സി വെറുതേ ആവുമല്ലോ....ഹോം ടീമിനോടാ കളി......' ആരുടെയോ ശബ്ദം..

'പിന്നെ...ഒന്ന് പോടാ....ഫോമില്‍ കളിക്കുന്ന ടീം എന്തിന് ഹോം ടീമിനെ പേടിക്കണം? ' തിരികെ വിളിച്ചു പറഞ്ഞു....

അര്‍ജന്‍റീനന്‍ ആരാധകരുടെ ആര്‍പ്പുവിളികളോടൊപ്പം നില്‍ക്കുന്നു ജര്‍മ്മന്‍ പിന്തുണക്കാര്‍ . അല്ല അവരാരും ജര്‍മ്മന്‍ ആരാധകരല്ല, ബ്രസീലിന്‍റെയും ഇംഗ്ലണ്ടിന്‍റെയും ആരാധകരാണവര്‍ അല്ലെങ്കില്‍ എന്നെ എതിര്‍ക്കാനായി ജര്‍മ്മന്‍കാരായവര്‍ . ചെറു നീക്കങ്ങളുമായി ആദ്യ പകുതി കടന്നുപോയി. രണ്ടാം പകുതി തുടങ്ങി റോബര്‍ട്ട് അയാലയിലൂടെ അര്‍ജന്‍റീന മുന്നിലെത്തിയപ്പോള്‍ ഇളകി മറിയുകയായിരുന്നു നമ്മള്‍ അര്‍ജന്‍റീനക്കാര്‍ .

എഴുപത്തിയൊന്നാം മിനുട്ടില്‍ ഗോള്‍കീപ്പര്‍ അബോണ്ഡെസ്സേരി പരിക്കേറ്റതിനാല്‍ ആദ്യ സബ്സ്റ്റിട്ട്യൂഷന്‍ നടത്തി അര്‍ജന്‍റീന. വിജയത്തിലേക്ക് നീങ്ങുകയാണെന്ന് തോന്നിയ നിമിഷത്തില്‍ കളിയുടെ ഒഴുക്ക് തന്നെ തടഞ്ഞു കൊണ്ട് പ്ലേമേക്കര്‍ റിക്വല്‍മിയെ പിന്‍വലിച്ച് പെക്കര്‍മാന്‍ ആദ്യ മണ്ടത്തരം കാണിച്ചു. എണ്‍പതാം മിനുട്ടില്‍ ഞങ്ങളെ ഞെട്ടിച്ചു കൊണ്ടു ക്ലോസ് അര്‍ജന്‍റീനിയന്‍ വല ചലിപ്പിച്ചു.

മത്സരം പെനാല്‍റ്റിയിലേക്ക് നീങ്ങിയപ്പോള്‍ അത് കാണാന്‍ ശക്തിയില്ലാതെ ഞാന്‍ ആംഫിയുടെ ഒരു മൂലയില്‍ പുറം തിരിഞ്ഞു നിന്നു. 4-2ന് മത്സരം തോറ്റപ്പോളേക്കും എന്നെ എന്‍റെ കൂട്ടുകാര്‍ (മറ്റ് ടീമിന്‍റെ ആരാധകര്‍ ) വളഞ്ഞിരുന്നു. കൂക്കുവിളികളും
കളിയാക്കലുകളുമായി അവരുടെ നടുവില്‍ . അതിനിടയ്ക്ക് ദീപു ചേട്ടന്‍ ഫോണൊക്കെ ചെവിയില്‍കൊണ്ടു വച്ചുതരുന്നു. മറുതലയ്ക്കല്‍ നിന്ന് കൂകി വിളിക്കുന്ന വിപിന്‍ ചേട്ടന്‍ , വീണ്ടും പലരുടെയും മൊബൈലില്‍ പല കോളുകള്‍ . ആംഫിയുടെ ഇരുട്ടില്‍ കണ്ണുകളില്‍
രൂപപ്പെട്ടുവന്ന കണ്ണുനീരുകളെ അവര്‍ കണ്ടില്ലെന്നുള്ളത് ഉറപ്പ്. അര്‍ജന്‍റീന പുറത്തായെന്ന ഞെട്ടലില്‍ നിയന്ത്രിക്കാനാവാതെ പൊട്ടിക്കരയുമെന്ന് തോന്നിയ ആ നിമിഷം, എന്തോ പെട്ടന്ന് എല്ലാം നിര്‍ത്തി അവര്‍ പിന്‍വാങ്ങി. ഇല്ലായിരുന്നെങ്കില്‍ അതും അവര്‍ കാണേണ്ടി വന്നേനെ.....
അന്ന് രാത്രി ദീപുചേട്ടനെ വീട്ടില്‍ കൊണ്ടുവിടാനായി വണ്ടിയില്‍ യാത്രതിരിച്ചപ്പോള്‍ അര്‍ജന്‍റീനയുടെ തോല്‍വിയില്‍ പ്രകൃതിയും പങ്കുകൊണ്ടു. തിരികെ മഴ നനഞ്ഞ് വീട്ടിലേക്കുള്ള യാത്രയില്‍ , ചാര്‍ളി ചാപ്ലിന്‍ പറഞ്ഞ വാക്കുകള്‍ ഓര്‍ത്തപ്പോള്‍ , മഴ ഒരു അനുഗ്രഹമായി തോന്നി.
'ഞാന്‍ എപ്പോഴും മഴയത്ത് നടക്കുവാന്‍ ആഗ്രഹിക്കുന്നു, അതുകൊണ്ട് ഞാന്‍ കരയുന്നത് ആരും കാണില്ലല്ലോ?'

ഞാന്‍ ഇന്നും ഓര്‍ക്കുന്നു അന്നൊരു വെള്ളിയാഴ്ച്ചയായിരുന്നു. മറ്റേതൊരു പ്രവൃത്തി ദിവസമായിരുന്നെങ്കിലും പിറ്റേന്ന് ഓഫീസിലെ സഹപ്രവര്‍ത്തകരുടെ കളിയാക്കലുകള്‍ക്ക് വിധേയനാകേണ്ടി വരുമായിരുന്നു എനിക്ക്.....രണ്ടു ദിവസത്തേ അവധിയ്ക്ക് ശേഷം തിരികെ ഓഫീസിലെത്തിയപ്പോള്‍ എന്നെ കളിയാക്കാന്‍ ആരും ഉണ്ടായിരുന്നില്ല കാരണം
അര്‍ജന്‍റീന പിടഞ്ഞ് വീണ പിറ്റേ ദിവസം ബ്രസീലും ഇംഗ്ലണ്ടും കരിഞ്ഞു വീണിരുന്നു........
ഇപ്രാവശ്യം ലോകകപ്പ് ആഘോഷിക്കാന്‍ പല സുഹൃത്തുക്കളും ഓഫീസിലില്ല എന്നെനിക്കറിയാം , ഇനി അറിയേണ്ടത് ഒന്ന് മാത്രം അര്‍ജന്‍റീന ഉണ്ടാകുമോ എന്തോ?
അര്‍ജന്‍റീന......തിരിച്ചടികളില്‍ തളരാതെ ഫിനിക്സ് പക്ഷിയെപ്പോലെ പറന്നുയരൂ.....ഒരായിരം പ്രാര്‍ത്ഥനകള്‍ നിങ്ങളോടൊപ്പമുണ്ട്.

ഇന്‍ ഗോസ്റ്റ് ഹൌസ് ഇന്‍

2009-08-11T08:15:00.000-07:00

വര്‍ഷങ്ങള്‍ക്ക് മുമ്പ് മലയാള മനസ്സുകളെ രസിപ്പിച്ച് കടന്നു പോയവരാണ് മഹാദേവനും, അപ്പുകുട്ടനും, ഗോവിന്ദന്‍ കുട്ടിയും തോമസ്‍ കുട്ടിയും. പഴയ ആ സ്വാഭാവികത അവകാശപ്പെടാനില്ലായിരിന്നിട്ട് കൂടി ലാല്‍ അവതരിപ്പിച്ച 2 ഹരിഹര്‍ നഗര്‍ പ്രേക്ഷകരെ മടുപ്പിക്കാതെ തിയേറ്ററുകളില്‍ വിജയകരമായി പ്രവര്‍ത്തിച്ചു വരുന്നതിന്റെ ആവേശം കെട്ടടങ്ങുന്നതിന് മുമ്പ് ദാ മറ്റൊരു വാര്‍ത്ത കൂടി...

ഹരിഹര്‍ നഗര്‍ മൂന്നാം ഭാഗം ഇറങ്ങുന്നു....
പുതിയ ചിത്രത്തിന്റെ പേര് ...ഇന്‍‍ ഗോസ്റ്റ് ഹൌസ് ഇന്‍....
ഹാരിപോട്ടര്‍ സീരീസ് പോലെ ഒരു ഹരിഹര്‍ നഗര്‍ സീരീസ് ആണോ ലാല്‍ ഉദ്ദേശിക്കുന്നതെന്ന് അറിയില്ല. ഇതെല്ലാം കണ്ട് സിദ്ദിക്കിന്(സിദ്ദിക്ക്-ലാല്‍) ഒരു ഹരിഹര്‍ നഗര്‍ വെര്‍ഷന്‍ 4 ഇറക്കണമെന്ന് തോന്നിയാല്‍ പ്രേക്ഷകര്‍ക്ക് വീണ്ടും കുശാലായി, വര്‍ഷാ വര്‍ഷം ഓരോ ഹരിഹര്‍ നഗര്‍ വെര്‍ഷന്‍ കാണാം.

അധികമായാല്‍ അമൃതും വിഷമാണെന്നാണ്, എന്തായാലും ഇത് വിഷമാകാതിരിക്കട്ടെ എന്ന് ആശിക്കുന്നു.....

കൈയ്യെത്തും ദൂരെ.....

2009-08-07T08:06:00.000-07:00

ഭ്രമരം : ഭ്രമിപ്പിക്കുന്ന ക്ലാസ്സിക്

2009-07-23T09:07:00.000-07:00

എന്‍റെ ഈ പോസ്റ്റ് വായിക്കുന്പോള്‍ നിങ്ങളുടെ മനസ്സിലേക്ക് ആദ്യം ഓടിയെത്തുന്നത് 'ആറിയ കഞ്ഞി പഴങ്കഞ്ഞി' എന്നായിരിക്കും. പലരും റിവ്യൂ ചെയ്ത് കഴിഞ്ഞ ഭ്രമരത്തെക്കുറിച്ച് ഇനിയൊരു റിവ്യൂ ആവശ്യമുണ്ടെന്ന് തോന്നുന്നില്ല പക്ഷേ ഇന്നലെ ഭ്രമരം കണ്ടിറങ്ങിയപ്പോള്‍ മുതല്‍ മനസ്സ് പറയുന്നുണ്ടായിരുന്നു ഇത് എന്തായാലും പോസ്റ്റ് ചെയ്യണമെന്ന്.

പല ദിക്കുകളില്‍ നിന്നും ആദ്യമേ കേട്ടതായിരുന്നു 'ലാലേട്ടന്‍റെ മികച്ച് 10 കഥാപാത്രങ്ങളിലൊന്നാണ്' ഭ്രമരത്തിലെ ശിവന്‍കുട്ടിയെന്ന് .ആദ്യ ആഴ്ച് തന്നെ കാണണമെന്ന് വിചാരിച്ചെങ്കിലും പല കാരണങ്ങളാലും അത് മുടങ്ങി. 'പടം കണ്ടോ' എന്ന് ചോദിക്കുന്ന കൂട്ടുകാരോട് ഇല്ല എന്ന് പറയുന്നത്, 'താന്‍ എന്ത് മോഹന്‍ലാല്‍ ഫാന്‍ ഊവേ' എന്ന അവരുടെ മറുപടിയുമാക്കെയായി ആഴ്ചകള്‍ അങ്ങനെ കഴിഞ്ഞ് പോയി. പതുക്കെ പതുക്കെ പടത്തിനെക്കുറിച്ച് ആവറേജ്, 'ലാലേട്ടന്‍ കൊള്ളാം' എന്നൊക്കെ റിപ്പോര്‍ട്ടുകളും കേട്ടുതുടങ്ങി. ചിലര്‍ പറഞ്ഞു 'ബുദ്ധിജീവികളാണ് പടം സൂപ്പര്‍ എന്ന് പറയുന്നത് ' 'സാധാരണക്കാര്‍ക്ക് ആവറേജ് എന്നെ തോന്നുള്ളു'. എത്ര എത്ര പടങ്ങള്‍ ആരവങ്ങളും ആവേശങ്ങളുമായി
കണ്ടിരിക്കുന്നു, ലാലേട്ടന്‍റെയും ബ്ലെസ്സിയുടേയും ഈ ക്ലാസ്സിക് ആരവങ്ങളില്ലാതെ കാണുവാനായിരിന്നിരിക്കും വിധി.

ചിത്രത്തിന്‍റെ സാങ്കേതികതയെയും തിരക്കഥയെയുമെല്ലാം കീറി മുറിച്ച് വിശകലനം ചെയ്യാനൊന്നും എനിക്കറിയില്ല. ഒറ്റവാക്കില്‍ പറഞ്ഞാല്‍ പടം എനിക്ക് ഇഷ്ടപ്പെട്ടു... വളരെയേറെ ഇഷ്ടപ്പെട്ടു...

ഇനി ഞാന്‍ ഒരു 'ബുദ്ധി ജീവി ' ആയത് കൊണ്ടാണോ? എന്ന് ചോദിച്ചാല്‍ :)

ഭ്രമരത്തിലെ ശിവന്‍കുട്ടിയുടെ ഭാവമാറ്റം കാണുവാന്‍ തിരുവനന്തപുരം ശ്രീകുമാര്‍ തിയേറ്ററില്‍ ബാല്‍ക്കണി 90 ശതമാനവും താഴെ 70 ശതമാനവും നിറഞ്ഞിരുന്നു. റിലീസ് കഴിഞ്ഞ് ഇത്ര ദിവസമായതും, പുതിയ പടങ്ങളായാലും വ്യാജ സിഡിയിലൂടെ കാണുകയെന്നതുമൊക്കെയാവാം കാരണമെന്ന് കരുതി ആശ്വസിച്ചു. ബാല്‍ക്കണിയില്‍ സാമാന്യം നല്ല രീതിയില്‍ ഫാമിലി സാന്നിധ്യമുണ്ടായിരുന്നു.

മാറി മറിയുന്ന ഭാവങ്ങള്‍ ‍, നെഗറ്റീവ് ടച്ച് എന്നിവ ഇത്രമേല്‍ മനോഹരമായി അവതരിപ്പിക്കാന്‍ ലാലേട്ടനല്ലാതെ ആരുമില്ലെന്ന വീണ്ടും വീണ്ടും തെളിയിക്കുകയാണ് ശിവന്‍കുട്ടി.ആ മഹാപ്രതിഭയുടെ അഭിനയത്തെക്കുറിച്ച് പ്രകീര്‍ത്തിച്ചു സംസാരിക്കാന്‍ ഞാനാളല്ല. അത് വേണ്ടുവോളം മഹാന്മാരായ പലരും മുന്പ് പറഞ്ഞിട്ടുണ്ട്. ലക്ഷ്മി ഗോപാലസ്വാമി,മുരളീകൃഷ്ണന്‍ ‍, ബേബി നിവേദിത എന്നിവര്‍ തങ്ങളുടെ കഥാപാത്രങ്ങളെ മികച്ചതാക്കി.

ഇന്നേവരെ മലയാളസിനിമ കണ്ടിട്ടില്ലാത്ത രീതിയിലുള്ള ക്യാമറ ആംഗിളുകളും ക്രെയിന്‍ഷോട്ടുകളും ജീപ്പ് ഷോട്ടുകളുമായി ബ്ലെസ്സിയും
അജയന്‍ വിന്‍സെന്‍റും ഭ്രമരം വളരെ ഹൃദ്യമായിതന്നെ ചിത്രീകരിച്ചിട്ടുണ്ട്. ലാലേട്ടനിലെ പ്രതിഭ കഥാപാത്രത്തിലേക്ക് ആവാഹിച്ചെടുക്കാന്‍ കഴിഞ്ഞു എന്നത് ബ്ലെസ്സിയുടെ കഴിവ് തന്നെ.

ചിത്രത്തിലെ രണ്ട് ഗാനങ്ങളും ഇമ്പമേറിയതാണ്. ചിത്രത്തില്‍ വേണ്ട വിധം ഉപയോഗിച്ചിട്ടുണ്ടെങ്കിലും ശ്രോതാവെന്ന നിലയില്‍ "അണ്ണാറക്കണ്ണാ വാ... " എന്ന ഗാനം മുഴുവനായി കേള്‍ക്കാനായില്ലല്ലോ എന്ന ദുഃഖം ബാക്കി നില്‍ക്കുന്നു.

ഭ്രമരം എന്നത് ഒരു ക്ലാസ്സികാണ്, ഭ്രമിപ്പിക്കുന്ന ഒരു ക്ലാസ്സിക്.
മലയാള സിനിമയെ സ്നേഹിക്കുന്നവര്‍ ഈ സിനിമ കണ്ടിരിക്കും അത് തീര്‍ച്ച...

ആദരാഞ്ജലികൾ: ലോഹിതദാസ്

2009-06-27T23:39:00.000-07:00

പ്രശസ്ത തിരക്കഥാകൃത്തും സംവിധായകനുമായ ലോഹിതദാസ് അന്തരിച്ചു.

വിക്കിപീഡിയയില്‍‍ നിന്നുള്ള വിവരങ്ങള്‍‍‍

ചിത്രങ്ങള്‍ (തിരക്കഥ)
വീണ്ടും ചില വീട്ടുകാര്യങ്ങള്‍ (1999)
ഭൂതക്കണ്ണാ‍ടി (1997)
സല്ലാപം (1996)
തൂവല്‍ക്കൊട്ടാരം (1996)
വെങ്കലം (1993)
കൗരവര്‍ (1992)
ആധാരം (1992)
കമലദളം (1992)
അമരം (1991)
ഭരതം (1991)
ഹിസ് ഹൈനസ് അബ്ദുള്ള (1990)
സസ്നേഹം (1990)
കിരീടം (1989)
കുടുംബപുരാണം (1988)
തനിയാവര്‍ത്തനം (1987)

സംവിധാനം ചെയ്ത ചിത്രങ്ങള്‍
വര്‍ഷം ചലച്ചിത്രം അഭിനയിച്ചവര്‍
1997 ഭൂതക്കണ്ണാടി മമ്മൂട്ടി, ലക്ഷ്മി,
1997 കാരുണ്യം ജയറാം, ദിവ്യ ഉണ്ണി, മുരളി
1998 ഓര്‍മച്ചെപ്പ് ലാല്‍, ദിലീപ്, ചഞ്ചല്‍, ബിജു മേനോന്‍
1998 കന്മദം മോഹന്‍ലാല്‍, മഞ്ജു വാരിയര്‍, ലാല്‍
2000 അരയന്നങ്ങളുടെ വീട് മമ്മൂട്ടി, ലക്ഷ്മി ഗോപാലസ്വാമി, കവിയൂര്‍ പൊന്നമ്മ
2000 ജോക്കര്‍ ദിലീപ്, മന്യ, നിഷാന്ത് സാഗര്‍
2001 സൂത്രധാരന്‍ ദിലീപ്, മീര ജാസ്മിന്‍
2003 കസ്തൂരിമാന്‍ കുഞ്ചാക്കോ ബോബന്‍, മീര ജാസ്മിന്‍
2003 ചക്രം പൃഥ്വിരാജ്, മീര ജാസ്മിന്‍
2005 കസ്തൂരിമാന്‍ (തമിഴ്) പ്രസന്ന, മീര ജാസ്മിന്‍
2006 ചക്കരമുത്ത് ദിലീപ്, കാവ്യാ മാധവന്‍
2007 നിവേദ്യം വിനു മോഹന്‍ ‍, ഭാമ, നെടുമുടി വേണു

ആദരാഞ്ജലികള്‍ : മൈക്കിള്‍ ജാക്സണ്‍

2009-06-25T18:50:00.000-07:00

വിഖ്യാത പോപ്പ് ഗായകന്‍‍ മൈക്കിള്‍‍ ജാക്സണ്‍‍ അന്തരിച്ചു.
വാര്‍ത്ത, ഐ.ബി.എന്‍

മരണകാരണങ്ങള്‍‍ വ്യക്തമല്ല.(ഹൃദയസ്തംഭനമാണെന്ന് കരുതപ്പെടുന്നു..)

ഐ.പി.എല്‍൨൦൧൦ 2010 : സിറ്റി ക്രിക്കറ്റേര്‍സ്

2009-06-20T20:21:00.000-07:00

കേരളത്തിനും സ്വന്തമായൊരു ഐ.പി.എല്‍ ടീം ഉണ്ടാകാന്‍ പോകുന്നോ?. ഇന്നലെ ചില പത്രങ്ങളില്‍ വന്ന റിപ്പോര്‍ട്ട് പ്രകാരം കാര്യങ്ങള്‍ നടന്നാല്‍ 2010 സീസണില്‍ കേരളത്തില്‍ നിന്നൊരു ടീം ഐ.പി.എല്‍ കളിക്കും. " സിറ്റി ക്രിക്കറ്റേര്‍സ്."

വര്‍ഷങ്ങള്‍ക്ക് മുമ്പ് തിരുവനന്തപുരത്തുണ്ടായിരുന്ന ക്രിക്കറ്റ് ക്ലബ്ബിന്റെ സാരഥികളാണ് ഈ സംരംഭത്തിന് പിന്നില്‍. അവരാരെന്ന് അറിയേണ്ടേ അന്ന് ടീമിന്റെ ഓപ്പണിങ്ങ് ബാറ്റ്സ്മാനായിരുന്ന പ്രിയദര്‍ശനും പിഞ്ച് ഹിറ്ററും ഓള്‍റൌണ്ടറുമായിരുന്നു മലയാളികളുടെ പ്രിയപ്പെട്ട ലാലേട്ടനും.
ടീമിന്റെ ചെയര്‍മാന്‍ , ടെക്നിക്കല്‍ ഡയറക്ടര്‍ എന്നിവരാരാണെന്ന് അറിയണമെങ്കില്‍ ദാ ഇവിടെ നോക്കു.

മലയാളികള്‍ക്ക് മധുരമേറിയ അനവധി സിനിമകള്‍ സമ്മാനിച്ച ഈ ജോടിക്ക് ഐ.പി.എലിലും അത് സാധിക്കട്ടെ എന്നാശംസിക്കുന്നു(എല്ലാം ശരിക്ക് നടന്നാല്‍)

ദ് ഫെയ്ക്ക് ഐ.പി.എല്‍‍ പ്ലേയര്‍‍

2009-04-24T06:47:00.000-07:00

ഐ.പി.എല്‍‍-നെക്കാള്‍‍ പ്രചാരം നേടിയ ഒരു ബ്ലോഗ്. എന്ത് കൊണ്ട്..

ഇത് കൊല്‍‍ക്കത്ത നൈറ്റ് റൈഡേര്‍‍സിന്‍റെ ഒരു ടീം അംഗം തന്നെയാണ് എഴുതുന്നതെന്ന് ലോകം വിശ്വസിക്കുന്നു.(അല്ലെങ്കില്‍‍ ബ്ലോഗര്‍‍ വിശ്വസിപ്പിക്കുന്നു....)

കാര്യമെന്തായാലും അണിയറ രഹസ്യമായ പല കാര്യങ്ങളും ഇപ്പോള്‍‍ തന്നെ പുറത്ത് വിട്ട ബ്ലോഗര്‍‍‍ ഇതിനകം തന്നെ ക്രിക്കറ്റ് ലോകത്തെ ചര്‍ച്ചാ വിഷയമായി കഴിഞ്ഞു.....

എപ്രില്‍‍ മാസം മാത്രം ൨൬ ഇരുപത്തിയാറ് പോസ്റ്റുകളുമായി "ദ് ഫെയ്ക്ക് ഐ.പി.എല്‍‍ പ്ലേയര്‍‍ " മുന്നേറുന്പോള്‍ എന്ത് വിലകൊടുത്തും ആളെ കണ്ട് പിടിക്കുമെന്ന് ടീം മാനേജ്മെന്‍റും പ്രഖ്യാപിച്ച് കഴിഞ്ഞു....

ലിങ്ക് ദാ ഇവിടെ.....

അറിയാമോ?

2009-03-09T23:53:00.000-07:00

നോ ഫ്രീഡം ഓണ്‍ലൈന്‍

2009-03-05T03:55:00.000-08:00

താങ്കളൊരു ബ്ലോഗറാണോ? എന്നാല്‍ ഇങ്ങോട്ടൊന്ന് ശ്രദ്ധിക്കു.

അടുത്ത പ്രാവശ്യം ഒരു പോസ്റ്റിടുന്പോള്‍ താങ്കള്‍ നിയമം ലംഘിക്കുന്നില്ലെന്ന് ഉറപ്പ് വരുത്തുക.

ഇനി ഈ ലിങ്കിവിടെ പോസ്റ്റിയത് നിയമലംഘനമാണോയെന്ന് എനിക്കറിയില്ല.

തൃശൂര്‍ മേരി ജാന്‍

2009-03-01T02:17:00.000-08:00

ഇന്നലെ(ജനുവരി 4) പകല്‍ മുഴുവന്‍ ചിലവഴിച്ചത് കേരളത്തിന്‍റെ സാംസ്കാരിക തലസ്ഥാനത്തിലായിരുന്നു. ശ്രീമാന്‍ ഷോബിയുടെ അമേരിക്കന്‍ കല്യാണം കൂടാന്‍ പോയ മുപ്പതിന് മുകളില്‍ ‍(വയസ്സല്ല... അംഗസംഖ്യ) വരുന്ന സംഘത്തിലെ അംഗമായിരുന്നു ഞാനും......(അതിപ്പോ ഏത് കല്യാണമാ വെറുതേ വിടുന്നേ എന്ന് നിങ്ങള്‍
ചിന്തിക്കുന്നുണ്ടെന്നെനിക്കറിയാം.. ഞാന്‍ ക്ഷമിച്ചിരിക്കുന്നു....)
വളരെ ടൈറ്റ് ഷെഡ്യൂളില്‍ കോ-ഓര്‍ഡിനേറ്റ് ചെയ്തൊരു യാത്രയായതിനാല്‍ ‍(തൊട്ട് തലേന്ന് പലര്‍ക്കും വേറെയൊരു കല്യാണം കൂടാനുണ്ടായിരുന്നു, സോറി.. എനിക്ക് ക്ഷണമുണ്ടായിരുന്നില്ല) അധികമൊന്നും പറയാന്‍ ഇല്ല ജസ്റ്റ് രണ്ട് ഇന്‍സിഡന്‍റസ്......

നിരപരാധി
ബിക്കാനെര്‍ എക്സ്പ്രസ്സിലെ യാത്രാക്ഷീണവും ചാണ്ടീസ് ടൂറിസ്റ്റ് ഹോമിലെ ഉറക്കക്ഷീണവുമുണ്ടായിരുന്നെങ്കിലും രാവിലെ തന്നെ വടക്കുന്നാഥ ക്ഷേത്ര ദര്‍ശനത്തിനായി നമ്മളെല്ലാവരും റെഡിയായിറങ്ങി....
മെയ് മാസത്തിലെ പൂരത്തിന് വേണ്ടി അണിഞ്ഞൊരുങ്ങുകയാണ് തൃശൂര്‍ റൌണ്ടും വടക്കുന്നാഥക്ഷേത്ര പരിസരവും...ചുറ്റും കണ്ണെടുക്കാന്‍ തോന്നാനാവാത്ത 'പ്രകൃതി' ഭംഗി...

ഷിബുവിന് ആദ്യമായി, ജിമ്മില്‍ പോകുന്നതിന്‍റെ ഗുണം മനസ്സിലായി...നമ്മളൊക്കെ അംമ്പലത്തിലെത്തി ഷര്‍ട്ടൂരി ഫാമിലി പാക്കും (നമുക്കെവിടെ സിക്സ് പാക്ക് മസില്‍) ചള്ള് ബോഡിയുമൊക്കെ ആരെലും ശ്രദ്ധിക്കുന്നുണ്ടോ എന്ന ചിന്തയോടെ പ്രദക്ഷിണം വച്ചപ്പോള്‍ അളിയന്‍ ഒരു ബോഡിഷോയ്ക്ക്(വിത്തൌട്ട് മ്യൂസിക്ക്) ഉള്ള അവസരം കിട്ടിയ
സന്തോഷത്തിലായിരുന്നു.......

ക്ഷേത്ര ദര്‍ശനവും കഴിഞ്ഞ് വീണ്ടും വടക്കുന്നാഥനെ കാണാന്‍ വരണമെന്ന തീരുമാനത്തോടെ നമ്മളെല്ലാരും പ്രാതലിനായി പത്തന്‍സിലേക്ക് നടന്നു നീങ്ങുകയാണ്....

അങ്ങിങ്ങ് കാണുന്നവരോട് ആരെങ്കിലുമൊക്കെ വഴി ചോദിക്കുന്നുണ്ട്... രസകരമായ തൃശൂര്‍ സ്ലാംഗ് കേള്‍ക്കാനുള്ള കൊതി കൊണ്ടായിരുന്നു ഇത്....
ആല്‍മരത്തിനെയും കൊത്ത് പണികളെയും ബാക്ക് ഗ്രൌണ്ടാക്കി രമേശന്‍ തന്‍റെ ഫോട്ടോഗ്രാഫി സ്കില്‍ തെളിയിക്കുകയാണ്....
നമ്മുടെയെല്ലാം വളരെ മുന്നില്‍ പാലക്കാടുകാരന്‍ ജയകുമാര്‍ ഫോണിലൂടെയുള്ള നൈറ്റ് ഡ്യൂട്ടിക്ക് ശേഷം മോണിംഗ് ഡ്യൂട്ടിയുമായി നടന്നകലുന്നു....

ഏറെ ദൂരം ചെന്നില്ല റോഡ് സൈഡില്‍ ഒതുങ്ങി നിന്ന് സീരിയസ് മാറ്റര്‍ ഡിസകസ് ചെയ്യുകയായിരുന്ന ജയകുമാറിന്‍റെ മേനിയിലേക്ക് വളഞ്ഞ് പുളഞ്ഞ് വന്ന ഹോണ്ടാ ആക്ടിവ പാഞ്ഞു കയറി....
തന്‍റെ അനായാസമായ മെയ്യവഴക്കത്തോടെ പരിക്കൊന്നും കൂടാതെ ജയകുമാര്‍ ചാടിയെണീറ്റെങ്കിലും സാമാന്യം നല്ല വിധത്തിലുള്ള പാച്ച് വര്‍ക്കുകളോടെ ആ മധുരപ്പതിനേഴ്കാരി അപ്പോഴും ആക്ടിവയ്ക്ക്ടിയിലാണ്.....

ലോകത്ത് എവിടെ ഇങ്ങനെയുള്ള ആക്സിഡന്‍റ് നടന്നാല്‍ സംഭവിക്കുന്നത് തന്നെ അവിടെയും സംഭവിച്ചു... ആ പരിസരത്തുണ്ടായ സകല ചുള്ളന്മാരും ആ സ്പോട്ടിലേക്ക് പാഞ്ഞെത്തി....

ചെറിയ ചെറിയ ഉന്തും തള്ളും, ഒന്ന് രണ്ട് കവിളില്‍ കുത്തുമൊക്കെയായി അവര്‍ ജയകുമാറിനെ ഘരാവോ ചെയ്ത് തുടങ്ങിയപ്പോഴേക്കും നമ്മള്‍ നാലഞ്ച് പേര്‍ അവിടെ ഓടിയെത്തി.....

ഓടിവന്ന നമ്മള്‍ കേട്ടത് ഇതാണ്.....
തനി തൃശൂര്‍ സ്ലാംഗില്‍ നമ്മുടെ കഥാനായിക....(അത് പറയാന്‍ ഞാന്‍ അത്ര പോര...)

'അയ്യോ... ആ ചേട്ടന്‍ നിരപരാധിയാണ്..... ആ ചേട്ടന്‍ അല്ല .......'
അവള്‍ പറഞ്ഞ് പൂര്‍ത്തിയാക്കുന്നതിന് മുന്പ് തന്‍റെ കൈയ്യിലെ എന്‍70 വലിച്ചെറിഞ്ഞ് ജയകുമാര്‍ ചാടി വീണു......

'ബെല്ലും ബ്രേക്കുമില്ലാതെ എന്‍റെ മേത്തേക്ക് വലിഞ്ഞ് കേറിയതും പോര ഞാന്‍ നിരപരാധിയാണെന്നോ.... നീയാണെടി നിരപരാധി.......'
അവിടെത്തുടങ്ങിയ ചിരി പത്തന്‍സിലേ മസാലദോശ കഴിക്കുന്പോഴും അവസാനിച്ചിട്ടില്ലായിരുന്നു.... നമ്മള്‍ അന്വേഷിക്കുകയാണ്.... പാലക്കാട് നിരപരാധി എന്ന് പറഞ്ഞാല്‍ എന്താ അര്‍ത്ഥം.........

പ്ലാറ്റ്ഫോം
ഓടിക്കിതച്ചാണെങ്കിലും പ്ലാറ്റ്ഫോമിലെത്തിയപ്പോള്‍ സമാധാനമായി ട്രെയിന്‍ ഇത് വരെ എത്തിയിട്ടില്ല.തൃശൂര്‍ പൂരം ഇവിടെയാണോ നടക്കുന്നതെന്ന് തോന്നി തിരക്ക് കണ്ടപ്പോള്‍ .
'അല്ല വേണ്ടാട് ഇനി ഇവിടെത്തന്നെയല്ലെ വരുന്നത്... വേറെ വല്ല പ്ലാറ്റ്ഫോമിലും... '
ആരോ ഒരു ഡൌട്ട് പറഞ്ഞു....

പറഞ്ഞ് തീര്‍ന്നില്ല ഡൌട്ട് ക്ലിയര്‍ ചെയ്യാനായി ഷമീം ചാടിയിറങ്ങി... നിക്കാഹ് കഴിഞ്ഞ ശേഷം അവനിങ്ങനെയാണ്... വേണ്ടതും വേണ്ടാത്തിടത്തുമെല്ലാം തലയിടും... തനിക്ക് നല്ല പക്വതയായി എന്ന് നമ്മളെ ബോധ്യപ്പെടുത്താനായിട്ടാണെന്ന് തോന്നുന്നു.....

ഇന്‍ഫര്‍മേഷന്‍ കൌണ്ടറിലെത്തി അവിടുത്തെ സ്റ്റാഫിനോടായി ഷമീം....
'അതേ , ഇങ്ങളെത്തന്നെ, ഈ ട്രെയിന്‍ ഏത് പ്ലാറ്റ്ഫോമിലെത്തും......'
ഇവനാരെടാ എന്ന് ഭാവത്തോടെ സ്റ്റാഫ്....(സംഭവം ഓണ്‍ എയറിലാണ്... ക്യൂവിലുള്ള പലരും കേള്‍ക്കുന്നുണ്ട്....)

'എന്തൂട്ട്... ഏത് ട്രെയിന്‍ ?..... '

പ്ലാറ്റ്ഫോമില്‍ നില്‍ക്കുന്ന നമ്മളെ ചൂണ്ടിക്കാണിച്ചു കൊണ്ട് ഷമീം വീണ്ടും....
'നമ്മള് ബുക്ക് ചെയ്ത ട്രെയിന്‍ ഏത് പ്ലാറ്റ്ഫോമില്‍ വരുമെന്നാ ചോദിച്ചേ....'

സ്റ്റാഫ് ചേട്ടന്‍റെ മുഖത്ത് ഒരു പുച്ഛഭാവം... (പിന്നെ നീ എന്നോട് പറഞ്ഞിട്ടാണല്ലോ ബുക്ക് ചെയ്തേ എന്ന ഭാവം)

'നിങ്ങള്‍ ബുക്ക് ചെയ്ത ട്രെയിനല്ലേ... സൌകര്യം പോലെ ഏതെലും പ്ലാറ്റ്ഫോമില്‍ കൊണ്ടിട്ടോ.....'

കഷ്ടപ്പെട്ട് ഷമീമിനെ പിടിച്ച് വലിച്ച് കൊണ്ട് വരുന്പോഴും പുറകിലെ ക്യൂവിലെ കൂട്ടച്ചിരി
അവസാനിച്ചിട്ടില്ലായിരുന്നു......

വാല്‍ക്കഷണം : 'തൃശൂര്‍ മേരി ജാന്‍ ....' എന്തിന് ഇങ്ങനെ ഒരു പേര് ഇട്ടു എന്ന് ചോദിച്ചാല്‍ നിങ്ങള്‍ തൃശൂര്‍ക്ക് ഒന്ന് വാ.. അപ്പോ മനസ്സിലാവും... അല്ലാതെ രമേശന്‍ വിചാരിച്ച പോലെ 'തൃശൂരിലെ മേരി ജാന്‍ ' എന്നൊന്നും
വായിച്ചേക്കരുത്. കാര്യമെന്തായാലും ഇപ്രാവശ്യം തൃശൂര്‍ പൂരത്തിന് പോണുണ്ട്... വരണിണ്ട്രാ ഗഡികളെ............

റെഡ് ചില്ലീസ്:എന്നിലെ ലാല്‍ ആരാധകന്‍റെ റിവ്യു,

2009-02-22T05:48:00.000-08:00

സമയം കൊല്ലാന്‍ ഇന്നെന്ത് ചെയ്യുമെന്ന് ആലോചിച്ചിരുന്നപ്പോഴാണ് മികസഡ് റെസ്പോണ്‍സ് ലഭിച്ച് മുന്നേറുന്ന റെഡ് ചില്ലീസിന് പോയാലോ എന്ന ആലോചന വന്നത്.

തീയേറ്ററില്‍ ചെന്ന് ടിക്കറ്റുമെടുത്ത് ഷോ വിടാനായി കാത്തിരിക്കുമ്പോള്‍ ചുമ്മാ കൌണ്ടറുകളിലേക്ക് കണ്ണോടിച്ചു. പുരുഷന്മാരുടെ ക്യൂ എസ്.എല്‍ തിയേറ്റര്‍ കോംപ്ലക്സും കഴിഞ്ഞ് നീണ്ട് കിടക്കുന്നുണ്ടായിരുന്നു. സാമാന്യം നല്ലൊരു പങ്ക് സ്ത്രീകളും ചിത്രം കാണാന്‍ എത്തിയിട്ടുണ്ടെന്നുള്ളത് എന്നെ സന്തോഷവാനാക്കി(അയ്യേ അങ്ങനെയല്ല...പടം കുടുംബ പ്രേക്ഷകര്‍ കാണുമല്ലോ എന്നുള്ള സന്തോഷം). ഷോ വിട്ട് ആളുകള്‍ ഇറങ്ങി തുടങ്ങി . ഒരു ആവറേജ് തിരക്ക് മാത്രം...ആവറേജ് സിനിമയക്ക് ആവറേജ് തിരക്കല്ലെ പ്രതീക്ഷിക്കാവുള്ളു. ക്യൂവിലുള്ളത്രയും തന്നെ സ്ത്രീകള്‍ ഷോ വിട്ട് വരുന്നുണ്ടായിരുന്നു. കുടുംബങ്ങള്‍ ചിത്രം കാണാന്‍ വരുന്നതില്‍ മനസ്സ് സന്തോഷിച്ചു.....

പതുക്കെ പതുക്കെ ആ തിരക്ക് കുറഞ്ഞ് വന്നു.. വീണ്ടും കുറച്ച് സമയം കഴിഞ്ഞ് വീണ്ടും കലപില ശബ്ദങ്ങളും ചൂളം വിളികളും തിയേറ്ററില്‍ മുഴങ്ങി...അപ്പോഴാണ് കാര്യം മനസ്സിലായത് നേരത്തെ ഇറങ്ങിയത് ബില്ലു ബാര്‍ബര്‍ കണ്ടവരാണ്...ഇപ്പോ ഇറങ്ങിയവരില്‍ സ്ത്രീകള്‍ കുറവാണ്.
എന്റെ കൈയിലെ ടിക്കറ്റ് തിയേറ്ററിലെ സ്റ്റാഫിന് കൈമാറി അദ്ദേഹം കാണിച്ച സീറ്റ് കണ്ടപ്പോള്‍ ലാലേട്ടന്‍ ഇന്റര്‍വെല്ലിന് മുമ്പ് പറയുന്ന സില്‍ക്ക് എയറിന്റെ വിന്‍ഡോ സീറ്റാണ് ഓര്‍മ്മ വന്നത്..അത് പോലെ തിയേറ്ററിന്‍റെ മൂലയില്‍ (വിന്‍ഡോ ഇല്ലായിരുന്നെങ്കിലും) ഞാന്‍ ഇരിപ്പുറപ്പിച്ചു...

പത്മശ്രീ മമ്മൂട്ടിയ്ക്ക് നന്ദിയര്‍പ്പിച്ച് കൊണ്ട് തുടങ്ങിയ ചിത്രത്തില്‍ ആദ്യ മിനുട്ടില്‍ തന്നെ ലാലേട്ടന്റെ ഇന്ററോടെക്ഷനുണ്ട്. പിന്നീടങ്ങോട്ട് സിംഗപ്പൂര്‍ ചുള്ളന്മാരുടെയും ചുള്ളത്തികളുടെയും കൂടെയുള്ള ലാലേട്ടന്റെ നടപ്പ് മനംകുളിരുന്നതാണ്.

ഷാജി കൈലാസിന്റെ കിടിലന്‍ ഷോട്ടുകളും കലക്കന്‍ റീച്ചാര്‍ജ്ജും ടണ്‍ കണക്കിന് ഫണ്ണ് ഡയലോഗും നിറഞ്ഞിരുന്ന ഫസ്റ്റ് ഹാഫ് അവസാനിക്കുന്നത് സിദ്ദിക്കിനോടുള്ള ലാലേട്ടന്റെ തകര്‍പ്പന്‍ ഡയലോഗോടെയാണ്...

രണ്ടാം പകുതിയിലെ മികച്ച രംഗം എന്നെനിക്ക് തോന്നിയത് ആ കോടതി രംഗമാണ്. തന്റെ നിഷകളങ്കമായ ചിരിയുമായി ലാലേട്ടന്‍ എല്ലാരുടെയും മനസ്സ് വീണ്ടും കീഴടക്കുകയായിരുന്നു...രണ്ടാം പകുതിയില്‍ ഇടയ്ക്ക് പ്രേക്ഷകരെല്ലാരും ഒരു രണ്ട് മിനുട്ട് നേരം നിര്‍ത്താതെ കൂവി.(തിയേറ്ററില്‍ കറന്റ് പോയപ്പോള്‍)ഏതൊരു കുറ്റാന്വേഷണ ചിത്രത്തിലെന്ന പോലെ രണ്ടാം പകുതിയില്‍ ലാലേട്ടനും ശിങ്കിടികളും സത്യത്തിലേക്ക് നടന്നടുക്കുന്നതോടെ ചിത്രം അവസാനിക്കുന്നു...

ബിജുമോനോനും സിദ്ദിക്കും വിജയകുമാറും സുകുമാരിയും ചില്ലീസുമെല്ലാമുണ്ടെങ്കിലും എടുത്ത് പറയേണ്ട പ്രകടനം തിലകന്‍, മോഹന്‍ലാല്‍ എന്നീ നടന്മാരില്‍ നിന്ന് മാത്രമാണ്, അതില്‍ തന്നെ സഖാവ് മാണിയെ അവതരിപ്പിച്ച തിലകന്റെ റോള്‍ തീരെ ചെറുതായി പോയതായി തോന്നുന്നു.

ക്യാമറ ആംഗിളുകളും തീരത്തും ടെക്കി (സാറ്റ്ലൈറ്റ് ഫോണും, ഗൂഗിളും ഉപയോഗിക്കുന്ന)ആയുള്ള ലാലേട്ടന്റെ വേഷപകര്‍ച്ചയും പതിവ് പോലുള്ള അഭിനയവും പഞ്ച് ഡയലോഗും ഈ സിനിമയെ നല്ലൊരു എന്റര്‍ടെയിനറാക്കുന്നു.
ഷാജി കൈലാസിന്റെ ഈയടുത്തുള്ള സിനിമകള്‍ കണ്ട് ഞെട്ടിത്തരിച്ച് പോയ ജനങ്ങള്‍ക്ക് അല്പമെങ്കിലും ആശ്വാസം നല്‍കാന്‍ ഈ സിനിമയ്ക്കാവുമെന്ന് ഉറപ്പ്(ആറാം തമ്പുരാന്റെ അത്രയുമൊന്നും ആരും പ്രതീക്ഷിക്കരുത്..)

നെഗറ്റീവ്സ് : പൊതുവെ ലാല്‍ ചിത്രങ്ങളിലെ ഗാനങ്ങള്‍ നന്നാവുമെന്നൊരു പ്രതീക്ഷയുമായി ആരും ഈ ചിത്രം കാണാന്‍ പോകരുത്....
'മഴ പെയ്യണ് ' എന്ന് ഗാനം ആ മഴയത്ത് തന്നെ ഒലിച്ച് പോകട്ടെയെന്ന് നമുക്ക് പ്രാര്‍ത്ഥിക്കാം...

2009ല്‍ മലയാളികള്‍ക്കായി ലാലേട്ടന്‍ ഒരുക്കുന്ന വിഭവസമൃദ്ധമായ സദ്യയ്ക്ക്(സിനിമകളുടെ) ശരിക്കും ഒരു അപ്പറ്റൈസറാണ് റെഡ് ചില്ലീസെന്ന് നിസ്സംശയം പറയാം....

സ്റ്റൈലിഷായ ലാലേട്ടന്റെ സ്റ്റൈലന്‍ ചിത്രം നിങ്ങളെല്ലാരും കാണണം.

മുക്കം

2009-02-04T04:15:00.000-08:00

അമ്മാവന്‍റെ വീട്ടുകൂടലിന്(പാല് കാച്ചല്) പങ്കുചേരാനായാണ് ഞാന്‍ എന്‍റെ നാട്ടിലേക്ക് പോയത്. കഴിഞ്ഞ പ്രാവശ്യം ചെന്നപ്പോള്‍ നിതിന്‍റെ വീട്ടില്‍ പോകാമെന്ന് പറഞ്ഞെങ്കിലും സാധിച്ചില്ല. കാല് മാറിയത് അവന്‍ തന്നെയായിരുന്നു. വീട്ടില്‍ ഒഴിച്ച് കൂടാനാവാത്ത എന്തോ ചടങ്ങുകള്‍ നടക്കുന്നുവെന്നും. വീട്ടിലെ ആണ്‍തരിയായ താന്‍ പുറത്തിറങ്ങികൂടാ എന്നവന്‍ പറഞ്ഞപ്പോള്‍ സ്വാഭാവികമായി 'ശുദ്ധ' ഹൃദയനായ ഞാന്‍ വിശ്വസിച്ചു. ഇപ്രാവശ്യം അതെന്തായാലും മാറ്റണമെന്ന് പറഞ്ഞ് നിതിനെ ഫോണ്‍ ചെയ്തു.

ഏറെ വൈകിയാണവന്‍ ഫോണ്‍ എടുത്തത്(എന്‍റെ നാട്ടിലെ നന്പര്‍ അവന്‍ സേവ് ചെയ്തിരുന്നു).

'എന്താ രജിത്തേ നീ നാട്ടിലെത്തിയല്ലെ. എനിക്ക് ഇന്ന് ടൌണിലേക്ക് വരാന്‍ ചെറിയ
അസൌകര്യമുണ്ടല്ലോ?'

ഇത് നേരത്തെ മുന്‍ക്കൂട്ടി കണ്ട എന്‍റെ മറുപടി അവന്‍ തീരെ പ്രതീക്ഷിച്ചിട്ടുണ്ടാവില്ല.

'അത് കാര്യാക്കണ്ട ഞാന്‍ നിന്‍റെ വീട്ടിലേക്ക് വരാം . നീ വഴി പറഞ്ഞ് തന്നാല്‍ മതി'

കുറച്ച് നേരം കഴിഞ്ഞാണ് നിതിന്‍ ഇതിന് മറുപടി നല്‍കിയത്....

'എടാ ഇവിടെ എന്‍റെ വല്യച്ഛന്‍റെ മോന്‍റെ കല്യാണമാ. വീട് നിറയെ ആളും തിരക്കും ആവും. '

ഇനി ഇവനെങ്ങാനും നമ്മളെ ഒഴിവാക്കാന്‍ ശ്രമിക്കുന്നതാണോ? സംശയത്തിന്‍റെ പുതുനാന്പുകള്‍ മനസ്സില്‍ പൊട്ടി മുളയ്ക്കാന്‍ ഏറെ താമസമുണ്ടായില്ല.

'അത് സാരമില്ല. എന്തൊക്കെ വന്നാലും ഞാന്‍ നിന്നെ കണ്ടിട്ടെ പോകുന്നുള്ളു. നീ വഴി പറഞ്ഞ് താ...'

ഇത് പറഞ്ഞത് തന്‍റെ പ്രിയപ്പെട്ട സുഹൃത്തിനെ കാണണമെന്ന ആഗ്രഹം കൊണ്ട് മാത്രമാണ് അല്ലാതെ പലരും വിചാരിക്കുന്ന പോലെ വീട്ടുകൂടലിന് മേശയും കസേരയും പിടിച്ചിടുന്നതില്‍ നിന്ന് രക്ഷപ്പെടാന്‍ വേണ്ടിയൊന്നുമായിരുന്നില്ല..................

'നീ പാളയം സ്റ്റാന്‍ഡില്‍ ഇറങ്ങുക, അവിടെനിന്ന് കാരമൂല കൂടരഞ്ഞി ബസ്സില്‍ കയറുക... കാരമൂല ഇറങ്ങുക. അവിടെ ആരോട് ചോദിച്ചാലും പറഞ്ഞ് തരും. നീ മൂന്നരയോടെ അവിടെ എത്തിയാല്‍ മതി'(അതെന്താ അവന്‍ അങ്ങനെ പറഞ്ഞേ എന്ന് പിന്നീടല്ലെ മനസ്സിലായത്)

ഉച്ചയൂണ് കഴിഞ്ഞ് രണ്ട് മണിയോടെ വീട്ടില്‍ നിന്നിറങ്ങിയപ്പോള്‍ ബന്ധുക്കളെല്ലാം
ചോദിക്കുന്നുണ്ടായിരുന്നു.

'നീ എങ്ങോട്ടാ പോണെ?'...............

കാര്യമറിഞ്ഞപ്പോള്‍ അമ്മാവന്‍റെ ചോദ്യം .

'എന്താണ്ടാ നീ എപ്പോഴും മുക്കത്തേക്ക് പോകുന്നേ.......കഴിഞ്ഞ്രാശ്യം വന്നപ്പോളും
പറയന്നിണ്ടാരുന്നല്ലോ. മുക്കത്തുള്ള ഫ്രണ്ടിനെ കാണാന്‍ പോണന്ന്... അവിടെ എന്താ ചുറ്റിക്കളി?'

ആളെ വടിയാക്കുന്ന ചിരിയും ചിരിച്ച് ഞാന്‍ ബസ്സ് സ്റ്റോപ്പിലേക്ക് നീങ്ങി.

പാളയം സ്റ്റോപ്പിലിറങ്ങി , അത് വഴി വരുന്ന ബസ്സുകളില്‍ മുക്കം,കാരമൂല-കൂടരഞ്ഞി
എന്നെഴുതിയിട്ടുണ്ടോ എന്ന് ശ്രദ്ധിക്കുന്നതായി കുറേ നേരത്തേക്കുള്ള പ്രധാന പണി.
ഏറെനേരം കഴിഞ്ഞിട്ടും ഈ പറഞ്ഞ ബസ്സ് മാത്രം കാണുന്നില്ല. ഇനി ചുറ്റുമുള്ള ' പ്രകൃതി ഭംഗി' ആസ്വദിക്കുന്നതിനിടയില്‍ ബസ്സെങ്ങാനും മിസ്സ് ആയതാണോ?

സംശയം തീര്‍ക്കാനായി അടുത്ത് നിന്നിരുന്ന ഒരു ചേട്ടനോട് കാര്യമങ്ങ് തിരക്കി.......
'ചേട്ടാ ഈ മുക്കത്തേക്ക് പോകാന്‍ ഇവിടെ നിന്നാല്‍ ബസ്സ് കിട്ടുമോ?'

കോഴിക്കോട് നഗരത്തിലെ ബസ്സ്റൂട്ടുകള്‍ മുഴുവനും പറഞ്ഞ് തരാനുള്ള സമയം ആലോചിച്ച ശേഷം ചേട്ടന്‍ ഇങ്ങനെ മൊഴിഞ്ഞു.

'നിയ്ക്കത്ര പരിചയം പോരാട്ടോ....ഇങ്ങള് ആടെയുള്ള ഏതെലും കടയില്‍‌ ചോദിച്ചാള്'

തൊട്ടടുത്തുള്ള ജ്യൂസ് കടയില്‍ കയറി വഴി ചോദിക്കാന്‍ തീരുമാനിച്ചു..........

കടയില്‍ കയറിയുടന്‍ കടക്കാരന്‍
'എന്താ വേണ്ടേ, ഷാര്‍ജ, ബദാം,ചിക്കു,ഓറഞ്ച്,മൊസാംബി'
'ഷാര്‍ജ മതി'

ഷാര്‍ജ കുടിക്കാനായി ഇരുന്നപ്പോളാണ് അതോര്‍ത്തത്. ദൈവമേ ഞാന്‍ ഇതെന്താ പറഞ്ഞേ. ഞാന്‍ ഇവിടെ ബസ്സ്സ്റ്റോപ്പ് എവിടെ എന്ന് ചോദിക്കാനല്ലേ വന്നേ? അതിന് പുറമേ 'ഗുഡ് ഹെല്‍ത്തിലേക്ക് ' എത്താന്‍ വേണ്ടി തുടങ്ങിയ നീന്തലിന്‍റെ സംഭാവനയായ തൊണ്ടവേദനയുമുണ്ടല്ലോ.............

ചേട്ടാ................... ഷാര്‍ജ വേണ്ടാ എന്ന് പറയാന്‍ തുടങ്ങിയതും ചേട്ടന്‍ കട്ടിയായ പാല്‍
തല്ലിപൊട്ടിക്കാന്‍ തുടങ്ങി....

'എന്താ'

അല്ലാ കുറച്ച് ചോക്ലേറ്റ് പൊടികൂടി ചേര്‍ത്തോളൂ........................

കഷ്ടപ്പെട്ട് ഷാര്‍ജ കുടിച്ച് തീര്‍ക്കുന്നതിനിടയില്‍ ഞാന്‍ അത് ചോദിച്ചു..........

'ചേട്ടാ ഈ മുക്കത്തേക്കുള്ള ബസ്സ്...?'

'അതവിടെ എല്‍ഐസിയുടെ മുന്നില്‍ നിന്നാല്‍ കിട്ടും........'

എല്‍ഐസിയുടെ മുന്നിലെ ബസ്സ്സ്റ്റോപ്പില്‍ നിന്ന് എതിരെ മാനാഞ്ചിറയില്‍ നടക്കുന്ന ബാസ്കറ്റ് ബോള്‍ പ്രാക്ടീസും കണ്ട്, ഇടയ്ക്ക് വരുന്ന ബസ്സുകളെയും മാറി മാറി നോക്കി, അവസാനം കൂടുതല്‍ രസം ബാസ്കറ്റ്ബോള്‍ കളി(കളിച്ചിരുന്നത് പെണ്ണ്കുട്ടികളാണെന്നത് വേറെ കാര്യം) തന്നെയാണെന്ന് മനസ്സിലായപ്പോള്‍ വീണ്ടും ബസ്സിന്‍റെ കാര്യം മറന്നു.

കളിയുടെ ഇടവേളയായപ്പോഴാണ് നിതിന്‍റെ കാര്യം വീണ്ടും ഓര്‍മ്മ വന്നത്. ആരോടാ ഒന്ന് വഴി ചോദിക്കുക. നമ്മുടെ സ്റ്റാന്‍ഡേര്‍ഡിന് പറ്റിയ ആരെയും കാണുന്നില്ലല്ലോ?.......... എല്ലാം എജ്ഓവറാണ്.......

ദൂരെ മാറി ഒരു ബസ്സിന്‍റെ തണലില്‍ റെസ്റ്റ് ചെയ്യുകയായിരുന്ന ഒരു ട്രാഫിക് പോലീസുകാരന്‍ എന്‍റെ വ്യൂവിലേക്ക് കടന്നു വന്നു.....

മെല്ലെ മൂപ്പരുടെ അടുത്തേക്ക് നടന്നടുത്ത് ഞാന്‍ 'ചേട്ടാ.... അല്ല സാര്‍ , ഈ മുക്കത്തേക്ക്.............'

'അതിന് പുതിയ സ്റ്റാന്‍ഡിലേക്ക് പോകണം.'

ഉച്ചവെയിലും കൊണ്ട് കോഴിക്കോട് സിറ്റിയിലൂടെ നടക്കുന്പോള്‍ ബസ്സ് പിടിച്ച് തിരികെ വീട്ടിലേക്ക് പോയാലോ എന്ന് വരെ വിചാരിച്ചു. പക്ഷേ നിതിന്‍റെ വല്യച്ഛന്‍റെ വീട്ടില്‍ ഉണ്ടായേക്കാവുന്ന, അവന്‍ എനിക്ക് ഓഫര്‍ ചെയ്യുമെന്ന് വിചാരിക്കുന്ന ബിരിയാണിയെ ഓര്‍ത്ത് വീണ്ടും ദൌത്യവുമായി മുന്നോട്ട് പോകാന്‍ തീരുമാനിച്ചു. അത് മാത്രമല്ല, അടുത്ത വരവിനും 'ഞാന്‍ മുക്കത്ത് പോയി ഇപ്പോള്‍ വരാം ' എന്ന് പറയേണ്ടിവരുന്നത് ഓര്‍ത്തപ്പോള്‍ ഈ മഹാസംഭവം ഇന്ന് തന്നെ തീര്‍ക്കുന്നതാ നല്ലത് എന്ന്
മനസ്സിലായി...................

പുതിയസ്റ്റാന്‍ഡില്‍ എത്തി ബസ്സുകള്‍ നിര്‍ത്തിയിടുന്നിടത്ത് നോക്കിയപ്പോള്‍ കേരളത്തിന്‍റെ നാനാ ദിശകളിലേക്കും സര്‍വ്വീസ് നടത്തുന്ന ബസ്സുകള്‍ കണ്ടു... പക്ഷേ മുക്കം എന്ന ബോര്‍ഡ് മാത്രം കണ്ടില്ല.

ഈശ്വരാ പാപി ചെല്ലുന്നിടം പാതാളം എന്ന് പറഞ്ഞത് പോലെ ഞാന്‍ പോകുന്നോണ്ട് മുക്കത്തേക്കുള്ള ബസ്സുകളെല്ലാം മിന്നല്‍ പണിമുടക്കെങ്ങാനും നടത്തിയോ......

ഏകദേശം ഒരുമണിക്കൂര്‍ മുക്കം ബസ്സിനായി നടത്തിയ തിരച്ചില്‍ ഒരു ബസ്സ് ഡ്രൈവറുടെ
സഹായത്തോടെ പര്യവസാനിച്ചു. പുതിയ സ്റ്റാന്‍ഡിന് പുറത്തുള്ള ബസ്സ്സ്റ്റോപ്പിലോ, പാളയം ബസ്സ്സ്റ്റാന്‍ഡിലോ(ഞാന്‍ നിന്നത് സ്റ്റോപ്പിലാണ്) പോയാല്‍ മുക്കത്തേക്കുള്ള ബസ്സ് കിട്ടുമെന്ന് അദ്ദേഹം എനിക്ക് മനസ്സിലാക്കി തന്നു.....

സ്റ്റോപ്പില്‍ ഏറെ കാത്തിരിക്കേണ്ടി വന്നില്ല. അതിന് മുന്പ് മുക്കം ബസ്സ് വന്നു.. കാരമൂല-കൂടരഞ്ഞി ബോര്‍ഡൊന്നും കണ്ടില്ല. അതിനായി കാത്തിരുന്ന് ഇനിയും വൈകേണ്ട എന്ന് വിചാരിച്ചു ആ ബസ്സില്‍ കയറി ഇരിപ്പുറപ്പിച്ചു......

പാളയത്ത് നിന്ന് ഏകദേശം അര മണിക്കൂര്‍ ,തിരക്ക് കുറഞ്ഞ സമയമാണെല്‍ ഇരുപത് മിനുട്ട്. നിതിന്‍ പറഞ്ഞതോര്‍ത്ത് പത്ത് രൂപാ നോട്ട് കണ്ടക്ടര്‍ക്ക് നേരെ നീട്ടി
'ഒരു മുക്കം....'

എന്നെയും നോട്ടിനെയും മാറി മാറി നോക്കിയ ശേഷം കണ്ടകട്റുടെ മുഖത്ത് ഇവന്‍ ആരെടാ എന്നൊരു ഭാവം വിരിയുന്നത് ഞാന്‍ ശ്രദ്ധിച്ചു.......

ഈശ്വരാ ഇനി കള്ളനോട്ടെങ്ങാനുമാണോ?.... ഈ യാത്ര എന്നെയും കൊണ്ടേ പോകു എന്നാ തോന്നുന്നേ . ഞാന്‍ മനസ്സിലോര്‍ത്തു.........

'പയിനാലു രൂപാ അയ്ന്പതീസാ' ടിക്കറ്റ് കീറി എന്‍റെ നേരക്ക് നീട്ടി പൈസക്കായി കാത്ത് നിന്നു......

'ചേട്ടന്‍ മുക്കം എന്ന് തന്നെയാണോ കേട്ടേ. എനിക്ക് ഇറങ്ങേണ്ടത് മുക്കത്താണ്'

'ഇങ്ങള് മുക്കം എന്നല്ലേ പറഞ്ഞത് അങ്ങോട്ടേക്കുള്ള ടിക്കറ്റാണ് ഞാന്‍ തന്നെ'

'പതിനാലു രൂപാ അന്പത് പൈസയോ? മുക്കത്തേക്ക് എത്ര മണിക്കൂര്‍ യാത്രയുണ്ട്'

അതൊരു ഒന്ന്-ഒന്നൊര മണിക്കൂര്‍ വരും.............. കാലമാടാ നിതിനെ അരമണിക്കൂര്‍ അല്ലേ?

കോഴിക്കോട് നിന്ന് മുക്കം വരെയുള്ള യാത്ര ശരിക്കും രസകരമായിരുന്നു. പച്ചപ്പ് നിറഞ്ഞ്

റോഡരികുകള്‍ . വാഴത്തോപ്പുകളും പാടങ്ങളും അങ്ങിങ്ങായി ചെറിയ പുഴകളും. മലബാറിലാണെന്ന് തെളിയിക്കുന്നതായിരുന്നു കൊയ്തു കഴിഞ്ഞ പാടങ്ങളില്‍ നാടിയിരുന്ന ഗോള്‍പോസ്റ്റുകള്‍ . അങ്ങിങ്ങായി ക്രിക്കറ്റ് കളിക്കുന്ന ചില കൂട്ടങ്ങള്‍ ഈ പ്രദേശത്തേക്ക് ക്രിക്കറ്റ് അതിന്‍റെ ചുവടുറപ്പിക്കുന്നതിനൊരുദാഹരണമാണ്................

ഐഐഏം,ഡോയാക്ക് സെന്‍റര്‍ ,ആര്‍ഈസീ എന്നീ പ്രസിദ്ധമായ സ്ഥാപനങ്ങളും
കാണുവാനിടയായി....

നിതിന്‍റെ സ്വന്തം മുക്കത്തേ കുറിച്ചാണെങ്കില്‍ കടകന്പോളങ്ങള്‍ കൊണ്ട് തിങ്ങി നിറഞ്ഞൊരു ചെറിയ ടൌണ്‍ . തങ്ങളും കച്ചവടത്തില്‍ ഒട്ടും പിറകില്‍ അല്ല എന്ന ഭാവത്തില്‍ ചെറിയ ഒരു തിരക്കിന് ഉടമയായ ടൌണ്‍ .

നിതിനെ വിളിക്കാന്‍ തീരുമാനിച്ച് അടുത്തുള്ളൊരു ബൂത്തില്‍ കയറി. പോകുന്ന വഴിക്ക്
കാരമൂല-കൂടരഞ്ഞി എന്ന ബസ്സ് ദൃഷ്ടിയില്‍ പെട്ടു. മനസ്സ് സന്തോഷം കൊണ്ടു തുടിച്ച്. എന്തായാലും നിതിനെ വിളിച്ച് ഇറങ്ങേണ്ട സ്റ്റോപ്പ് ഉറപ്പാക്കാം.........

ഫോണ്‍ എടുത്ത നിതിന്‍ ആളെ തിരിച്ചറിഞ്ഞപ്പോള്‍ ഇറങ്ങേണ്ട സ്ഥലം പറഞ്ഞു തന്നു....

'കാരമൂല സ്റ്റോപ്പില്‍ ബസ്സിറങ്ങുക, എന്നിട്ട് അവിടെ നില്‍ക്കുക. അപ്പോള്‍ ബസ്സ് ഒരു വഴി പോകും. ബസ്സ് പോകാത്ത വഴി മൂന്നാമത്തെ വളവില്‍ ഒരു വീട് കാണാം അതാണെന്‍റെ വീട്. അപ്പോള്‍ വീട്ടില്‍ വച്ച് കാണാം. ' ഇത്രയും പറഞ്ഞ് ഫോണ്‍ കട്ട് ചെയ്തു........

മൂന്നര രൂപ ടിക്കറ്റെടുത്തു ഹെയര്‍പിന്‍ വളവുകളിലൂടെ സഞ്ചരിച്ച് പത്ത് മിനുട്ടുകള്‍ക്ക് ശേഷം കാരമൂല എത്തി ബസ്സ് ഇറങ്ങിയ ഞാന്‍ അന്തം വിട്ടു പോയി. നാല്‍ക്കവല എന്നൊക്കെ കേട്ടിട്ടില്ലേ. ഇത് അതിനെയും വെല്ലുന്നൊരു സംഭവം. ബസ്സ് പോകുന്ന വഴിക്ക് പുറമേ പോകാത്ത മൂന്ന് വഴികള്‍ വേറെ.....(ഇതിലൊന്നാണ് അവന്‍ തിരഞ്ഞെടുക്കാന്‍ പറഞ്ഞത്)

കുറേ നേരം ആ ജംഗ്ഷനില്‍ തന്നെ അങ്ങനെ നിന്നു. ആള്‍പെരുമാറ്റം കൂടിയ ഒരിടവഴിയിലേക്ക് പോകാന്‍ തീരുമാനിച്ചു. കാല്‍നടക്കാരുടെ കൈയിലേ പൊതികളായിരുന്നു ഈ തീരുമാനത്തിന് പ്രചോദനം.

നാലഞ്ചടി നടന്നപ്പോള്‍ തന്നെ വെല്‍ക്കം എന്ന ഒരു ബോര്‍ഡ് ശ്രദ്ധയില്‍ പെട്ടു. ആള്‍ത്തിരക്ക് കൂടിയ ആ വീട്ടിലേക്ക് കയറുന്പോള്‍ തന്നെ ശ്രദ്ധയില്‍പെട്ടത് ചക്രവ്യൂഹത്തില്‍ പെട്ട അഭിമന്യുവിനെ പോലെ ഇരിക്കുന്ന കഥാനായകനെയാണ്. ചുറ്റും കുറേ ഫാന്‍സും(എന്ന് അവന്‍ പറയുന്നു).

നിതിന്‍ വളരെ പ്രയാസപ്പെട്ടിറങ്ങി വന്നു (മനസ്സമാധാനത്തോടെ ഇരിക്കാന്‍ സമ്മതിക്കില്ലെ എന്നുള്ള ഭാവവുമായി).

പിന്നീട് അച്ഛനെയും അമ്മയെയും പെങ്ങളെയും നാട്ടുകാരുടെയും അടുത്ത് കൊണ്ടുപോയി എന്നെ പരിചയപ്പെടുത്തുന്നതായിരുന്നു അവന്‍റെ പ്രധാന ഹോബി. കല്യാണ പാര്‍ട്ടിക്കാര്‍ക്ക് വെള്ളം കൊടുക്കുന്നതിനിടയില്‍ നിന്ന് മുങ്ങാന്‍ ഇതിലെറെ നല്ല അവസരം ഉണ്ടാകില്ല എന്നവന് നല്ല നിശ്ചയമുണ്ടായിരുന്നു........

നിതിന്‍റെ പിതാശ്രീ പരിചയപ്പെട്ടപ്പോള്‍ തന്നെ, ഇന്നിവിടെ തങ്ങീട്ട് പോകാം എന്നൊക്കെ നിര്‍ബന്ധം തുടങ്ങി. വീട്ടില്‍ വേറൊരും പരിപാടി ഉണ്ടെന്നും. ഇന്ന് തന്നെ മടങ്ങേണ്ടതുണ്ടെന്നും പറഞ്ഞപ്പോള്‍ അദ്ദേഹം ഭക്ഷണം കഴിച്ചിട്ടെ പോകാവു എന്ന് പറഞ്ഞ്. പക്ഷേ നമ്മുടെ മുക്കം സുഹൃത്തിന് ഇതിലൊന്നുമായിരുന്നില്ല താല്പര്യം. മൂപ്പര് അവിടെ നിന്ന് കഥകളി മുദ്ര പോലെ കൈയും കലാശവും കാണിക്കുകയും ഞാന്‍ അത് കണ്ടെന്നറിഞ്ഞപ്പോള്‍ പന്തലിന്‍റെ അലങ്കാരപണികള്‍ ശ്രദ്ധിക്കുന്നു എന്ന വ്യാജേന മുകളിലേക്ക് നോക്കി നില്‍പുറച്ചു.

'നിതിനെ അപ്പോള്‍ നിന്‍റെ മുറിയിലേക്ക് പോകാം അല്ലേ?' എന്‍റെ ചോദ്യം അവന്‍ കേട്ടില്ലേ?

'ടാ നിന്നോടാ ഞാന്‍ പറഞ്ഞേ'

'അയ്യോ താക്കോല്‍ ആരുടെ കൈയ്യിലാണോ എന്തോ? വീട് പൂട്ടിയിരിക്കുകയാ....നീ വാ അവിടത്തെ കാര്യങ്ങളൊക്കെ പറ?'

റോഡരികിലേക്ക് വിളിച്ച് കൊണ്ട് പോയപ്പോള്‍ എനിക്ക് ഒരു കാര്യം തീര്‍ച്ചയായി. ഇവന് എന്നെ വീട്ടില്‍ കൊണ്ട് പോകണമെന്നോ, ഭക്ഷണം കഴിപ്പിക്കണമെന്നോ ഒരാഗ്രഹവുമില്ല...

ഇടയ്ക്കിടയ്ക്ക് ലോണ്‍ ശരിയാക്കാനും മറ്റ് ബാങ്കിംഗ് സംശയങ്ങള്‍ക്കും ഒട്ടനവധി ആളുകള്‍ പ്രോബ്-ഓഫീസറുടെ അടുക്കല്‍ എത്തുന്നുണ്ടായിരുന്നു.....നാട്ടുകാരുടെ കണ്ണിലുണ്ണിയാണ് ടിയാന്‍ എന്നും എനിക്ക് മനസ്സിലാക്കാന്‍ കഴിഞ്ഞു.

ടിങ്കുവേ സുഖമാണോ? കല്യാണത്തിന് എത്ര ദിവസം ലീവുണ്ട് ടിങ്കു.... എന്നീ നാട്ടുകാരുടെ ചോദ്യം കേട്ട് നിതിന്‍ ഇവിടെ സി-ഡാകില്‍ പലരില്‍ നിന്നും ഒളിപ്പിച്ച് വച്ച പേര് എന്തെന്ന് മനസ്സിലാക്കാന്‍ സാധിച്ചു........

ഇവിടെ നമ്മുടെ സുഹൃത്തുക്കളായ യസീറിന്‍റെ നിക്കാഹും(അവനും ബീവിയും മുക്കം ഫെഡറല്‍ ബാങ്കില്‍ നിതിനെ കാണാന്‍ വന്നപ്പോള്‍ പുതിയാപ്ല നിന്ന് വിറയ്ക്കുകയായിരുന്നു പോലും), നിഷാന്തിന്‍റെ കല്യാണമുറപ്പിക്കലും, ജിത്തുവിന്‍റെ ട്രീറ്റും, രമേശന്‍റെ വിസ്റ്റിയോണിലെ പുതിയ ഫാന്‍സുകളെയും ഷിബുവിന്‍റെ ആര്‍ഏംപിയെയും കുറിച്ച് പറയുന്നതിനിടയില്‍ നിതിന് ചില ഫോണ്‍

കോളുകള്‍ വന്നു... ചിലതിനൊക്കെ എന്‍റെ അടുത്ത് നിന്ന് മറുപടി പറയുന്പോള്‍ ചിലതിന് ദൂരെ മാറി നില്‍ക്കുന്നതും നമ്മള്‍ ഗൌരവമായി കാണേണ്ടി ഇരിക്കുന്നു...............

അതിലെ ചില ഫോണ്‍കോളുകളുടെ സാരാംശം ദാ ഇങ്ങനെയാണ്........

'അയ്യോടാ.... ഇന്ന് വന്നാല്‍ ശരിയാവില്ല... ഞാന്‍ വീട്ടിലില്ല.. വല്യച്ഛന്‍റെ വീട്ടിലാ... മൂപ്പരുടെ മകന്‍റെ കല്യാണമാ.. നമുക്ക് അടുത്ത പ്രാവശ്യം കാണാം......'

അപ്പോളാണ് പണ്ട് തിരുവനന്തപുരത്ത് അവന്‍റെ സഹമുറിയന്‍മാരായ ഷമീമും സജിയും പറഞ്ഞകാര്യങ്ങള്‍ ഓര്‍മ്മ വന്നത്.. കോഴിക്കോടെത്തുന്പോള്‍ എന്ന് നിതിന്‍റെ വീട്ടില്‍ ചെല്ലാം എന്ന് പറഞ്ഞാലും അവന്‍ പറയും വല്യച്ഛന്‍റെ വീട്ടിലാണ്. കുടുംബ വീട്ടിലാണ്..

ഈ പറഞ്ഞ വീടുകളും നമ്മുടെ നിതിന്‍റെ വീടും ഒരേ കോംബൌണ്ടിലാണ് ......
പിന്നെ എന്തേ അവന്‍ എല്ലാരോടും ഇങ്ങനെ പറയുന്നേ?....

കണ്ടെത്തേണ്ടിയിരിക്കുന്നു................

'ടിങ്കു.... എടാ ഇന്നാ താക്കോല്‍‍ ടാങ്കിലേ വെള്ളം തീര്‍ന്നു. നീ അതൊന്ന് ഫില്‍ ചെയ്തേ'

നിതിന്‍ താക്കോല്‍ വാങ്ങി. അവന്‍റെ കൂടെ വീട്ടിനുള്ളില്‍ കയറാം എന്ന് വിചാരിച്ച എന്നെ അവന്‍ ശരിക്കും ഞെട്ടിപ്പിച്ചു കളഞ്ഞു.

'വാടാ നീ ചെന്ന് ആഹാരം കഴിക്ക് കുറച്ച് കഴിഞ്ഞ് കോഴിക്കോട്ടേക്കുള്ള ബസ്സ് ഉണ്ട്......'
ഇത്രയും പറഞ്ഞ് നിതിന്‍ നേരെ ഭക്ഷണം വിളന്പുന്നിടത്തേക്ക് നടന്നു...

ഭക്ഷമെങ്കില്‍ ഭക്ഷണം കിട്ടുന്നത് കിട്ടട്ടെ എന്ന് പറഞ്ഞ് ഞാനും.....
അവിടെ അവന്‍ രണ്ട് പേരെ എനിക്ക് പരിചയപ്പെടുത്തി. പേര് ഞാന്‍ ഓര്‍ക്കുന്നില്ല.

'ഏട്ടാ ഞാന്‍ പറഞ്ഞില്ലേ തിരുവനന്തപുരത്ത് നമ്മുടെ 20 ഫ്രണ്ട്സ് അലിഭായി കാണാന്‍ പോയത് ആ ദോസ്താണിത്....'

'രജിത്തേ ഇത് ഇവിടുത്തെ മോഹന്‍ലാല്‍ ഫാന്‍സിന്‍റെ സജീവ പ്രവര്‍ത്തകന്‍ , മറ്റേത് മമ്മൂട്ടി
ഫാന്‍സിന്‍റെയും'

ഞാന്‍ രണ്ട് പേരേയും നോക്കി ചിരിച്ചു. സിനിമകളെ കുറിച്ച് ഒന്ന് രണ്ട് കാര്യങ്ങളൊക്കെ പറഞ്ഞതിന് ശേഷം എന്നെ അവര്‍ ഭക്ഷണം കഴിക്കാനായി ഇരുത്തി. ഫുഡ് വന്നതും , ഞാന്‍ ഇനി പുറകെ ഉണ്ടാകില്ല എന്ന ധൈര്യത്തില്‍ നിതിന്‍ ടാങ്കിലേക്ക് വെള്ളം നിറയ്ക്കാന്‍ ആയി പോയി.....

ഒരു ലാല്‍ ഫാനിന് മറ്റൊരു ലാല്‍ ഫാനിനോട് തോന്നുന്ന ആത്മബന്ധം കൊണ്ടാവാം. നമ്മുടെ ലാലു ചേട്ടന്‍ എന്‍റെ അടുത്ത് വന്നിരുന്നു.

'മോനെ, ഇങ്ങള് വരുന്നു എന്ന് കേട്ടതും ഓന്‍ നാലഞ്ചാളുകളെ വിളിക്കുന്നുണ്ടായിരുന്നു. മമ്മൂട്ടി ഫാന്‍സ്കാരെയാണെന്നാ തോന്നുന്നേ? ഇന്നിവിടെ തങ്ങാം എന്ന് വല്ലതും പറഞ്ഞോ?'

'ഉം നിതിന്‍റെ അച്ഛന്‍ പറഞ്ഞിരുന്നു.......... '

'എന്നാല്‍ വേണ്ടാട്ടോ അടുത്ത വണ്ടിക്ക് രക്ഷപ്പെട്ടോ?'

ആസ്വദിച്ച് കഴിക്കാം എന്ന് വിചാരിച്ചിരുന്ന് ബിരിയാണി എങ്ങനയൊക്കയോ വാരി വിഴിങ്ങി. അവിടുന്ന് പെട്ടന്ന് രക്ഷപ്പെട്ടാനായി നിതിന്‍റെ വീട്ടുകാരോട് യാത്ര പറയാന്‍ പോയപ്പോള്‍ വീണ്ടും നിതിന്‍റെ പിതാജിയുടെ നിര്‍ബന്ധം

'വിഷമമാവില്ലെങ്കില്‍ ഇന്നിവിടെ തങ്ങിയിട്ട് പോകാം.........'

ബസ്സ് വരുന്നെന്ന് തോന്നുന്നു എന്ന് പറഞ്ഞ് അവിടെ നിന്നിറങ്ങുന്പോള്‍ ഞാന്‍ ആലോചിച്ചതിതാ
നിതിനെ പോലെ അവന്‍റെ അച്ഛനും ഒരു മമ്മൂട്ടി ഫാനാണല്ലേ.........................

വാല്‍ക്കഷണം: നിതിന്‍റെ വീട്ടില്‍ , അവന്‍റെ മുറിയിലെങ്ങാനും കയറിയാലോ എന്ന് പേടിച്ച് നിതിന്‍ തിരക്കഥയെഴുതിയ ഒരു നാടകമായിരുന്നോ ആ മമ്മൂട്ടി-മോഹന്‍ലാല്‍ സംഭവമെന്നായിരുന്നു മുക്കത്ത് നിന്ന് തിരികെയുള്ള യാത്രയില്‍ എന്‍റെ മനസ്സ് നിറയെ..........................

ബ്ലോഗിലെ പുലികള്‍ (എന്‍റെ കാഴ്ചപ്പാടില്‍ -ലിസ്റ്റ് അപ്ഡേറ്റ് ചെയ്യുന്നതായിരിക്കും)

2009-01-10T00:38:00.000-08:00

എന്നെ ബ്ലോഗ് ലോകത്തേക്ക് കൊണ്ട് വന്നത് സുഹൃത്തുക്കളായ രമേശും ഷംനാറുമാണ്.രമേശന്‍റെ കൈയില്‍ നിന്ന്കിട്ടിയ ഒരു പിഡിഎഫ് വായിച്ചതില്‍ പിന്നെ ഇതൊരു ആവേശമായി മാറുകയായിരുന്നു...
ഇവിടെ ഞാന്‍ സ്ഥിരം വായിക്കുന്ന നിങ്ങളുടെയൊക്കെ ആരാധന പാത്രങ്ങളായ ചില പുലികളെക്കുറിച്ചാണ്പറയുന്നത്...

മൊത്തം ചില്ലറ
ആദ്യമായി കിട്ടുന്ന ബ്ലോഗ് പിഡിഎഫ്... കൊട്ടാരക്കര സൂപ്പര്‍ഫാസ്റ്റ്.. വായിച്ചു കഴിഞ്ഞപ്പോള്‍ ശരിക്കും മനസ്സിലൊരുകുളിര് അനുഭവപ്പെട്ടു....
അസാധ്യമായ ഉപമകളുടെ ഉടമസ്ഥന്‍ , ഇപ്പോ സൈലന്‍റാണെന്നുള്ളതില്‍ സങ്കടമുണ്ട്...മൊത്തം ചില്ലറപുസ്തകമാകുന്നുണ്ടെന്നറിഞ്ഞതില്‍ സന്തോഷം....

കൊടകരപുരാണം
മാടപ്രാവിന്റെ ഹൃദയവും തുളസിക്കതിരിന്റെ വിശുദ്ധിയുമുള്ള ഒരു ചെറുപ്പക്കാരന്‍ ‍. നൊസ്റ്റാള്‍ജിയ വരുത്തുന്നപോസ്റ്റുകള്‍ ...
എന്‍റെ പുസ്തക ശേഖരത്തിലെ വിലപ്പെട്ട ഒരു പുസ്തകം...
ദാ.. ഇപ്പോ വീട്ടില്‍ എന്ന് കൂര്‍ക്കയുപ്പേരി ഉണ്ടാക്കിയാലു എനിക്ക് വിശോലേട്ടനെ ഓര്‍മ്മ വരും...

കൊച്ചുത്രേസ്യ
എന്‍റെ കുടുംബത്തില്‍ ഇത് പോലെ കുസൃതിത്തരങ്ങള്‍ ചെയ്യുന്ന ഒരു ചേച്ചിയുണ്ടായിരുന്നെങ്കിലെന്ന് തോന്നിപോകും ആ പോസ്റ്റുകള്‍ വായിക്കുന്പോള്‍ ...
ഇപ്പോ പാചക പരീക്ഷണങ്ങളിലേക്കിറങ്ങിയിരിക്കുകയാ... അതോര്‍ക്കുന്പോള്‍ റിസ്ക് എടുക്കണോ.....

ബ്രിജ് വിഹാരം
പലരും പറയുമായിരുന്നെങ്കിലും പല ബ്ലോഗുകളും ഞാന്‍ വായിക്കാറില്ല. അതില്‍ പേര് കേട്ട ചിലരുടെ ബ്ലോഗ്ഉണ്ടായിട്ട് പോലും. അതിലൊന്നായിരുന്നു ബ്രിജ് വിഹാരം.
മനുവേട്ടന്‍റെ ആ ശൈലി, ആദ്യ ചിരിപ്പിച്ച് അവസാനത്തോടടുക്കുന്പോള്‍ ഒരു നോവായി മനസ്സിലൊരു പിടച്ചിലായിഅവസ്സാനിക്കുന്ന ആ ശൈലി...

ബെര്‍ളിത്തരങ്ങള്‍
വീട്ടില്‍ തിരിച്ചെത്തി നെറ്റില്‍ കേറിയാല്‍ തിരയുന്ന രണ്ട് വിലാസങ്ങള്‍ , ഓര്‍ക്കൂട്ടും, ബെര്‍ളിത്തരങ്ങളും(ഓഫീസില്‍ഇതൊക്കെ ബ്ലോക്ക്ഡ് ആണ്...)ഇമ ചിമ്മുന്ന വേഗത്തില്‍ പോസ്റ്റുകള്‍ പോസ്റ്റുന്ന ഒരു അതുല്യ പ്രതിഭ... ഏറ്റവുംകൂടുതല്‍ ഫോര്‍വേഡുകള്‍ ലഭിക്കുന്ന ഇദ്ദേഹത്തിന്‍റെ പോസ്റ്റുകളാണ്....
അച്ചായാ.. നമിച്ചിരിക്കുന്നു....

അപരിചിത
ചുള്ളന്‍ പറഞ്ഞിട്ടാണ് ഈ ബ്ലോഗിലേക്ക് ഞാന്‍ ആദ്യമായി വരുന്നു.. ചുള്ളാ സോറി, ഞാന്‍ സറണ്ടര്‍ ആവുന്നു.. നീസിംഗപ്പൂര്‍ ആയോണ്ട് ഡോണ്ട് വറീ...
ഒരു ഫെമിനിസ്റ്റ് ലൈനുണ്ടെന്നും, കമന്‍റുകള്‍ സ്വന്തം റിസ്കില്‍ ആയിരിക്കണമെന്നും... എന്‍റെ കൂട്ടുകാരനാണെന്ന്പറയരുതെന്നും അവന്‍ പ്രത്യേകം പറഞ്ഞിരുന്നു...
അപരിചിതയുടെ കമന്‍റുകളെ ഓര്‍ത്ത് പേടിയാകുന്നു...

ഇതൊക്കെ ആണേലും... ചിത്രങ്ങള്‍ കൊണ്ടും, പോസ്റ്റുകള്‍ കൊണ്ടും വീണ്ടും വീണ്ടും സന്ദര്‍ശിക്കാന്‍ തോന്നുന്നഒരു ബ്ലോഗ്.....

ഇനിയും പല മഹാരഥന്മാരുണ്ടെന്നറിയാം... അതൊക്കെ ഞാന്‍ വായിച്ച് വരുന്നതെ ഉള്ളു...കുറു,പോങ്ങു, സുനീഷ്അങ്ങനെ പലരും ഉണ്ടെങ്കിലും അവരുടെ ഒക്കെ ഞാന്‍ വായിച്ച് വരുന്നതെ ഉള്ളു....
ഞാന്‍ കയറാതെ വിട്ട, വായിച്ചിരിക്കേണ്ട ബ്ലോഗുകള്‍ ഉണ്ടെങ്കില്‍ ദയവായി അറിയിക്കുക....